Kicukiro: Abitabiriye Umurenge Kagame Cup basabwe kwirinda inzoga

  • KAYITARE JEAN PAUL
  • Mutarama 21, 2024
  • Hashize ukwezi 1
Image

Urubyiruko rwitabiriye imikino ya nyuma y’Umurenge Kagame Cup mu Karere ka Kicukiro mu Mujyi wa Kigali, rwasabwe kureka kunywa inzoga ahubwo rukitabira gahunda za Leta.

Byagarutsweho na Meya w’Umujyi wa Kigali, Samuel Dusengiyumva, kuri iki Cyumweru tariki 21 Mutarama 2024, kuri Sitade ya IPRC Kicukiro ubwo hakinwaga imikino ya Nyuma y’Umurenge Kagame Cup.

Ni umukino witabiriwe n’amagana y’urubyiruko, Meya w’Umujyi wa Kigali, Umuyobozi Nshingwabikorwa wa Kicukiro, Mutsinzi Antoine, inzego z’umutekano n’umuyobozi w’Ikipe ya Gorilla FC, Hadji Mudaheranwa.

Meya w’Umujyi wa Kigali Dusengiyumva yagaragaje ko Siporo n’imyidagaduro ari kimwe mu bintu nk’ubuyobozi bazakomeza gushyiramo imbaraga kugira ngo urubyiruko rubashe kugira ibyishimo bikwiriye bitarimo ibiyobyabwenge kandi rwizihirwe.

Yagize ati “Siporo n’imyidagaduro bizaha urubyiruko amahirwe yo kugira ngo impanop zanyu zigaragare. Kugira ngo ibyo bishoboke murasabwa kwirinda ibibangiza kandi turabibutsa gahunda ya Tunywe Less”.

Ubuyobozi bw’Umujyi bwasabye urubyiruko kureka inzoga kugira ngo rufatire urugero ku muhanzi Chris Easy. Dusengiyumva yeretse urubyiruko ko ntawe ushobora kuririmba yasinze.

Kugira ngo ukine umupira w’amaguru bisaba kuba utasinze cyangwa ngo ube wafashe ibindi biyobyabwenge.

Akomeza agira ati “Turagira ngo tubakangurire kwitabira gahunda zo kuzamura ubumenyi bwanyu”.

Yasabye abanyeshuri bitabiriye imikino y’Umurenge Kagame Cup gushyira imbaraga mu masomo biga.

Umwaka ushize igikombe Umurenge Kagame Cup cyatwawe n’Akarere ka Nyarugenge mu Mujyi wa Kigali.

Imikino ya nyuma y’Umurenge Kagame Cup yakinwe ku rwego rw’Akarere ka Kicukiro.

Izatsinze zizajya ku rwego rw’Umujyi wa Kigali izizatsinda zijye guhatana ku rwego rw’intara.

Mu bagabo Umurenge wa Masaka watsinze Umurenge wa Niboye 1-0.

Ni mu gihe mu bagore Umurenge wa Kigarama watsinze Umurenge wa Gatenga 2-0.

Meya w’Umujyi wa Kigali, Samuel Dusengiyumva ashyikiriza igikombe Ikipe ya Masaka yitwaye neza
Umuhanzi Chris Easy yataramiye urubyiruko rwitabiriye kureba amarushanwa Umurenge Kagame Cup
Umunyamabanga Nshingwabikorwa w’Umurenge wa Kigarama, Umubyeyi, yishimira gutsinda umurenge wa Gatenga mu bagore
Inzego zitandukanye zirimo n’iz’umutekano zitabiriye umukino wa nyuma Umurenge Kagame Cup mu Karere ka Kicukiro
Meya w’Umujyi wa Kigali, Samuel Dusengiyumva atangiza umukino

Amafoto: Ntwari Anaclet

  • KAYITARE JEAN PAUL
  • Mutarama 21, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE