Kicukiro: Hahishuwe ko igihugu kitarabura abatabazi

  • KAYITARE JEAN PAUL
  • Gashyantare 1, 2024
  • Hashize amezi 4
Image

Umunsi w’Intwari ku nshuro ya 30 mu Karere ka Kicukiro wabereye hirya no hino mu midugudu, ku rwego rw’Akarere ubera mu Murenge wa Kigarama mu Mujyi wa Kigali.

Witabiriwe na Mukama Abbas, Umuvunyi wungirije ushinzwe gukumira no kurwanya ruswa, Omar Munyaneza, Umuyobozi Mukuru w’ikigo Gishinzwe amazi.

Kanyange Phoïbe, Umudepite mu Nteko Ishinga Amategeko Umutwe w’Abadepite, Lt Colonel (Rtd) Nyirimanzi Gerard umwe mu bagize Inteko y’Urwego rushinzwe Intwari z’lgihugu, Imidari n’Impeta by’Ishimwe (CHENO) n’inzego z’umutekano nabo bitabiriye uyu munsi.

Umuyobozi Nshingwabikorwa w’Akarere ka Kicukiro, Mutsinzi Antoine, yashimye Intwari zitangiye igihugu, avuga ko u Rwanda rwageze kuri byinshi biturutse mu bwitange Intwari zagaragaje

Abaturage basabwe gukora ibikorwa by’indashyikirwa no kurinda ibyagezweho.

Mu batanze ibiganiro bose bagarutse ku butwari ndetse banagaragaza ko hari icyizere cy’u Rwanda ruzakomeza kugira intwari.

Lt Col (Rtd) Nyirimanzi Gerard, avuga ko icyizere gihari kubera ko urubyiruko rwigira cyane cyane ku ntwari za vuba zabohoye igihugu, zigahagarika Jenoside yakorewe Abatutsi mu 1994.

Izo ntwari zari urubyiruko hakiyongeraho n’abana b’i Nyange.

Yagize ati “Iyo dushatse abantu bajya mu ngabo z’igihugu ariko ntiturabura, abantu binjiramo. Icyo ni icyerekana ko urubyiruko rwiteguye.

“Ntabwo turabura abatabazi. Ndashaka kubabwira ko abana b’ubu urebye ukuntu bashaka kujya mu nzego z’umutekano, si igisirikare gusa, noneho n’umwuka uriho, uhita ubibona ko kwitangira igihugu byabaye umuco”.

Mutsinzi, Umuyobozi Nshingwabikorwa wa Kicukiro, yavuze ko umunsi w’intwari uvuze ikintu kinini kuko urebye aho igihugu kigeze ngo nuko hari ababiharaniye.

Iyo uhereye ku ngabo zari iza RPA zahagaritse Jenoside yakorewe Abatutsi ni igikorwa cy’indashyikirwa.

Akomeza agira ati “Ni umwanya mwiza wo gusubiza inyuma amaso tukareba ibikorwa by’indashyikirwa byakozwe n’intwari.

Tunazirikana kandi uruhare rwacu nk’abaturage ndetse n’abayobozi n’icyo twakora kugira ngo nk’igihugu dukomeze dutere imbere, dukomeze tugere ikirenge mu cy’intwari”.

Itorero Indangamuco ry’Akagari ka Kigarama ni ryo ryasusurukije abitabiriye Umunsi w’Intwari z’Igihugu ku nshuro ya 30.

Umurenge wa Kigarama ufite Abanyerondo 240, ubwo hizihizwaga Umunsi w’Intwari bahawe imyenda y’imvura ibafasha mu kazi kabo.

Bamwe mu baturage n’abafatanyabikorwa b’Umurenge wa Kigarama bakoze ibikorwa by’indashyikirwa bashimiwe, nyuma yaho haba ubusabane bishimira Umunsi w’Intwari.

Abakora umwuga w’Irondo ry’Umwuga bahawe imyambaro ibafasha mu gihe cy’imvura
Umuyobozi Nshingwabikorwa wa Kicukiro, Mutsinzi Antoine
Umunsi w’Intwari mu Murenge wa Kigarama witabiriwe n’Ubuyobozi bwa Polisi mu Karere ka Kicukiro
Mukama Abbas, Umuvunyi wungirije ushinzwe gukumira no kurwanya ruswa (Uwa Mbere iburyo)
Lt Colonel (Rtd) Nyirimanzi Gerard umwe mu bagize Inteko y’Urwego rushinzwe Intwari z’lgihugu, Imidari n’Impeta by’Ishimwe (CHENO).

Amafoto: Ntwari Anaclet

  • KAYITARE JEAN PAUL
  • Gashyantare 1, 2024
  • Hashize amezi 4
TANGA IGITEKEREZO
Manzi mu z’Amarere says:
Gashyantare 2, 2024 at 6:31 am

Iyi nkuru ikoranywe ubuhanga n’ubunyamwuga; byerekana ko umurimo unoze kandi ukozwe neza nabyo biri mu bigize ubutwari twese duharanira kugira. Abanyamakuru bacu bakwiye guharanira ubutwari bavuga ukuri nyako kw’u Rwanda!

Andika igitekerezo

AMATEGEKO AGENGA IYANDIKA RY'IGITEKEREZO CYAWE