Kayonza: Akagari kamwe ni ko gafite amashanyarazi mu Murenge

  • NSHIMIYIMANA FAUSTIN
  • Mutarama 26, 2024
  • Hashize amezi 4
Image

Abaturage batuye mu Tugari dutatu muri tune tugize Umurenge wa Kabare Akarere ka Kayonza, barasaba ko bakwegerezwa umuriro w’amashanyarazi kuko wabafasha kurushaho kwihutisha iterambere ryabo n’iry’Ighihugu muri rusange.

Abo baturage bavuga ko basigaye inyuma mu iterambere bitewe n’uko bakiri mu icuraburindi mu gihe uyu mwaka ari wo wa nyuma u Rwanda rwihayemo intego yo kuba umuriro w’amashanyarazi wagejejwe  ku baturage ku kigero cya 100%.

Nk’uko bikubiye muri Gahunda ya Guverinoma y’imyaka 7 yo kwihutisha Iterambere (NST1), umwaka wa 2024 ugomba kurangira amashanyarazi ageze ku baturarwanda bose ariko uyu munsi ageze kuri 74%.

Utugari twa Gitara, Rubimba na Kirehe ni tumwe mu Tugari tune tugize Umurenge wa Kabare tudafite umuriro w’amashanyarazi, uretse Akagari ka Cyarubare.

Abaturage batuye mu Tugari tudafite umuriro basaba ko bakegerezwa umuriro bakava mu bwigunge kuko kubona aho kwiyogoshesha n’ibyuma bisya umusaruro baba bejeje bibasaba kujya mu Karere ka Ngoma.

Bavuga mu masaha y’ijoro biyambaza udutara tuzwi nk’udutadowa cyangwa bakifashisha buji.

Nduwayo Samuel yagize ati: “Kuba nta muriro dufite bitugiraho ingaruka nyinshi kuko nk’iyo dukeneye gushesha cyangwa kwiyogeshasha umusatsi bidusaba kujya mu Murenge wa Rukira mu karere ka Ngoma.

Niba nta byuma bisya dushobora kuzana hano ngo tubone ifu n’ibyo kurya hafi, ubwo murumva tutarasigaye mu iterambere koko?”

Mutijimana Francine utuye mu Kagari ka Kirehe, yavuze ko abana be kugira ngo bashobore gusubiramo amasomo bibasaba kugura peteroli ari na ko agatadowa kaba kazamura imyotsi.

Yagize ati: “Kuba dutuye mu cyaro tukabona abandi bafite umuriro twumva twararenganye kuko guhora ducana agatadowa ngo tuboneshe mu nzu, abana babashe gusubiramo amasomo, birabangama. Agatadowa gatera abana imyotsi ntibabone neza ndetse dutekereza ko ishobora kwangiza imyanya y’ubuhumekero.”

Yakomeje agira ati: “Kwiyogesha inaha biragoye kuko abana bamwe tubogoshesha imikasi kandi na bwo abantu bakuru iyo twitegura iminsi mikuru bidusaba kujya i Kibungo akaba ari bo badutunganyiriza imisatsi ku rugendo rw’igihumbi kuri moto.”

Umwe mu rubyiruko rusoje amashuri yisumbuye, Mugabo John  utuye mu Kagari ka Rubimba yavuze ko yasoje kwiga afite umushinga wo gutanga serivisi z’ikoranabuhanga ariko kubera ikibazo cy’umuriro umushinga we waradindiye.

Yagize ati: “Nasoje kwiga mfite igitekerezo cyo gushinga papeterie itanga serivisi z’ikoranabuhanga ariko byaranze kuko nabuze umuriro. Umunsi umuriro wageze ino ni bwo nzakora umushinga ntekereza.”

Umunyamabanga Nshingwabikorwa w’Umurenge wa Kabare, Kagabo Jean Paul, yemeza ko mu Murenge ayobora hari Utugari tutaragezwamo umuriro w’amashanyarazi ariko ko iki kibazo bakigejeje ku Karere.

 Yavuze kandi ko abakozi b’Ikigo cy’Igihugu gishinzwe Ingufu (REG) baherutse kuza gupima mu Murenge ayoboye, bakaba bafiteicyizere ko umuriro w’amashanyarazi uzabageraho bidatinze.  

Yagize ati: “Ni Utugari tudafite umuriro kandi ubona bibangamye mu iterambere nubwo hari gahunda y’uko abaturage bose bazagezwaho umuriro muri 2024. Ni ubuvugizi rero turi gukora kuko utwo Tugari nta muriro dufite kuko twabigejeje ku buyobozi bw’Akarere kandi n’ejobundi hari itsinda ry’Akarere na REG bakoze urugendo shuri inaha bareba ahazashyirwa amashanyarazi. Rero turizera yuko mu minsi iri imbere na bo bazabona amashanyarazi.”

Umuyobozi w’Ishami rya REG mu Karere ka Kayonza Stephen Igooma, yavuze ko hari umushinga munini wo kugeza ku baturage umuriro bafatiye ku muyoboro mugari ukazaha ingo zigera 25,000 mu Karere hose.

Yahishuye ko bashyize hanze isoko bahamagarira ba rwiyemezamirimo gupiganira kuzageza umuriro ku baturage.

Yagize ati: “Dufite gahunda yo kugeza umuriro ku baturage kuko ibice binini bigize Akarere bitarageramo umuriro uzagezwamo bityo umushinga dufite uzaha umuriro ingo 25,000; ntabwo ari mu Murenge wa Kabare gusa kuko hari n’indi mirenge ifite Utugari tutaragerwamo amashanyarazi.

Turi muri gahunda yo kureba rwiyemezamirimo kuko isoko ryaratanzwe kandi dutekereza ko mu mpera za Werurwe 2024 tuzaba twabonye uwo duha amasezerano akageza umuriro ku baturage.”

Kuri ubu akarere ka Kayonza kageze kuri 75.8% kageza umuriro w’amashanyarazi ku baturage, mu gihe u Rwanda rwihaye intego ko abaturage 100% bazaba bagerwaho n’umuriro bitarenze muri uyu mwaka.

  • NSHIMIYIMANA FAUSTIN
  • Mutarama 26, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE