Kicukiro: Umuryango FPR Inkotanyi wakemuye ikibazo cy’amazi apfa ubusa

  • Imvaho Nshya
  • Kanama 21, 2023
  • Hashize amezi 9
Image

Abanyamuryango ba FPR Inkotanyi bagize Komisiyo y’imibereho myiza mu Mujyi wa Kigali, batanze ibigega ku miryango 13 n’ubwisungane mu kwivuza ku bantu 500 mu Murenge wa Masaka, Akagari ka Gako mu Mudugudu wa Gicaca mu Karere ka Kicukiro.

Ni nyuma y’igikorwa cy’umuganda usanzwe wabaye mu mpera z’icyumweru gishize mu bikorwa byo kurwanya isuri, gusibura imiferege na za ruhurura no gutoragura imyanda yiganjemo cyane cyane itabora.

Musuhuke Benjamin, Komiseri w’imibereho myiza mu Muryango FPR Inkotanyi mu Mujyi wa Kigali, yashimiye Umurenge wa Masaka kubera umwihariko ugira mu mikoranire myiza n’abaturage.

Yavuze ko ibigega batanze biri mu rwego rwo kuzamura umuco wo kugira isuku.

Yagize ati: “Ibi bigega mwabonye n’ibindi bikorwa twakoze, ni ukugira ngo tuzamure umuco w’isuku ariko tukanabihuza n’ibihe tugiye kwinjiramo by’imvura.

Twaje gufatanya n’abantu bo mu mudugudu wa Gicaca kugira ngo dufatanye mu gutegura ibihe bikomeye by’imvura tugiye kwinjiramo no kuzamura imibereho myiza y’abaturage”.

Akomeza avuga ko bishyuriye mituweli abanyamuryango bahoze mu cyiciro cya Mbere.

Ati: “Twishyuriye Mituweli abaturage 500 ariko hibanzwe kuri ba banyamuryango bari mu cyiciro cya mbere. Ntitugishaka ko abanyamuryango baba mu bukene, ahubwo turashaka ko bifasha kuva mu bukene”.

Abanyamuryango bibukijwe ko nta vangura rikwiye kubaho ahubwo bagomba gukorera hamwe bityo imibereho myiza yabo ikaza ku isonga.

Mukamusoni Anathalie, umukecuru w’imyaka 85 wahawe ikigega, yashimye ubutwari bwa FPR Inkotanyi yabafashije gutaha mu rwababyaye.

Depite Imaniriho Clarisse

Uyu mukecuru ahamya ko bitewe n’ibyiza Perezida wa Repubulika Paul Kagame yabagejejeho, bazongera bakamushyigikira.

Ati “Nagize amahirwe ndataha mva muri Tanzania none barananyubakiye. Mbere batanze ibigega ariko njyewe njya mu nzu itagifite, noneho ndi umwe mu bahawe ikigega.

Nitwihangana byose tuzabibona, kuba twaratashye ni uko twihanganye kandi tukagira ubwenge”.

Mutsinzi Antoine, Chairman w’Umuryango FPR Inkotanyi mu Karere ka Kicukiro, atangaza ko hari ikibazo cy’uko amazi ava ku nzu z’abaturage mu gihe ngo yaba adafashwe neza yateza ikibazo mu bihe by’imvura.

Agira ati: “Baduhaye ibigega kandi twifuza ko tuzakomeza kugira ngo inzu zose zibashe kubibona”.

Mutsinzi yasabye Abanyamuryango ba FPR Inkotanyi mu Karere ka Kicukiro gukorera hamwe, bakumva ko n’ibitaraboneka ari impamvu z’ubushobozi ariko ko n’ibyabonetse bikwiye gusigasirwa.

Yasabye abanyamuryango gushyiramo imbaraga kugira ngo biteze imbere bityo babashe kwihaza mu biribwa birinda n’imirire mibi.

Yanditswe na KAYITARE JEAN PAUL

  • Imvaho Nshya
  • Kanama 21, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE