Kenya: Babiri baguye mu mpanuka y’indege

Indege ebyiri zagonganiye hagati muri Parike y’igihugu ya Kenya, i Nairobi, bituma abantu babiri bahasiga ubuzima nkuko polisi yabitangaje.

The East African yatangaje ko Polisi iri gukora iperereza ku cyateye impanuka y’indege ya Safarilink ndetse n’indege ya 99 Flying Club Flight i Nairobi.

Mu gitondo cyo kuri uyu wa Kabiri ni bwo indege ya Safarilink yerekezaga i Diani yasubiye inyuma, nyuma gato yo guhaguruka ku kibuga cy’indege cya Wilson ihita ikora impanuka.

Polisi yatangarije ikinyamakuru Business Daily ko abantu babiri bari mu ndege ya 99 Flying Club Flight bapfiriye mu mpanuka.

Ni mu gihe abagenzi 39 n’abakozi batanu bari mu ndege ya Safarilink bimuwe mu mutekano.

Kompanyi ya Safarilink nayo yemeje iby’ iyi mpanuka ivuga ko yabaye nyuma gato yo guhaguruka maze iza gusubira ku kibuga cy’indege.