Kicukiro: Ambasade y’u Bushinwa mu Rwanda yifatanyije n’Abaturage mu muganda udasanzwe (Amafoto)

  • Imvaho Nshya
  • Ugushyingo 11, 2023
  • Hashize amezi 6
Image

Kuri uyu wa Gatandatu tariki 11 Ugushyingo 2023, Ambasade y’u Bushinwa mu Rwanda, Abashinwa bakorera mu Rwanda bifatanyije n’abaturage b’Akarere ka Kicukiro mu Murenge wa Masaka, mu muganda wasize bateye ibigi bya Pinus 2,000.

Ubutumwa buri ku rubuga rwa X rukoreshwa n’Akarere ka Kicukiro, buvuga ko itsinda ry’ Ambasade y’u Bushinwa mu Rwanda riyobowe na Amb. Wang Xuekun bakoze umuganda udasanzwe.

Ni umuganda witabiriwe n’Umuyobozi Nshingwabikorwa w’Akarere ka Kicukiro, Mutsinzi Antoine, inzego z’umutekano, ubuyobozi bw’Umurenge wa Masaka, urubyiruko rw’abanyeshuri ndetse n’abaturage batuye i Masaka.

Hatewe ibiti bya Pinus 2,000 ku musozi wa Kibande mu rwego rwo kurwanya isuri no kurengera ibidukikije.

Ambasaderi w’u Bushinwa mu Rwanda, Wang Xuekun, yavuze ko Umuryango w’Abashinwa mu Rwanda wishimiye umubano w’ibihugu byombi umaze imyaka 52 ari nta makemwa.

Umubano w’u Rwanda n’u Bushinwa ugaragarira mu bikorwa byinshi bitandukanye, birimo Ubuvuzi, Uburezi, Ubuhinzi, Ikoranabuhanga, Ibikorwa remezo bitandukanye birimo kuba haraguwe umuhanda Gahanga – Sonatubes – Kagera ureshya n’ibilometero 13.8.

Ni umuhanda watwaye agera kuri miliyari 65 z’amafaranga y’u Rwanda hamwe n’indi mihanda inyuranye.

Ibyo byose byiyongeraho amavomo ya Nayikondo 200 ari hirya no hino mu gihugu, yuzuye atwaye asaga miliyari 7 z’amafaranga y’u Rwanda, kandi abagezweho n’ibyo bikorwa bemeza ko byabagiriye akamaro.

Ambasaderi w’u Bushinwa mu Rwanda, Wang Xuekun na Mutsinzi Antoine, Umuyobozi Nshingwabikorwa w’Akarere ka Kicukiro batera igiti

KAYITARE JEAN PAUL

  • Imvaho Nshya
  • Ugushyingo 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE