Kayonza: Urubyiruko rwubakiye inzu umuryango utishiboye

  • Imvaho Nshya
  • Ugushyingo 12, 2023
  • Hashize amezi 3
Image

Ngirabera Laurent, umusaza w’imyaka 74 yashimiye urubyiruko rw’abakorerabushake rwubakiye inzu umuryango we nyuma yuko iyo babagamo isenywe n’ibiza muri Gicurasi 2023 bakabaho banyagirwa kugeza igihe urwo rubyiruko ruhagobokeye.

Iyo nzu y’ibyumba bitatu n’uruganiriro yuzuye itwaye miliyoni 1 n’ibihumbi 650 by’amafaranga y’u Rwanda, yayishyikirijwe ku wa Gatanu tariki ya 10 Ugushyingo 2023 ubwo mu Krere ka Kayonza hazihizwaga Isabukuru y’imyaka 10 y’ubukorerabushake.

Ngirabera Laurent atuye mu Mudugudu wa Karama, Akagari ka Musumba mu Murenge wa Nyamirama, Akarere ka Kayonza. Yavuze ko ubwo inzu ye yasenywaga n’ibiza, abayobozi b’Umudugudu bamwegereye bakamusabira ubufasha mu Kagari ka Musumba no mu Murenge wa Nyamirama kubera ko umuryango we wavirwaga cyane.

Yagize ati: “Imvura yaguye mu kwezi kwa Werurwe na Mata 2023, yari nyinshi bituma amabati yari ayiriho atoboka turavirwa. Ibi byatumye n’inkuta zivirwa ubundi uruhande rumwe ruragwa ku buryo inzu yose yariri hafi kujya hasi.

Imvura yose yaragwaga amazi akuzura mu nzu, ubwo mu buriri bikaba ibibazo bikomeye. Muri Gicurasi inzu yari iri hafi hasi kuko abaturanyi bayitegaga ibiti ngo itagera hasi neza neza, ari na bwo ku Mudugudu badutangiye raporo ku Murenge inzu itangira kubakwa.”

Umufasha we Mukamparirwa Laurence yavuze ko imibereho y’umuryango itari myiza bitewe n’ubumuga bw’ingingo z’amaguru umugabo we afite butari gutuma agira imbaraga n’ubushobozi bwo kuvugurura.

Yagize ati: “Umutware wanjye afite ubumuga yahuye nabwo ari umusore ku buryo inzu yubatse icyo gihe atari ku bona uko ayivugurura ndetse n’indwara ya diabetes. Nubwo dufite abana ariko nta bushobozi bafite bwari gutuma banyubakira inzu. Nanjye nashakaga ubushobozi bwo kwishyurira abana amashuri n’ibitunga umuryango wanjye ariko imbaraga zikambana nke. Inzu yarashaje kugeza aho imvura igwa tukajya tujya mu nguni z’inzu n’ibiryamirwa ariko n’aho bikarangira amazi atugezeho.”

Mukamparirwa yakomeje avuga ko ashimira ibikorwa by’urubyiruko rwatekereje gukura mu kaga umuryango we rukamwubakira inzu.

Yagize ati: “Mu mvura yo mu kwa Gatanu yaradusenyeye tukaba mu nzu imeze nka nyakatsi, ariko hashize iminsi mike tubona urubyiruko ruraje rutangira kubumba amatafari ndetse ubu inzu twayitashye. Ubu ndanezerewe kuko umuryango wange ugiye ahabona. Ubu intego ni ukuyibungabunga neza kandi tuzayifata neza.”

Umuhuzabikorwa w’Abakorerabushake mu Karere ka Kayonza Matabaro Costa, yavuze ko ibikorwa byakozwe mu kwezi k’ubukorerabushake mu kwezi k’Ukwakira bakoze ibikorwa bifite agaciro karenga miliyoni 19 z’ y’amafaranga y’u Rwanda.

Yagize ati: “Twubakiye abatishoboye inzu, inzu zasanywe ni 35 n’ubwiherero 120, ndetse no gukurungira inzu zitandukanye. Twafashe umwanzuro wo gufasha uyu muryango bitewe n’urubyiruko rwo mu Murenge rwatugejejeho iki kibazo dufata umwanzuro gutyo. Twishimira ko ibikorwa dukora bifasha Abanyarwanda kandi bikabateza imbere bikazana ingaruka nziza.”

Umuyobozi wungirije ushinzwe imibereho myiza y’abaturage mu Karere ka Kayonza Harelimana Jean Damascene, yavuze ko kuva ubukorerabushake bwatangira mu 2013 hari impinduka zigaragara z’ibikorwa urubyiruko rw’abakorerabushake bakoze, byagize umumaro ku baturage b’Akaree n’Abanyarwanda muri rusange.

Yagize ati: “Impinduka zirahari kuko ni inshingano nk’ubuyobozi gufasha umuturage ufite amikoro make n’ibibazo ndetse hari n’igihe kigera hakaba ibikorwa bisaba inkunga y’amafaranga nukuvuga ingengo y’imari, iyo hajemo ibikorwa abakorerabushake bakora ni ubwunganizi kuri iyo ngengo y’imari bigatuma tubasha kwihuta mu gukemura bya bibazo bibangamira imibereho myiza y’abaturage. Icyo dusaba urubyiruko rw’abakorerabushake rero ni ugukomeza umurava no gukora ibikorwa bihindura imibereho y’abaturage.”

Mu kwizihiza imyaka 10 y’ibikorwa by’ubukorerabushake mu Karere ka Kayonza, hishimirwa kuba umubare w’abakorerabushake waravuye ku bihumbi 27 ukagera ku 45,753 muri uyu mwaka.

Ibyakozwe n’urubyiruko rw’abakorerabushake mu myaka 19 bifite agaciro karenga miliyari eshatu z’amafaranga y’u Rwanda, bikaba birimo kubaka inzu nshya 37, gusana 749 zishaje, ubwiherero 11,403, guhinga uturima tw’igikoni 29,977 guca imirwanyasuri kuri hegitari 89, gutera ibiti 32,700; kugarura abana mu ishuri 1,709; gusana no gusibura kilometero 62 n’ibindi.

Uyu muryango uri mu munezero ukomeye nyuma yo kugobokwa n’urubyiruko

NSHIMIYIMANA FAUSTIN

  • Imvaho Nshya
  • Ugushyingo 12, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE