Kicukiro: Ubuzima bushaririye bw’umwana wasambanyijwe n’abo atazi

  • Imvaho Nshya
  • Ukwakira 9, 2023
  • Hashize amezi 8
Image

Iradukunda Yvette ni umwana wabyariye mu rugo afite imyaka 17. Icyo gihe yigaga mu mwaka wa kabiri w’amashuri yisumbuye ku Kigo cya St Palotti Gikondo mu Karere ka Kicukiro mu Mujyi wa Kigali.

Avuka mu Murenge wa Kigarama mu Karere ka Kicukiro. Yamenye ko atwite hashize amezi abiri.

Iyo avuga inkuru y’uko yatwaye inda, yitsa ku kuba yaragenderaga mu kigare kitari cyiza.

“[…] bikaba ngombwa tugenda tukarara, tukarara ahantu hanze. Abakobwa nakundaga kugendana na bo [sinzi ukuntu nabita mu ijambo rimwe] ariko nyine nta mico myiza bagiraga. Iyo umuntu umwita inshuti yawe ntabwo bamukubuza ngo wumve ko uwo muntu ari mubi koko”.

Abantu bajyaga bamubwira ko inshuti afite zitari nziza ariko we ntabyiteho.
Umunsi umwe bigeze kujya ahantu bararayo, baranywa barasinda nyuma yisanga atwite.

Mu Kiganiro n’Imvaho Nshya yagize ati “Icyo gihe twaryamanye n’abahungu. Sinamenya umuhungu twaryamanye kuko iyo umuntu yasinze nta kwigenzura aba afite, ntabwo navuga ngo naryamanye n’uyu cyangwa uyu, sinamenya uko mbigusobanurira”.

Ntiyamenye ko atwite ahubwo byatangiye yumva amafunguro yo ku ishuri amuhumurira nabi, igihe kiragera ijipo akajya ayambarira hejuru ariko ataramenya ibyo ari byo.

Ati “Umunsi umwe ni bwo naganirije inshuti yanjye nyibwira uko meze arangije arambaza ngo tuvuge ko udatwite?”.

Akomeza avuga ko hari igihe iwabo bari batetse igitoki, akiriye ahita akigarura, icyo gihe Se umubyara yari yiriwe mu rugo agakomeza kumucunga (Se amucunga) cyane ataramenya ibyo ari byo, hashize iminsi nibwo yamenye ko atwite.

Amaze kubimenya yabajije Se, ko aramutse amenye ko atwite niba yamwirukana cyangwa yamushishikariza kuyikuramo.
Se ngo yamusubije ko ibyaye ikiboze ikirigata ko ngo yabyihanganira.

Yabibwiye se kuko ari we biriranwaga mu gihe nyina yabaga yagiye mu kazi.

Se yabibwiye nyina bamarana ukwezi kose batavugana. Inzego z’ibanze mu Kagari atuyemo zarabimenye zihita zimujyana ku Rwego rw’Ubugenzacyaha nyuma yoherezwa ku kigo cya Isange One Stop Center ngo bakuremo inda, se arabyanga.

Ababyeyi be igihe cyarageze barabyakira batangira kujya bamuganiriza na we ariyakira ku buryo bamuhaye amafaranga atangira kujya ajya kurangura amagi akayazunguza, nyuma atangira gutanga serivisi za Mobile Money.

Umwana we yujuje imyaka ibiri. Kubera ubuzima budahambaye bwo mu rugo, igihe cyarageze umwana we ajya mu mirire mibi ajyanwa mu bitaro i Masaka amarayo ukwezi, nyuma yoherezwa ku kigo nderabuzima cya Gikondo, ubu yarakize.

Yabonye igitangaza ahuye n’Umushinga HHC

Avuga ko umunsi ubwo yari mu kazi Abajyanama b’ubuzima bagiye iwabo bamwandikisha mu mushinga ‘Hope and Homes for Children, HHC’.

Umuryango utari uwa Leta, HHC, avuga ko ku ikubitiro wamuhaye amafaranga y’ui Rwanda 150,000 ahita ajya kugura imyenda y’umwana yongera n’igishoro cya Mobile Money.

Ati: “Nagiye nzamuka, nyuma y’aho uyu mushinga undihirira amashuri niga mekanike kuri JOC, ubungubu ndi mu kazi”.

Ashimira HHC yamwishyuriye ishuri kuko ageze ku rwego rwo kwigurira icyo ashaka.

Ati “Ikintu nshimira HHC cya mbere, ni ukumpuriza kugira ngo numve ko ntari njyenyine, ndiyakira muri njyewe mbona ko hari n’abandi benshi dufatanyije”.

Isaro amaze gutwara inda, inshuti nyinshi yari afite zamucitseho, asigarana imwe yonyine ari na yo yaganirije uko amaze.

Asaba abangavu bagenzi be kwirinda ibishuko n’ibigare kuko nta kintu byabagezaho.

Ikintu cyamubabaje mu buzima bwe ni uko yavuye mu ishuri ariko ngo ikindi cyamushimishije ni uko igihe cyageze akabona ko atari wenyine.

KAYITARE JEAN PAUL

  • Imvaho Nshya
  • Ukwakira 9, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE