Kazungu Denis, izina ryakuye imitima benshi mu 2023

  • NTAWITONDA JEAN CLAUDE
  • Ukuboza 27, 2023
  • Hashize amezi 2
Image

Umwaka wa 2024 ushobora kuzaba utandukanye kuri benshi mu bakundaga kwizera abo batazi bikagera n’aho babaherekeza mu ngo zabo, nyuma y’igikuba cyacitse muri uyu mwaka urimo kurangira ubwo hamenyekanaga uwitwa Kazungu Denis wishe abantu 14 akabashyingura aho yari acumbitse.

Ni we Munyarwanda wa mbere wanditswe mu mateka y’ibihangange ku rubuga rwa Wikipedia agaragazwa nk’umwicanyi wabigize umwuga wabikoreye abantu benshi kandi mu buryo buteguranywe ubuhanga bukomeye.

Kazungu yatawe muri yombi bwa mbere muri Nyakanga 2023 akekwaho ibyaha birimo gufata abakogwa ku ngufu, ubujura, ubwambuzi bukoresheje kiboko no gukoresha ibikangisho, ariko ararekurwa kubera ko hatabonekaga ibimenyetso bishimangira ibyo byaha.

Ku wa 5 Nzeri ni bwo yongeye gutabwa muri yombi ubwo habonekaga icyobo cy’aho yiyemerera ko yagiye ashyingura abantu 14 yishe mu bihe bitandukanye mu gikoni cy’inzu yakodeshaga.

Mu buhamya yatanze mu bugenzacyaha n’ubushinjacyaha, Kazungu w’imyaka 34 yavuze uko yajyaga ashuka abiganjemo abakobwa kugeza abagejeje iwe ari na ho bamwe byarangiraga abambuye ubuzima.

Ubushinjacyaha bwamusabiye ko yaburanishwa afunzwe by’agateganyo kubera impamvu z’uko bugikora iperereza no gukusanya ibimenyetso ku byaha akurikiranyweho, urukiko rurabyemeza ahabwa igifungo cy’iminsi 30 y’agateganyo.

Izindi manza zakanyujijeho mu mwaka wa 2023

Umwaka wa 2023 wabayemo imanza zitandukanye haba mu Rwanda ndetse n’Abanyarwanda baburanishijwe ku rwego mpuzamahanga.

Mu mahanga, u Bufaransa bwakomeje kuburanisha imanza z’abakekwaho uruhare muri Jenoside yakorewe Abatutsi nka Philippe Hategekimana witwaga Biguma ndetse na Dr. Munyemana Sosthène, uyu mwaka ukaba usoje imanza zabo ziyongereye ku zindi enye zaburanishirijwe zikanapfundikirirwa muri icyo gihugu.

Mu Rwanda na ho, ubutabera bwaratanzwe ku byaha binyuranye.  Muri Gicurasi, Urukiko Rwisumbuye rwa Nyarugenge rwakatiye igifungo cya burundu Assoumpta Mutatsineza w’imyaka 25 nyuma yo guhamwa n’icyaha cyo kugira uruhare mu rupfu rwa Twagirayezu Theogene wari umugabo we.

Ni icyaha cyakorewe i Kabeza mu Karere ka Kicukiro, mu kwezi k’Ugushyingo, icyaha kikaba cyaramenyekanye ubwo uwo mugabo yasangwaga mu nzu ye yakubiswe inyundo anaterwa icyuma.

Mutatsineza yafunganywe n’abagabo bane ari boAlphonse Uyisenga, Vianney Rubabaza, Evariste Ndizihiwe na Athanase Habiryayo bivugwa ko ari bo bakoranye muri ubwo bwicanyi. Urubanza rwaburanishirijwe aho icyaha cyakorewe, ndetse abaturage bakurikirana uko byagenze.

Muri Mutarama uyu mwaka, nanone kandi Bamporiki Edouard wari Umunyamabanga wa Leta ushinzwe Umuco muri Minisiteri y’Urubyiruko, yakatiwe imyaka itanu y’igifungo nyuma yo guhamwa n’icyaha cyo kwakira indonke.

Bivugwa ko Bamporiki ashobora kuba yarakiriye indonke ya miliyoni 5 z’amafaranga y’u Rwanda bivugwa ko yayahawe n’umucuruzi Norbert Gatera, amwizeza ko azamufasha agafungurirwa uruganda rw’inzoga rwari rwafunzwe n’ubuyobozi bw’Umujyi wa Kigali kubera ko rwakoreraga ahatuye abantu.

Urundi rubanza rwavuzwe cyane muri uyu mwaka ni urw’umushoramari  Nsabimana Jean uzwi nka Dubai, wisanze mu rukiko nyuma yo kubaka inzu zidakomeye zigatangira gusenyukira ku baziguze.

Izo nyubako zibarizwa mu Mudugudu w’Urukumbuzi mu Murenge wa Kinyinya, Akarere ka Gasabo, zavuzwe cyane mu bitangazamakuru binyuranye ndetse hari na bamwe mu bari abayobozi b’Akarere ka Gasabo ubwo zubakwaga bafunzwe.

Muri uyu mwaka hagiye haba n’izindi manza zinyuraye mu bice bitandukanye by’Igihugu, bishimangira imbaraga zishyirwa mu guharanira ubutabera busesuye mu Gihugu no hanze yacyo.

Mu zindi manza zavuzwe cyane muri uyu mwaka harimo urwa CG (Rtd) Gasana Emmanuel rwatunguye benshi, urwa Ishimwe DIeudonne wamenyekanye nka Prince Kid, urwa Twahirwa Moses no hanze hakaba haranaburanishijwe urwa Twahirwa Seraphin na Pierre Basabose baburanishirijwe mu Bubiligi muri uku kwezi.

  • NTAWITONDA JEAN CLAUDE
  • Ukuboza 27, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE