Kayonza:  Imiryango 32 itishoboye yashyikirijwe inka muri gahunda ya Girinka

  • NSHIMIYIMANA FAUSTIN
  • Ugushyingo 28, 2023
  • Hashize amezi 6
Image

Ku wa Mbere tariki ya 27 Ugushyingo 2023, ubuyobozi bw’Akarere ka Kayonza bwashyirije inka imiryango 32 itishoboye mu rwego rwo kubakura mu bukene no kuzamura imibereho myiza y’abaturage.

Bamwe mu baturage bahawe inka bashima Leta ihora ishakira abaturage bayo imibereho myiza binyuze muri gahunda ya Girinka, bityo ko inka bahawe zizafasha imiryango yabo kugera ku iterambere rirambye, cyane cyane ko zizabafasha kongera umusaruro.

Ngoga Jean Pierre yavuze ko iterambere ryari rimaze kudindira mu muryango we ariko akaba afite intego yo kuyibyaza umusaruro no kuyitaho.

Yagize ati: “Uyu munsi nashimishijwe no kwisanga ku rutonde rw’abaturage bahabwa inka, umuryango wanjye uzaba ufite imbaraga zo kwihuta mu iterambere kubera ko ugiye guca ukubiri n’imirire mibi. Ifumbire iva ku nka nahawe izajya imfasha mu kubyaza umusaruro uturima tw’igikoni natangiye guhinga.”

Nzarurinda Straton utuye i Gakuruzo na we washyikirijwe inka, ashimira imiyoborere myiza yimakajwe na Perezida wa Repubulika, yavuze ko agiye kwiteza imbere ahereye ku muryango we.

Yagize ati: “Ndashimira Umukuru w’Igihugu Perezida Paul Kagame, mu busanzwe ni bwo bwa mbere ngiye korora inka, nahingaga ariko simbone umusaruro kubera kutabona ifumbire y’imborera. Kuba mbonye inka bigiye kumfasha kwihaza mu biribwa ndetse n’abana banjye babone amata yo kunywa.”

Umuyobozi w’Akarere ka Kayonza Nyemazi John Bosco, yasabye abahawe inka kuzifata neza no kuzitaho kugira ngo zizatange umusaruro kandi na bo baziture bazoroze abandi bakirinda kuzigurisha.

Yagize ati: “Icyo dusaba abaturage ni ukuzifata neza kuko tuzibahaye zikingiwe kandi ziri mu bwishingizi. Abaturage baziteho kandi bazikurikirane, inka yagira ikibazo bakabimenyesha  veterineri kugira ngo azikurikirane kare, ikindi tugasaba aba baturage kutagurisha izi nka kuko twagiye tubona abaturage bazigurisha kandi zitemewe. Aborojwe na bo baharanire kuzitura kuko inka zizagenda zorozwa n’abandi.”

Imiryango itishoboye yashyirijwe inka ituruka mu Mirenge ya Mukarange, Gahini, Ruramira, Nyamirama na Kabarondo.

Ubuyobozi bw’Akarere Ka Kayonza butangaza ko kuva gahunda ya Girinka yo koroza imiryango itishoboye yatangira muri 2006, imaze gufasha imiryango myinshi kwikura mu bukene, umukamo ukaba warazamutse ku buryo bushimishije, ndetse n’imibereho y’abazitunze irushaho kuba myiza.

  • NSHIMIYIMANA FAUSTIN
  • Ugushyingo 28, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE