Kicukiro: Abangavu baterwa inda basabiwe kudacirwa imanza

  • Imvaho Nshya
  • Nzeri 19, 2023
  • Hashize amezi 8
Image

“Nta muntu ufite umutimanama ubona umwana w’imyaka 13 atwite ngo amucire urubanza, tureke kubavuga ahubwo tubavuganire”. Byagarutsweho na Habimfura Innocent, uyoboraUmuryango Hope and Homes for Children HHC wita bangavu baterwa inda z’imburagihe.

Ni mu bukangurambaga bwabereye mu Murenge wa Gikondo n’uwa Kigarama mu Karere ka Kicukiro mu mpera z’icyumweru gishize.

Uwo muryango watangaje ko abana b’abakobwa batwaye inda ari bato badakwiye gutereranwa ahubwo umuryango ukwiye kubitaho aho kubajugunya hanze.

Ibyo ngo bibagiraho ingaruka nko kujya mu muhanda, kutongera kwisanga mu muryango. Ubuyobozi bwa HHC buvuga ko abana batewe inda bakorerwa akato no kubwirwa amagambo atabubaka.

Habimfura yavuze ko abana bakwiye guhabwa urukundo n’ababyeyi babo. Yabikomojeho ubwo hasozwaga icyumweru cyahariwe ubukangurambaga bugamije kugira umuryango udaheza.

Insanganyamatsiko yagiraga iti ‘Duharanire umuryango udaheza, umuryango ubereye umwana’.

Ubuyobozi bwa HHC mu Rwanda bugaragaza ko umuntu ufite umutima adakwiye gucira umwana kandi umuryango uheza umwana atakabaye awukuririramo kuko hari abahoza ku nkeke abakobwa babyariye iwabo.

Abana babyariye iwabo basabwa kubyaza amahirwe bafite no gukoresha ubumenyi barimo guhabwa mu bigo by’imyuga bigiramo.

Habimfura akomeza agira ati: “Iyo tuvuze abana babyariye mu rugo tubafata nk’abana, icya kabiri tugafata abana babo nk’abana, icya gatatu tugafata nk’imiryango yabo ko ari yo yonyine yabafasha.

Yavuze kandi ko iyo ufashije umuryango, ukubaka umuryango, wa mwana wabyaye akiri muto asubirayo akabaho neza kandi akumva ntaho atandukaniye n’abandi n’umwana yabyaye tukamurinda icyatuma ajya mu muhanda”.

Abana babyariye iwabo, bahabwa ubujyanama bujyanye n’ubuzima bw’imyororokere bakanaganirizwa mu rwego rw’amahugurwa.

Ati: “Twari twatekereje gutanga ubujyanama mu kuvura ibikomere by’umutima. Tugatekereza kubikorera wa wundi wabyariye mu rugo kuko ni we wahungabanye, ni we wahawe akato, ni na we wigijweyo. Niba umwana yaragize ikibazo, uwa mbere wakamuhumurije ni umubyeyi we”.

Ku rundi ruhande, ubuyobozi bwa HHC mu Rwanda bwabwiye Imvaho Nshya ko mu myaka ibiri ishize hari icyahindutse ku bana.

Ati: “Urebye urwego rw’isuku rwonyine, ukareba uburyo aterura umwana mu gituza, ukareba uburyo amusetsa, uburyo umwana ari mu gituza cya nyina, na we atuje ukabagereranya n’igihe twabafataga nta huriro bifite.

Ku buryo tunabihagaritse imburagihe batasubira aho bahoze nkurikije isanamitima twabakoreye n’uko twabafashije gukira ibikomere”.

Mu buhamya bwa Mukamana Claudette (yahinduriwe amazina) watewe inda afite imyaka 14, ashima Umuryango HHC wamuhaye amahirwe yo gusubira mu ishuri akaba yiga gukanika imodoka.

Habimfura Innocent, Umuyobozi wa HHC (Uwa kabiri ibumoso), Umubyeyi Mediatrice, Umunyamabanga Nshingwabikorwa wa Kigarama n’inzego z’umutekano

Nyamara ariko ngo ababazwa n’uko bakomeza kwitwa indaya aho batuye muri karitsiye.

Ineza Yvonne (yahinduriwe amazina) wo mu Murenge wa Kigarama, wabyariye mu rugo afite imyaka 17, agira inama bagenzi be kwirinda ibishuko n’ibigare. Ati “Ikigare nta kintu cyakugezaho”.

Yahamirije Imvaho Nshya ko hari igihe yajyaga yumva ko inzoga ari cyo kintu cyamuha umutuzo nyuma akajya kuzinywa.

Ati “Kunywa inzoga nta kamaro kabyo kuko uruhuka iminota mikeya ariko nyuma ukicuza ibyo wari urimo”.

Ishimwe Frank, umwe mu bana b’abahungu batanze ubutumwa hifashishijwe imbyino zigezweho, we avuga ko hari abakobwa biyandarika ariko hakaba hari n’abahungu bashuka abakobwa.

Yavuze ko ubukangurambaga bwakozwe na HHC bwamufashije. Ati: “Bwaranyubatse kuko niba twari turi aha bakatubwira ngo umuryango ni ufite ibyishimo, ni uwitaye ku bana, nanjye bizamfasha mu gihe kizaza bityo nkazita ku bana banjye umuryango ukabaho wishimye”.

Kugira ngo bashiki babo badaterwa inda ari bato, kuri we ngo bakwirinda kugenda ijoro, kujya mu birori bya nijoro kuko ngo ibyo nabyo bikururira urubyiruko kunywa ibiyobyabwenge bikabaviramo gutwara inda.

Umunyamabanga Nshingwabikorwa w’Umurenge wa Kigarama, Umubyeyi Médiatrice, asobanura ko kugira umuryango ubereye umwana ari utarangwamo amakimbirane.

Inzego za Polisi mu Karere ka Kicukiro zitangaza ko kuba umwana aterwa inda bituruka ku kutanyurwa n’uko umuryango we ubayeho.

Ikindi ngo hari ababyeyi batita ku nshingano zabo ngo bamenye inshuti z’abana babo.

Imibare ya Minisiteri y’Uburinganire n’Iterambere ry’ Umuryango (MIGEPROF) ya 2021, igaragaza ko mu Karere ka Kicukiro abangavu 360 batewe inda.

Habimfura Innocent, Umuyobozi wa HHC mu Rwanda, yasabye ko abana batewe inda badacirirwa urubanza ahubwo bavuganirwe
Abana bagize amakipe yitwaye neza mu gihe cy’ubukangurambaga bwamaze icyumweru, bahawe imidali n’igikombe
Mukantwari Claudine yasabye abana b’abangavu kwirinda ababashuka agashimira HHC ifasha abana bahuye n’ibibazo ikabasubiza ubuzima

KAYITARE JEAN PAUL

  • Imvaho Nshya
  • Nzeri 19, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE