Kazoza wimitswe nk’Umutware w’Abakono yasabye imbabazi Abanyarwanda

  • Imvaho Nshya
  • Nyakanga 23, 2023
  • Hashize amezi 10
Image

Kazoza Justin uheruka kwimikwa nk’Umutware w’Abakono bigateza impagarara kuko byagaragaye ko bisenya ubumwe bw’Abanyarwanda yasabye imbabazi ku makosa yakoze hamwe n’abandi bagenzi be bafatanyije gutegura ibyo birori. 

Kazoza yasabiye imbabazi mu Nama Nyunguranabitekerezo yahuje abanyamuryango ba RPF Inkotanyi bagera kuri 800 barimo Abakada n’Abayobozi ku rwego rw’Igihugu, baganira ku bibazo bitandukanye bibangamiye ubumwe bw’Abanyarwanda. 

Iyo nama iteraniye i Rusororo ku Ngoro y’Umuryango RPF-Inkotanyi yatangiwemo ikiganiro cyihariye gisuzuma ibibazo bitandukanye biza gufatirwamo imyanzuro ihamye igamije gukomeza guteza imbere ubumwe bw’Abanyarwanda. 

Kazoza na we ari mu bafashe umwanya asaba imbabazi, avuga ko we na bagenzi be bakoze amakosa bagategura ibyo birori batabanje gushishoza no kureba kure ngo birinde igikorwa nk’icyo gifite ingaruka mbi ku bumwe bw’Abanyarwanda.

We na bagenzi be bitabiriye ibyo birori byabaye ku ya 9 Nyakanga mu Karere ka Burera, bashimiye Perezida wa Repubulika Paul Kagame  akaba na Chairman w’uyu muryango ku bw’imbabazi yabahaye.

Yagize ati: “Kazoza Justin yagize ati: “Ndasaba imbabazi abanyamuryango ba RPF, ngasaba imbabazi ubuyobozi bwacu yaba ubw’igihugu ndetse n’ubwa RPF by’umwihariko, nkanasaba imbabazi abo natumiye bakagwa mu makosa batabigambiriye, nabitewe no kudashishoza ndetse no kutareba kure ngo menye ingaruka ibyakozwe byo kwimika umutware w’abakono bishobora guteza.” 

Minisitiri w’Ubumwe bw’Abanyarwanda n’Inshingano Mboneragihugu Dr. Bizimana Jean Damascène, yasabye buri wese kuba maso kuko nubwo igipimo cy’ubumwe mu Banyarwanda kigeze kuri 94% hakiboneka ibikorwa bibubangamiye buri wese akwiye kwirinda ndetse aho anabibonye akabyamagana.

Yagaragaje ko kwiremamo ibice n’amatsinda ari imigirire itangira buhoro buhoro igakura kandi ko iyo idakumiriwe mu maguru mashya igira imbaraga ikaba ishobora kuganza bityo buri wese akaba akwiye kubikumira no kubyirinda.

Abanyamuryango ba RPF-Inkotanyi bagaragarijwe ko ubumwe ari urugendo rusaba kudacogora. 

Kuri RPF-Inkotanyi, ubumwe ni inzira y’icyerekezo kimwe (one-way) itagira amahitamo yo gusubira inyuma. Abanyamuryango bashimangiye ko nta gishobora kuvogera iyo nzira y’ubumwe barebera. 

Agaciro Umuryango RPF-Inkotanyi uha ubumwe bw’Abanyarwanda gashimangirwa n’Umuyobozi Mukuru wayo Perezida Paul Kagame muri Manifesto ya 2017-2024. 

  • Imvaho Nshya
  • Nyakanga 23, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE