Kicukiro: Abaturage baganirijwe amateka y’Ubutwari bw’Abanyarwanda

  • KAYITARE JEAN PAUL
  • Mutarama 28, 2024
  • Hashize ukwezi 1
Image

Abaturage mu byiciro bitandukanye bo mu Murenge wa Kicukiro mu Karere ka Kicukiro mu Mujyi wa Kigali, bakomeje ibikorwa by’ukwezi k’ubutwari. Ni mu gihe iminsi isigaye ngo abanyarwanda bizihize umunsi w’intwari, ibarirwa ku ntoki.

Insanganyamatsiko y’uyu mwaka wa 2024 igira iti “Ubutwari mu Banyarwanda, Agaciro Kacu”.

Nyuma yo gusura Ingoro y’Urugamba rwo guhagarika Jenoside, abayisuye baganirijwe na Karangwa Hussein amateka y’ubutwari bw’Abanyarwanda.

Mu myumvire y’Abanyarwanda kuva kera kugeza ubu, ubutwari burangwa n’ishyaka, gukunda igihugu, ubwitange, ibikorwa by’indashyikirwa kandi by’ingirakamaro.

Ubutwari kandi bunarangwa no kuba inyangamugayo, kuba umunyakuri, kudatinya kwanga ikibi no gushyigikira icyiza, gukorera mu mucyo, kugira ubumuntu no kurangwa n’ubupfura.

Ubutwari bw’Abanyarwanda babukomora mu burere bwatangirwaga mu muryango no mu Itorero.

Intwari z’u Rwanda ni zo zatumye u Rwanda rukiriho kandi rutaragizwe ingaruzwamuheto n’ibindi bihugu.

U Rwanda rwahanzwe n’abakurambere b’intwari bararwubaka ruvamo ubukombe.

U Rwanda rwagize Intwari zarwaguye zikanarurinda mu bihe binyuranye rwanyuzemo.

Rwatabawe kandi n’intwari z’u Rwanda zarubohoye ingoyi y’amacakubiri ndetse n’abaharanira iteka kuruteza imbere mu ngeri zose.

Mu rwego rw’Ukwezi k’ubutwari, ku gicamunsi cyo ku wa Gatanu tariki 26 Mutarama 2024, abaturage b’Umurenge wa Kicukiro biganjemo urubyiruko bitabiriye igikorwa cyo gusura ingoro y’amateka y’urugamba rwo guhagarika Jenoside iri Kimihurura mu Karere ka Gasabo.

Abantu 193 bitabiriye, basobanuriwe amateka y’urugamba rwo guhagarika Jenoside yakorewe Abatutsi muri 1994 ahereye ku Ngabo 700 zahoze ari iza RPA zari zaraherekeje abanyapolitiki mu ishyirwa mu bikorwa ry’amasezerano ya Arusha.

Abitabiriye ibikorwa by’ubutwari barimo ba midugudu, urubyiruko, abakozi b’Umurenge, abagize inzego z’umutekano, abanyamuryango ba RPF Inkotanyi mu byiciro bitandukanye ndetse n’abagize inama njyanama y’umurenge.

Bamwe mu bitabiriye ibiganiro byatangiwe ku Ngoro y’Urugamba rwo guhagarika Jenoside, biyemeje kurangwa n’ibikorwa by’indashyikirwa bagamije gutera ikirenge mu cy’intwari z’u Rwanda. 

Ibikorwa bijyanye n’ukwezi k’ubutwari mu Rwanda biracyakomeza mu Murenge wa Kicukiro mu Karere ka Kicukiro.

Amafoto: Umurenge wa Kicukiro

  • KAYITARE JEAN PAUL
  • Mutarama 28, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE