Kigali: Abakirisitu bahawe ubutumwa bw’ibyiringiro n’amahoro kuri Noheli

  • Imvaho Nshya
  • Ukuboza 25, 2023
  • Hashize amezi 5
Image

Kuri uyu wa 25 Ukuboza, umubare munini w’abatuye Isi bizihiza Umunsi Mukuru wa Noheli, mu kwibuka ivuka rya Yezu Kirisitu, wabayeho mu myaka irenga 2 000 ishize. 

Ku bakirisitu benshi, uyu  ni umunsi udasanzwe kuko bizihizaho isabukuru y’amavuko y’umwami wabo wabacunguye akabakura mu bubata bw’icyaha, bakabona ibyiringiro by’ubuzima bw’Iteka ryose. 

Mu Mujyi wa Kigali, abayobozi b’amadini n’amatorero atandukanye yizihiza uyu munsi, batanze ubutumwa bw’ibyiringiro, amahoro n’urukundo, basaba abitabiriye ibirori kwakira Yezu nk’Umwami n’Umukiza w’abatuye Isi bose.

Arikiyepisikopi wa Kigali Antoine Cardinal Kambanda wayoboye misa kuri Katedarali Gatolika yitiriwe Mutagatifu Michael, yavuze ko Noheli ari umunsi w’ingenzi cyane ku bakirisitu bose.

Yagize ati: “Noheli ni umunsi udasanzwe mu mateka y’Isi n’ijuru. Ni yo mpamvu ari umunsi w’ibyishimo ku bantu bose kuko Imana yashatse kutugaragariza urukundo idufitiye itwoherereza umwana wayo ikunda.”

Yakomeje avuga ko uyu munsi ari uw’umunezero ku bakirisitu bose no muri ibi bihe hari bamwe bugarijwe n’intambara, ubukene n’amakimbirane bibabuza amahoro n’ibyiringiro. 

Ati: “Umucunguzi wavutse uyu munsi aduha ukwizera kudashobora kunyeganyezwa n’icyo ari cyo cyose igihe twese duhuriye hamwe.”

Uretse Karidinali Kambanda, n’abandi bayobozi b’amadini n’amatorero atandukanye bakomoje ku gaciro k’uyu munsi mu mibereho y’abakirisitu.

Pasiteri Emmanuel Karegyesa wo mu Itorero Angilikani muri Paruwasi ha Remera, yashimangiye ko Yesu ari umucyo w’Isi ndetse ko abatuye Isi bakwiye kumwakira mu buzima bwabo. 

Yagize ati: “Ni Imana yavutse mu mateka yacu, Imana yavukiye mu byaha byacu. Ni Imana yaje kuduha urumuri mu bihe by’umwijima.”

Yongeyeho ati: “Bibiliya ivuga ko abantu bose bacumuye bityo ntibabona ubuntu bw’Imana kandi ko ibihembo by’ibyaha ari urupfu. Abantu bose bagombaga gupfa kandi nta byiringiro by’ubuzima bari bafite. Yesu yatubereye ibyiringiro.”

Karegyesa yasabye abakirisitu kwakira Yesu nk’Umukiza wabo, ati: “Nta kintu na kimwe kibaho Imana itaturokoramo. Ni cyo  Noheli ivuze. Yesu ni urukundo rw’Imana kuri twe. Ni ubuntu bw’Imana.”

Pasiteri Amos Kajuga wo mu Itorero Christian Life Assembly (CLA) riherereye i Nyarutarama mu Mujyi wa Kigali, na we yavuze ko ivuka rya Yesu ryari ugusohora kw’isezerano ry’Imana ry’iteka ryose, ari ryo kohereza umucunguzi w’Isi wavuzwe kenshi mu Isezerano rya kera. 

Yasabye abayoboke b’iryo torero kudatezuka ku masezerano y’Imana, ati: “Ibyo yasezeranye byose izabisohoza. Komeza ugume mu masezerano, izayasohoza. Rimwe na rimwe dushaka kubikora mu buryo bwacu, kuko dushaka kwemerwa na ba bandi twubaha cyane. Ariko ntitubona ubufasha dukeneye mu bantu, ahubwo Imana iravuze ngo bizasohora kuka nta kiyikoma mu nkokora.”

Yakomeje ashimangira ko iyo Imana ivuganye n’umuntu hari ubwo abamuzengurutse batabyumva, rimwe na rimwe bakamurwanya, ariko ibyo byose ngo ntibikuraho ko ibyo Imana yavuze bizasohora uko inzira yaba igoranye kose.

  • Imvaho Nshya
  • Ukuboza 25, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE