Kicukiro: Abana 130 bakoze ikizamini cya Karate

  • KAYITARE JEAN PAUL
  • Ukuboza 17, 2023
  • Hashize amezi 5
Image

Masaka Karate Kids Club ni karabu igizwe n’abana, ikorera mu murenge wa Masaka mu Karere ka Kicukiro mu Mujyi wa Kigali. Ubuyobozi bwa Federasiyo ya Karate mu Rwanda buvuga ko iyi karabu (club) ari yo ya mbere mu Rwanda ifite abana benshi.

Ubuyobozi bwa club bwahamirije Imvaho Nshya ko Masaka Karate Kids Club ari uruhongore rwa Karate kandi ko ifite icyerekezo cyo kuzakomereza no ku bakuru ntibe uruhongore gusa, kuko abana barakura.

Byagarutsweho kuri iki Cyumweru tariki 17 Ukuboza 2023 ubwo abana 130 bitabiraga ikizamini gituma bongera urwego rwa karate bariho bityo bakabona umukandara uruseho uwo bari bariho ariko bikajyana no gutsinda neza.

Ni umukino witabiriwe n’ababyeyi, abavandimwe b’abana bari mu kizamini, ubuyobozi bw’Umurenge wa Masaka ndetse na Shihan Niragire Samuel, Umuyobozi ushinzwe tekinike muri Federasiyo ya Karate mu Rwanda (FERWAKA) ari na we watangaje abatsinze.

Shihan ni izina rihabwa umuntu umaze kugera kuri dani ya 6. Shihan Niragire ashima iterambere Masaka Karate Kids Club imaze kugeraho.

Ashimangira ko iyi lub ari yo ifite abana benshi mu Rwanda.

Agira ati “Ikintu cyadushimishije cyane nka Federasiyo ya Karate mu Rwanda ni uko usanga n’ababyeyi bashyigikiye abana.

Ni ahantu hake cyane ushobora gusanga ababyeyi barenze 50 cyangwa 60 bari inyuma y’abana babo baje kureba ko baje mu myitozo, baje gukora ibizamini, ni ibintu bishimishije cyane”.

Ntakirutimana Pacifique, umuyobozi wa Masaka Karate Kids Club, avuga ko abakoze ikizamini ari 130 bityo ko ari benshi ugereranyije n’abakoze umwaka ushize.

Asobanura ko umukino wa Karate urimo kugenda wumvwa.

Ati: “Karate y’i Masaka iragenda itera imbere, ababyeyi barumva akamaro ka karate, imibare irivugira ndetse n’amanota babonye n’uburyo batsinzemo biragaragara”.

Avuga ko umukino wa karate uhenze bityo agasaba ababyeyi kugira uruhare rwabo batanga kugira ngo Masaka izagire Karate nziza mu Rwanda.

Akomeza agira ati: “Hari ibikoresho byinshi tuba dukeneye ngira ngo mwabonye ko twakoreye ku makaro hasi ariko ubundi mu mabwiriza ya karate tuba tugomba kuba dufite tapi yabugenewe.

Iyo tapi irinda impanuka zitandukanye, ibyo byose rero ababyeyi baje tugahuza imbaraga iyi karate yacu twazayiteza imbere”.

Yabwiye Imvaho Nshya ko Masaka Karate Kids Club ikorana neza n’Inzego z’ibanze cyane ko n’inyubako ishuri rikoreramo ari iz’ubuyobozi.

Nitanga Rwema Léon umwe mu bana bakinnye umukino wa Karate kandi akitwara neza, avuga ko hari byinshi yigira muri uyu mukino.

Ni umwe mu bana batsindiye umukandara w’icyatsi. Ahamya ko kwiga karate bizamufasha kwirinda.

Yishimira kandi ko ababyeyi be bamushyigikira mu guteza imbere umukino wa karate akina akunze.

Ati: “Nshimira ababyeyi banjye ko banshyigikira kandi bakanzana hano kwiga karate.

Karate Ntabwo nayikoresha ndwana n’abandi bana ahubwo izamfasha mu kugira ikinyabupfura no kutarwana”.

Avuga ko uyu mukino umufasha gutsinda mu ishuri kuko aza ku mwanya wa Kabiri aho yiga ku ishuri rya St Vincent Pallotti i Gikondo mu mwaka wa Kabiri w’amashuri abanza.

Mu izina ry’ubuyobozi bw’Umurenge wa Masaka, Rwaburindi Jocelyne, yashimiye ababyeyi bashyigikira abana babo.

Yasabye abana gukomeza kurangwa n’ikinyabupfura, ababwira ko umukino wa karate ugamije kumenya kwirwanaho.  

Abana 11 bangana n’ijanisha rya 100%, babonye umukandara wa maro bavuye ku mukandara w’Ubururu.

Abana 12 bangana n’ijanisha rya 100% bitwaye neza bahabwa umukandara w’Ubururu bavuye ku mukandara w’Icyatsi.

Shihan Niragire yatangaje ko abana 29 bahawe umukandara w’Icyatsi bavuye ku mukandara wa oranje.

Abana 5 bahawe amezi 3 yo kongera gukora ikizamini mu gihe hasibiye umwana Umwe.

Abana 31 bahawe umukandara wa Oranje mu gihe abana 4 basibiye bakagumana umukandara w’Umuhondo.

Umwana witwa Iriza Noella wari ufite umukandara w’Umuhondo yatsinze neza bimuha amahirwe yo gusimbuka umukandara wa Oranje, ahita yambara umukandara w’Icyatsi.

Abana bari ku mukandara w’umweru ari na wo ubanziriza indi mikandara muri Shotokani, bahawe amahirwe ko bazakorera rimwe ikizamini mu mpera z’ukwezi kwa Gashyantara 2024.

  • KAYITARE JEAN PAUL
  • Ukuboza 17, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE