Kayonza: Umurenge wa Murundi waje ku isonga mu kwesa imihigo

  • NTAWITONDA JEAN CLAUDE
  • Nyakanga 13, 2022
  • Hashize imyaka 2
Image

Umurenge wa Murundi washimiwe kuba warahize iyindi yose mu mwaka w’imihigo wa 2021/2022, muri gahunda ya Ejo heza, gutanga ubwisungane mu kwivuza, kugira Umudugudu utarangwamo icyaha, irondo rikora neza.

Uyu Murenge ufite abaturage babaga mu cyiciro cya 1 n’icya 2 biteje imbere basaba gushyirwa mu cyiciro cya 3.

Ni igikorwa cyabaye ku gicamunsi cyo kuri uyu wa Kabiri, ubwo Abagize Komite Nyobozi bitabiriye Inteko z’Abaturage, cyahujwe no gushimira no guhemba Umudugudu, Akagari ndetse n’Umurenge witwaye neza mu kwesa imihigo ya 2021/2022.

Akagari ka Nkondo mu Murenge wa Rwinkwavu ni ko kabaye indashyikirwa mu  mwaka w’imihigo wa 2021/2022. Nkondo yahize utundi Tugari mu kugira itorero rikora neza, kwikemurira ibibazo no guhemba Imidugudu yitwara neza.

Muri ako Kagari bafite umwihariko wo gukora ingendo shuri no gukora umwiherero w’abayobozi bagamije guteza imbere imibereho myiza y’umuturage.

Umudugudu wa Nkondo II mu Kagari ka Nkondo mu Murenge wa Rwinkwavu washimiwe kuba warabaye indashyikirwa mu Midugudu yose. Uyu Mudugudu ufite umwihariko wo kuba ufite itorero rikora neza, kugira ikimina cy’ibiramba bizigamiramo amafaranga abafasha muri gahunda zitandukanye.

Uyu Mudugudu ukaba waresheje umuhigo wo kuba warasaguye miliyoni 11 ubwo abatuye uyu mudugudu bari bamaze gutanga ubwisungane mu kwivuza 2021/2022.

Umuyobozi w’Akarere ka Kayonza, John Bosco Nyemazi wifatanyije n’abaturage bo mu Mudugudu wa Gakoma, Akagari ka Buhabwa mu Murenge wa Murundi, yabashimiye ibyiza bagezeho byatumye Umurenge wabo wa Murundi uza ku mwanya wa mbere birimo kwitabira gutanga ubwisungane mu kwivuza ku gihe, kwizigamira muri Ejo heza, kwicungira umutekano n’ibindi.

Yabasabye gukomeza gushyira ingufu mu bikorwa by’imihigo kugira ngo n’imihigo ya 2022/2023 bazabashe kuyesa bagaruke ku mwanya wa mbere.

Umuyobozi w’Akarere ka Kayonza, John Bosco Nyemazi ashimira abatuye Umurenge wa Murundi ko waje ku isonga mu kwesa imihigo 2021-2022, abasaba kutazasubira inyuma (Foto Akarere ka Kayonza)
Akagari ka Nkondo ni ko kabaye aka mbere mu kwesa imihigo mu mwaka wa 2021-2022 (Foto Akarere ka Kayonza)
  • NTAWITONDA JEAN CLAUDE
  • Nyakanga 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE