Kicukiro: Umuryango FPR Inkotanyi wujuje inzego zayo ukomoza kuri gahunda witegura

  • Imvaho Nshya
  • Ukwakira 30, 2023
  • Hashize amezi 7
Image

Ku gicamunsi cy’ejo ku Cyumweru tariki 29 Ukwakira 2023, Abanyamuryango ba FPR Inkotanyi mu Murenge wa Kicukiro mu Karere ka Kicukiro mu Mujyi wa Kigali, bahuriye mu Nteko Rusange y’Umuryango batora inzego zitandukanye zitari zuzuye.

Sudi Kiwanuka, Chairman w’Umuryango FPR Inkotanyi mu Murenge wa Kicukiro, yahamirije Imvaho Nshya ko habaye amatora agamije kuzuza inzego z’Umuryango.

Agaragaza ko hari abimutse abandi bagahabwa izindi nshingano. Ibi ngo ni mu rwego rwo gutegura gahunda ziri imbere zirimo izijyanye no kwamamaza.

Yagize ati “Kuzuza inzego ni ukugira ngo bidufashe gahunda dufite mu minsi iri imbere yo gutangira gukora dushishikaye, twamamaza Umuryango”.

Yasabye inzego z’Urugaga rw’urubyiruko gukanguka, ntirurangarire ibiyobyabwenge, ndetse n’abaruyobya mu zindi gahunda kugira ngo ejo rutazagwa mu mutego w’umwanzi.

Ati “Umwanzi afite inshingano nyinshi cyane z’uko yashimishwa n’uko urubyiruko rwacu rurangariye mu biyobyabwenge, rurangariye mu bitarufitiye akamaro, ibidafitiye akamaro igihugu kandi igihugu burya ni urubyiruko”.
Ahamya ko urubyiruko ari rwo ruzagira uruhare runini mu kwamamaza umukandida w’Umuryango FPR Inkotanyi mu matora y’Umukuru w’Igihugu umwaka utaha.

Sudi Kiwanuka, Chairman w’Umuryango FPR Inkotanyi mu Murenge wa Kicukiro, yahaye impanuro urubyiruko arusaba kwirinda ijambo ‘Iyo mbimenya’

Umuryango FPR Inkotanyi mu Murenge wa Kicukiro utangaza ko ikibatsi ufite, ari icyizere wifitiye n’icyufitiye Umuryango kubera gahunda z’iterambere umaze kugeza ku banyarwanda.

Uwase Césarie watorewe imiyoborere myiza mu rugaga rw’urubyiruko, avuga ko bazi neza ko ari bo mbaraga z’igihugu zubaka kandi vuba.

Agaragaza ko urubyiruko rwabohoye igihugu rwari munsi yabo ku myaka ariko ko biyemeje kuzakomereza aho bagereje.

Ati: “Dufite imbaraga n’ubwenge n’umutima byo gukorera igihugu.
Uruhare tuzagira mu matora ni runini kandi ibikorwa by’umukandida wacu birivugira ariko nk’urubyiruko tuzongera imbaraga mu bukangurambaga muri bagenzi bacu kugira ngo umukandida wacu azabe uwa mbere ariko n’ibikorwa byonyine birivugira”.

Nkurunziza Aimable, Perezida w’Urugaga rw’urubyiruko mu Murenge wa Kicukiro, avuga ko bafite umukoro munini kubera imbogamizi zigaragara mu rubyiruko zirimo, ibiyobyabwenge, inda ziterwa abangavu n’ibindi.

Agira ati: “Tugiye gushyiramo imbaraga kuko izi nshingano dutorewe ntabwo ari ukugira ngo tuze twicare ahubwo ni ukugira ngo dukorane imbaraga tuzitanga ku gihugu ndetse n’Umuryango wacu nkuko twabitorewe”.

Akomeza avuga ko bagiye kwishakamo izo mbaraga ku bijyanye n’ikibazo cy’imirimo, bishyira hamwe, barema uburyo bw’amakoperative no kwishakamo ibisubizo kandi ngo bagakora ubukangurambaga bwo kurwanya ibiyobyabwenge.

Perezida Paul Kagame aherutse kuvuga ko u Rwanda rwahisemo uburyo bwo kubaka igihugu ruhereye ku rubyiruko, aho guhera hejuru ku bakuze.

Umukuru w’Igihugu yatanze ubu butumwa mu kwezi kwa Kanama 2023, ubwo yari mu birori byo kwizihiza imyaka 10 ishize hatangijwe gahunda ya YouthConnekt.

Abanyamuryango ba FPR Inkotanyi barangizaga gutora, abashinzwe amatora bagatangira kubarura amajwi
Abagize Urugaga rw’urubyiruko ubwo bari bamaze gutorwa
Inzego zose z’Umuryango FPR Inkotanyi ziruzuye, intego akaba ari ukurushaho kwitegura ibikorwa by’Umuryango biteganyijwe umwaka utaha

KAYITARE JEAN PAUL

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE