Kayonza: Bategesha 8000 Frw baremye isoko ribegereye muri Gatsibo

  • Imvaho Nshya
  • Ugushyingo 2, 2023
  • Hashize amezi 4
Image

Bamwe mu baturage bo mu Murenge wa Murundi mu Karere ka Kayonza, bavuga ko kuba nta soko bagira mu Murenge wabo bituma batabona aho bajyana umusaruro wabo ku buryo bibasaba gukora ingendo ndende bajya kurema amasoko yo mu Karere ka Gatsibo zikabateza igihombo.

Abo baturage bakunze kugemura umusaruro ukomoka ku buhinzi n’ubworozi,  barasaba ubuyobozi bw’Akarere ka Kayonza kubakemurira iki kibazo kuko kwambuka Akarere bajya kugurisha umusaruro wabo muri Gatsibo bibavuna, aho nibura umuntu ategesha amafaranga y’u Rwanda atari munsi ya 800  kugenda no kugaruka.

Tuyisenge Jean Claude utuye mu Kagari ka Buhabwa mu Murenge wa Murundi, yatangarije Imvaho Nshya ko iyo upanze kujya ku isoko uteganya n’amatike menshi kuko n’umumotari uzana ibyo wahashye ari byinshi aguca menshi, cyane ko nta modoka zigera muri uwo Murenge.  

Yagize ati: “Dukenera kurema isoko ariko tukabura aho duhahira n’aho tugurishiriza ibyo tweza. Isoko ritwegereye ni irya Rwagitima riri mu Karere ka Gatsibo kandi kugerayo ni ibihumbi bine kuri moto, nta modoka zijyayo ngo abe ari zo tuzajya dutega kugira ngo amatike abe ari make. Akenshi iyo abayobozi b’Akarere baje inaha turabibibutsa ariko imyaka ibaye myinshi nta gisubizo”.

Mukeshimana Florence na we yagize ati: “Kuba nta soko tugira biduteza igihombo, ibaze ugiye kugura ibintu bihwanye n’ibihumbi icumi by’amafaranga y’u Rwanda, ugakoresha amatike y’ibihumbi umunani; ubwo se koko si ikibazo kituremereye? Turema irya Rwagitima kuko ribamo ibyo twifuza byose. Hari irindi riri mu Murenge wa Rukara ariko nta bintu byinshi bibamo kandi n’aho ku modoka n’amafaranga 1,000 ubwo iyo uyibuze utega moto ya 2,500 kugenda gusa. Twifuza ko ubuyobozi bwadutabara bukatwubakira isoko natwe ibikorwa remezo by’iterambere bikatugeraho tukiteza imbere”.

Umuyobozi w’Akarere ka Kayonza, Nyemazi John Bosco, yavuze ko iki kibazo bakizi ndetse kiri gushakirwa umuti ku bufatanye na Pariki y’Igihugu y’Akagera yemeye kuba umufatanyabikorwa.

Yagize ati: “Isoko rya Murundi twavuga ko twabiganiriye kandi hari imishinga tuhakora dufatanyije na Pariki y’Akagera, turabizi ko abaturage baryifuza ariko turi mu biganiro byo kureba uko twabona igisubizo kirebana no kuryubaka bidatinze.”

Uretse kuba barema isoko rya Rwagitima riri mu Karere ka Gatsibo bakishyura urugendo rwa moto rubaremereye, bavuga ko n’iribegereye rya Karubamba riri mu Murenge wa Rukara na ho bishyura moto ya 5000 by’amafaranga y’u Rwanda kugenda no kugaruka,  ku buryo byagorana ko witeza imbere mu gihe washoye cyangwa wagiye guhaha ukanatakaza angana gutyo ku rugendo.

Bavuga ko isoko riramutse ribonetse ryabahindurira ubuzima ndetse n’ubuhahirane bwabo n’ahandi bukarushaho koroha cyane ko abajya bakora ingendo ari abacuruzi ariko abaturage bakabonera ibyo bakeneye byose bugufi.

Abaturage bo mu Murenge wa Murundi bavuga ko bahangayikishijwe cyane no kutagira isoko iwabo kuko bahomba byinshi

NSHIMIYIMANA FAUSTIN

  • Imvaho Nshya
  • Ugushyingo 2, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE