Kenya: Iteka ryari ryashyizweho na Perezida Ruto ryateshejwe agaciro

Urukiko Rukuru mu gihugu cya Kenya rwatesheje agaciro Iteka rya Perezida Dr. William Samoei Ruto, ryo gukata umushahara mbumbe buri mukozi wa Leta amafaranga angana na 1.5% by’umushahara we kugira ngo ashyirwe muri gahunda yo gufasha abaturage ba Kenya batishoboye kubona inzu ziciriritse babamo.

Urukiko rwavuze ko gukata umushahara w’aba bakozi byaba binyuranyije n’Itegeko Nshinga rya Kenya.

Iyi gahunda yatangiye muri Nyakanga 2023, gusa ntiyavuzweho rumwe na bamwe mu Banyakenya kuko hari abavugaga ko ari umutwaro ku bakozi.

Umunyapolitiki utavuga rumwe n’ubutegetsi, Raila Odinga, we yateguye imyigaragambyo igamije kuyamagana.

Byageze aho iki kibazo cyagejejwe mu rukiko n’abarimo Senateri Okiya Omtatah, barusaba gutesha agaciro iri teka rya Perezida bavuga ko rihutaza uburenganzira bw’umukozi.

Nyuma y’ubusesenguzi bwakozwe, kuri uyu wa 28 Ugushyingo 2023 abacamanza b’urwo rukiko barimo Lawrence Mugambi, Christine Meoli na David Majanja, batangaje ko ritubahiriza ibikubiye mu Itegeko Nshinga rya Kenya kandi ko rivangura abakozi, mu gihe abatari aba Leta bo badakatwa ayo mafaranga.

Uyu mwanzuro wasomwe na Majanja ugira uti: “Gukatwa ku bantu bari mu kazi bazwi, abinjiza mu buryo bundi ntibibareba, biravangura, ntibishyira mu gaciro, nta shingiro bifite kandi binyuranyije n’Itegeko Nshinga.”

Uru rukiko rwategetse, Leta ya Kenya ko mu minsi 45 iba yahagaritse igikorwa cyo gukata umushahara w’abakozi ba Leta amafaranga yo kubakira inzu abatishoboye mu gihugu.