Kayonza: Barasabwa gutanga amakuru y’ahakiri imibiri itarashyingurwa mu cyubahiro

  • NTAWITONDA JEAN CLAUDE
  • Mata 13, 2022
  • Hashize imyaka 2
Image

Umuyobozi w’Akarere ka Kayonza John Bosco Nyemazi yasabye ababa bazi ahaherereye imibiri y’abishwe muri Jenoside yakorewe Abatutsi mu 1994, gutanga amakuru kugira ngo ishyingurwe mu cyubahiro.

Minisitiri w’Ubumwe bw’Abanyarwanda n’Inshingano Mboneragihugu Dr. Bizimana Jean Damascene, Guverineri w’Intara y’Iburasirazuba CG Gasana K. Emmanuel, intumwa za rubanda, inzego z’umutekano, ubuyobozi bw’Akarere n’abandi bifatanyije n’abaturage mu gikorwa cyo kwibuka ku nshuro ya 28 Jenoside yakorewe Abatutsi no kunamira abasaga 8000 bashyinguye mu rwibutso rwa Jenoside rwa Mukarange.

Meya yabigarutseho ku italiki ya 12 Mata 1994, ubwo hibukwaga Abatutsi bari baturutse mu bice bitandukanye bahungiye kuri Paruwasi ya Mukarange bakicwa bagabweho igitero n’interahamwe ndetse n’abasirikare.

Meya yavuze ko muri aka Karere hakiri imibiri myinshi y’Abatutsi itaraboneka ngo ishyingurwe mu cyubahiro, atanga urugero rw’Abatutsi basaga 200 biciwe kuri EAR Nyagatovu kugeza ubu imibiri yabo ikaba itaraboneka ngo ishyingurwe mu cyubahiro.

Ati: “Ndasaba abafite amakuru y’ahari imibiri y’abazize Jenoside yakorewe Abatutsi mu 1994 itarashyingurwa kuyatanga kugira ngo nayo ishyingurwe mu cyubahiro”.

Yavuze kandi ko harimo kubakwa inzu y’amateka yaranze Akarere ka Kayonza mu gihe cya Jenoside.

Ati: “Mu rwego rwo guha agaciro abacu bazize Jenoside yakorewe Abatutsi mu 1994, turimo kubaka Urwibutso rwa Jenoside ku rwego rw’Akarere ndetse n’inzu y’amateka yaranze Akarere ka Kayonza mu gihe cya Jenoside yakorewe Abatutsi mu 1994.

Turi mu gikorwa kandi cyo kwandika igitabo kirimo aya mateka hashingiwe ku buhamya bukomeje kugenda butangwa; ibi bikazadufasha kubumbatira amateka mu gihe kinini kiri imbere.”

Yongeyeho ati: “Kuri iyi taliki ya 12 Mata 2022, turibukira hano mu Murenge wa Mukarange, kuri Paruwasi Gatolika ya Mukarange ahiciwe Abatutsi bari bahahungiye baturutse mu bice bitandukanye harimo n’abaturutse i Murambi kwa Gatete bakeka ko baharohokera”.

Meya yagaragaje bamwe mu bagize uruhare mu kwica Abatutsi harimo Interahamwe zarimo abakoze igisirikare bafite grenade n’imbunda zirangajwe imbere Senkware Celestin wari Burugumesitire wa Komini Kayonza na komanda wa jandarumori bateye hano kuri Paruwasi mu bihe bitandukanye kugeza ubwo bishe barashe Padiri Jean Bosco Munyaneza.

Yanagarutse ku Batutsi bahungiye muri Parike y’Akagera interahamwe zikabasangayo, abandi bakaribwa n’inyamaswa ubwo bakekaga ko bashobora kuhakirira no kuhabona inzira yambuka muri Tanzaniya.”

Hashyinguwe mu cyubahiro imibiri 10

Kuri uyu munsi kandi, mu rwibutso rwa Mukarange hashyinguwe mu cyubahiro imibiri 10 y’abazize Jenoside yakorewe Abatutsi mu 1994 yakuwe mu Mirenge ya Mukarange, Kabarondo na Mwiri. Uru rwibutso rukaba rusanzwe rushyinguyemo imibiri isaga 8000.

Uwonkunda Renilde uhagarariye imiryango yashyinguye we yagize ati: “Ndashima Imana yaturinze uyu munsi tukaba dushobora guhagarara mu mwanya w’abacu. Ndashimira cyane Inkotanyi zitanze kugira ngo barokore abicwaga, hari benshi zasanze tugeze ku rwobo turebana n’urupfu”.

Yongeyeho ati: “Mboneyeho umwanya wo gusaba abakuze gusobanurira urubyiruko amateka y’igihugu cyacu kugira ngo hatazagira uyagoreka ntibamenye ibyatubayeho.”

Yashimye uburyo Leta ibitaho. Ati: “Turashimira Leta y’U Rwanda n’Abanyarwanda uburyo badahwema kuduha umwanya wo kwibuka abacu” Dukomeze Twibuke twiyubaka”

Jenoside ntiyabaho Leta itabigizemo uruhare

Minisitiri w’Ubumwe bw’Abanyarwanda n’Inshingano Mboneragihugu Dr. Bizimana Jean Damascene yihanganishije abarokotse Jenoside yakorewe Abatutsi mu 1994 bo muri Mukarange no muri Kayonza muri rusange.

Yavuze ko nta Jenoside ibaho iyo Leta itabigizemo uruhare kandi ko Jenoside ibanzirizwa no kubiba urwangano n’amacakubiri mu baturage.

Yibukije ko mu bihe bitandukanye, Abatutsi bagiye batotezwa, abandi bakicwa haba muri za Nyarubuye, Mushubi, Nyundo, Mibirizi, n’ahandi.

Ati: “Dufite amahirwe yo kuba dufite ubuyobozi bwiza burangajwe imbere na Nyakubahwa Perezida wa Repubulika Paul Kagame, buha buri munyarwanda wese icyubahiro, amahoro n’ishema akwiye, burwanya amacakubiri.”

Dr. Bizimana yasabye ababaye muri aya mateka ya Jenoside yakorewe Abatutsi gutanga ubuhamya kugira ngo ukuri gukomeze kumenyekana.

Yijeje Abacitse ku icumu rya Jenoside yakorewe Abatutsi mu 1994 ko Leta izakomeza kubaba hafi no kubafasha mu rugendo rw’iterambere.

Senateri Prof. Dusinguzemungu Jean Pierre yahaye ikiganiro abaje kwibuka ku nshuro ya 28 Jenoside yakorewe Abatutsi mu 1994 i Mukarange. Muri iki kiganiro, yagarutse ku mateka y’uburyo Jenoside yakorewe Abatutsi mu 1994 yateguwe ikanashyirwa mu bikorwa. Yagaragaje uburyo Jenoside yateguwe n’Ubuyobozi bubi, ikigishwa mu mashuri no mu baturage kugeza ishyizwe mu bikorwa.

Muri iki kiganiro kandi yagaragaje uruhare rw’abakoloni mu gucengeza ingengabitekerezo ya Jenoside, yagarutse kandi ku bamisiyoneri bagize uruhare mu gusenya ubumwe bw’Abanyarwanda.

Mu gusoza ikiganiro abitabiriye kwibuka ku nshuro ya 28 Jenoside yakorewe Abatutsi mu 1994, yashimye Inkotanyi zitanze zikarokora abicwaga. Yashimye kandi ko nyuma yo kurokora Abatutsi bahigwaga, ingufu zashyizwe mu kubaka ubumwe bw’Abanyarwanda. Ati: “Twibuke twiyubaka.”

Mu buhamya bwatanzwe na Rugwizangoga J. Baptiste warokokeye Jenoside yakorewe Abatutsi i Mukarange yatanze ubuhamya bw’amateka mabi n’ubuzima bushaririye Abatutsi banyuzemo, agaragaza uburyo Abatutsi bari bahungiye kuri Paruwasi ya Mukarange bizeye kuharokokera; babanje guhangana n’ibitero by’Interahamwe birangira baganjwe n’abo bicanyi bakoreshaga imbunda na za grenade.

Ati: “Ndashima abahagaritse Jenoside. Ndashima Leta nziza y’u Rwanda yaduhaye uburezi, ubu tukaba turiho twariyubatse.

Umuyobozi w’Akarere ka Kayonza John Bosco Nyemazi yavuze ko muri Kayonza kimwe n’ahandi mu gihugu Jenoside yakorewe Abatutsi mu 1994 yahitanye Abatutsi benshi, ubu hamaze kubarurwa imibiri y’Abatutsi 25,686 ishyinguye mu cyubahiro mu nzibutso za Jenoside zubatse hirya no hino muri ako Karere.

  • NTAWITONDA JEAN CLAUDE
  • Mata 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE