Kigali: Abapolisi 86 batanze amaraso yo gufashisha abarwayi

  • NTAWITONDA JEAN CLAUDE
  • Gicurasi 6, 2022
  • Hashize imyaka 2
Image

Kuwa Kane taliki ya 05 Gicurasi abakozi b’Ikigo cy’Igihugu cyita ku Buzima (RBC) bari ku cyicaro gikuru cya Polisi y’u Rwanda ku Kacyiru aho bakusanyije amaraso yo kujya bafashisha abarwayi bayakeneye, aho abapolisi bagera kuri 86 batanze amaraso.

Umuvugizi wa Polisi y’u Rwanda, Commissioner of Police (CP) John Bosco Kabera, yavuze ko igikorwa cyo gutanga amaraso ari ugushyira mu bikorwa amasezerano Polisi y’u Rwanda yasinyanye n’Ikigo cy’Igihugu cy’ubuzima (RBC) mu bijyanye no gufatanya mu by’ubuzima n’umutekano. Muri aya masezerano hakubiyemo gutanga amaraso, kurwanya ibiyobyabwenge by ‘umwihariko mu rubyiruko, ubufatanye mu kurwanya indwara zo mu mutwe no kurwanya ihohotera rishingiye ku gitsina.

CP Kabera yavuze ko gutanga amaraso ku bapolisi ari ibisanzwe kuko bimaze igihe kandi n’abapolisi babikora ku bushake bumva impamvu yabyo.

Yagize ati:” Igikorwa cyo gutanga amaraso ku bapolisi kirasanzwe, abapolisi bayatanga kubera umutima wo gufasha abarwayi bari hirya no hino mu bitaro bayakeneye. Usibye n’ibyo kandi baba babizi ko nabo bashobora kuyakenera barwaye cyangwa abavandimwe babo bakayakenera, gutanga amaraso rero nta gihombo kirimo.”

CP Kabera yasoje ashimira abapolisi bakorera hirya no hino mu gihugu bagerwaho n’abaganga, bagatanga amaraso.

Dr. Thomas Muyombo, Umuyobozi w’ishami  rishinzwe gutanga amaraso Division Manager of the Blood Transfusion Division (BTD) , yavuze ko iyo umuntu umwe atanze amaraso aba arengeye ubuzima bw’abantu byibura 4 bakeneye amaraso.

 Yagize ati: “Guhera mu mwaka wa 2017, abapolisi bamaze gutanga amasashe y’amaraso (Blood units) arenga ibihumbi 5, wongeyeho amasashe y’amaraso  arenga 1300 amaze gutangwa muri uyu mwaka wa 2022, akaba yaragize uruhare mu gufasha abantu barenga ibihumbi 10 bari bakeneye amaraso.”

Yongeyeho ko inzego z’umutekano zitari intangarugero mu by’umutekano gusa, ahubwo zinagira uruhare mu gutabara ubuzima bw’abantu.

  • NTAWITONDA JEAN CLAUDE
  • Gicurasi 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE