Kayonza: Amatsinda y’Ubumwe n’Ubudaheranwa yabafashije kubana no komorana ibikomere

  • NSHIMIYIMANA FAUSTIN
  • Mutarama 27, 2024
  • Hashize ukwezi 1
Image

Nyuma y’imyaka 30 Jenoside yakorewe Abatutsi mu1994 ihagaritswe, hirya no hino mu gihugu hagiye hashyirwaho amatsinda y’ubumwe n’ubwiyunge mu rwego rwo kubanisha neza Abanyarwanda, ayo matsinda yafashije komorana ibikomere.

Binyuze mu biganiro by’isanamitima bikorerwa mu matsinda, gukorera hamwe ibikorwa bibateza imbere mu bukungu no mu mibereho myiza, kwimakaza amahoro arambye n’imibanire myiza bishimangira ubumwe n’ubudaheranwa bw’Abanyarwanda, byafashije abakoze Jenoside n’abayirokotse komorana ibikomere.

Mu buhamya butangwa na Ngendabanga Augustin utuye mu Murenge wa Mukarange mu Karere ka Kayonza akaba yarakoze Jenoside, avuga ko imbabazi yahawe ku byaha yakoze byo kwica Abatutsi ari ikimenyetso gikomeye ko Abanyarwanda bateye intambwe yo kwimaza ubumwe n’ubwiyunge.

Ngendabanga Augustin yavuze ko nyuma yuko ahamijwe ibyaha bya Jenoside yafunzwe mu 1996 akaza gufungurwa muri 2003 ku mbabazi yahawe na Perezida wa Repubulika y’u Rwanda Paul Kagame. Nyuma yo gufungurwa yagiraga isoni zo kubana nabo yiciye atinya kubana na bo kubera urwikekwe.

Ibi byatumye atanga ubuhamya mu Nkiko Gacaca ndetse yegera abo yiciye abasaba imbabazi ariko ntibazimuha icyo gihe kugeza n’ubwo asubiye gukora imirimo nsimburagifungo muri 2007 mu gihe kingana n’amezi ane, agarutse yishyura imitungo yari yarasahuye.

Yavuze ko atigeze acika intege zo gusaba imbabazi abo yiciye kuko muri gereza bahabwa amasomo agamije kubanisha neza Abanyarwanda kugeza ubwo bamubabariye ndetse bafatanya urugendo rw’ubumwe n’ubwiyunge kandi bahurira mu bikorwa bigamije iterambere ry’imiryango yabo n’igihugu muri rusange binyuze mu itsinda Amataba y’Ubudaheranwa.

Yagize ati: “Ubu ni abaturanyi beza kuko buri wese yamaze kwakira ukuri kandi ibikomere biragenda bishira muri twe. Dusabana amazi n’ibiryo kuko abana banjye ntibicwa n’inzara kandi bihiye, turagendererana kandi dutezanya imbere binyuze mu buhinzi dukorera hamwe, amatsinda yo kwizigama no kugurizanya n’ay’ibiganiro duhuriramo. Turorozanya kuko nk’ubu mfite ihene nahawe. Turafatanya muri byose kuko ntibahura n’ikibazo ngo mbure kubatabara, ubukwe turatumirana, iminsi mikuru n’ibindi biduhuza kandi tukabikora nta rwikekwe.”

Mukarusine Valentine umwe mubahaye imbabazi Ngendabanga Augustin, yavuze ko muri Jenoside yakorewe Abatutsi mu 1994 yabuze abo mu muryango we umunani.

Ubwo Ngendabanga yamusabaga imbabazi ngo byabanje kumugora ntiyamubabarira ariko uko yarushagaho kwiga no kuganirizwa kuri gahunda y’ubumwe n’ubwiyunge byatumye ababarira Ngendabanga n’abandi bamwiciye.

Ubu yemeza ko abanye neza n’abamugiriye nabi bakamwicira abo mu muryango kuko bicara hamwe bakabwizanya ukuri ndetse bagakorera hamwe ibikorwa bigamije iterambere.

Yagize ati: “Ubu tubanye neza kandi twariyunze kugira ngo igihugu cyacu gikire kandi gitere imbere. Ubu turahura tukagurizanya, duhana imibyizi mu mirima n’ibindi bikorwa by’ubuhinzi duhuriramo kuko dukora n’ifumbire y’imborera aho buri wese azana ibyatsi. Twiyemeje gukomeza kuvura ibikomere no gukora tugatera imbere.”

Umuyobozi wa Ibuka mu Karere ka Kayonza, Ndindabahizi Didas yavuze ko aho gahunda z’ubumwe n’ubwiyunge zitangiriye, abantu bagakangurirwa gusaba imbabazi abandi bagashishikarizwa kuzitanga byatanze umusaruro.

Yagize ati: “Umwera uturutse ibukuru ukwira hose kuko twasabwe n’ubuyobozi gushishikariza abantu gusaba imbabazi kandi bushishikariza n’abandi kuzitanga kandi byatumye ubwiyunge bubaho ndetse uburyo bw’isanamitima bugerwaho kuko ubutabera bwaratanzwe. Urugendo rero rwagenze neza kuko amakuru yatanzwe yatumye tubona ahari imibiri y’abishwe ndetse kandi hari imbogamizi z’abinangiye ntibagaragaza amakuru ariko hari abihannye kandi batanga amakuru.”

Umuyobozi w’Akarere ka Kayonza, Nyemazi John Bosco yashimiye abiyunze bakaba buzuzanya ariko aboneraho no gusaba abataratera iyi ntambwe bagifite ipfunwe guhuriza hamwe bakarwanya urwango ruri mu mitima bakubakana.

Yagize ati: “Duterwa ishema no kubona hari abahagarara bagatanga ubuhamya kuko byatanze umusaruro kandi urabona ko ari inzira nziza. Icyo dusaba abataratera iyi ntambwe Ni uko na bo bafatira urugero ku bandi kuko urwango rwo mu mitima ruvuna abarufite kandi iyo habayeho gutera intambwe yo gutanga imbabazi byubaka bombi. Tuzakomeza rero kwigisha abaturage kuko kwigisha ni uguhozaho kandi ni byo igihugu kidushishikariza.”

Itsinda rigize Umuryango Association Modeste et Innocent ribarizwamo Ngendabanga Augustin na Mukarusine Valentine rifite abitwa ‘Amataba y’Abakuru’ mu Tugari dutandatu two mu Karere ka Kayonza rihurije hamwe Abarokotse Jenoside 120 n’Abakoze Jenoside 120 ndetse n’abana babo 240.

Banafite itsinda ry’abahuguwe mu Isanamitima 10 ku bafite ibikomere bya Jenoside, ku ihohoterwa ryo mu miryango, ibiza, abana b’abakobwa babyariye iwabo muri utwo tugari twose,  bakira abantu bakabafasha kubatega amatwi bakabafasha gusohoka mu bikomere bahuye nabyo.

  • NSHIMIYIMANA FAUSTIN
  • Mutarama 27, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE