Kicukiro: Abikorera basabwe kugira uruhare mu isuku

  • Imvaho Nshya
  • Ugushyingo 10, 2023
  • Hashize amezi 7
Image

Monique Huss, Umuyobozi Nshingwabikorwa wungirije w’Akarere ka Kicukiro, asaba abikorera kugira isuku kandi bakayitoza abana mu gihe bamaze kumenya ubwenge.  

Yabigarutseho ejo ku wa Kane mu bukangurambaga bw’isuku mu Murenge wa Kanombe. Ni nyuma yo gukora isuku mu Kigo Nderabuzima cya Busanza no ku isoko rya Gashyushya.

Monique yibukije abacururiza mu isoko rya Gashyushya ko isuku ari isoko y’ubuzima bwiza abibutsa gushyira imyanda ahabugenewe.

Yagize ati “Ubukangurambaga bw’isuku ni ubukangurambaga turimo gukangurira abaturage batuye Akarere ka Kicukiro, aho tubakangurira gushyira imbaraga mu kugira isuku mu rwego rwo kugira ngo isuku ibe umuco mu Karere kacu uhereye ku mwana muto utangiye kumenya ubwenge kugeza ku mukuru”.

Yavuze ko isuku ifasha kwirinda indwara ziterwa n’umwanda kandi ko isuku hose ihera kuri buri wese.

Intego Akarere gafite, n’uko buri muturage wese yongera kugira umuco wo gukaraba intoki.

Akomeza agira ati “Turakangurira abacuruzi kongera kugira za kandagira ukarabe zirimo amazi bakaba bafite n’isabune kugira ngo ibyo byubahirizwe, turabibutsa ko ibyo bagomba kubigiramo uruhare”.

Ubuyobozi bw’Akarere ka Kicukiro bushishikariza ibigo nderabuzima ndetse n’amashuri kugira isuku kandi ko umwana wese uvuye ku bwiherero yagombye kubona amazi n’isabune agakaraba.

Urugaga rw’Abikorera (PSF) mu Murenge wa Kanombe yemera ko abacuruzi bafite uruhare rukomeye mu gutuma habaho isuku kuko ngo bahura n’abantu benshi babagana.

Ndahiro Pascal uhagarariye abikorera mu Murenge wa Kanombe, yahamirije Imvaho Nshya ko abikorera bakorera muri karitsiye aho batuye kandi ko bahura n’abantu benshi.

Avuga ko uruhare rwabo nk’abikorera yaba ufite butike, hoteli n’ufite ibikorwa by’ubuvuzi bahura n’abantu benshi bityo ko ubutumwa bw’isuku bashobora kubugeza ku bantu benshi mu gihe babanje kumwumva mbere.

Ku rundi ruhande bishimira ko amasaha yo gutwara imyanda yubahirijwe kuko basabye ko yajya itwarwa nijoro kandi ngo barabyemerewe.

Yagize ati “Twasabye ko imyanda yajya itwarwa nijoro kandi barabyubahirije ubu birakorwa aho kugira ngo baze ku manywa gusa ariko noneho bisigaye bikorwa na nijoro”.

Yongeraho ko kugeza ubu nta mbogamizi bakigira kuri kampani zitwara imyanda yo mu ngo.

Ubukangurambaga bw’isuku mu Karere ka Kicukiro bwatangiye muri Gicurasi 2023, buzarangira muri Mata 2024.

Akarere ka Kicukiro kavuga ko indwara ziterwa n’umwanda zimaze kugabanuka.

Ubushakashatsi bw’Ishami ry’Umuryango w’Abibumbye ryita ku Buzima, OMS, bwo mu 2017 kimwe n’ubw’Ikigo cy’Igihugu cy’Ibarurishamibare ku mibereho y’abaturage (DHS) bwa 2014/2015 bwerekana ko mu Rwanda ingo 12% ari zo zifite aho gukarabira naho 4.4% by’ingo zose mu gihugu ni zo zari zifite ibikoresho byose n’isabune byifashishwa mu gukaraba intoki.

Minisiteri y’Ubuzima (MINISANTE) yatangiye gahunda y’imyaka itanu izarangira mu 2024 igamije kwigisha Abanyarwanda umuco wo gukaraba intoki no kongera ibikoresho by’isuku ahahurira abantu benshi.

KAYITARE JEAN PAUL

  • Imvaho Nshya
  • Ugushyingo 10, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE