Kayonza: Abanyerondo bakubitwa n’abakora uburaya bitwaza n’ibyuma

  • Imvaho Nshya
  • Ugushyingo 10, 2023
  • Hashize amezi 4
Image

Bamwe mu bakora irondo ry’umwuga mu Kagari ka Musumba, Umurenge wa Nyamirama mu Karere ka Kayonza, bavuga ko babangamiwe n’abakobwa bakora uburaya mu Isanteri ya Kiyovu babarwanya bakoresheje ibyuma, bagasaba ko bajyanwa mu bigo bibagorora.

Abakora irondo ry’umwuga mu Isanteri ya Kiyovu bavuga ko iyo bahwituye abo bakobwa bakora uburaya na bo babiraramo bakabakubita rimwe na rimwe bakitwaza n’ibyuma, bakaba basaba inzego zibakuriye gukurikirana no gukemura iki kibazo mu maguru mashya.

Nyiringabo Emmanuel, umwe muri abo banyerondo, yagize ati: “Inaha abakora uburaya bateza umutekano muke twavuga bagateza imvururu n’amahane. Iyo tugerageje kubafata badutera ibyuma, amacupa n’amabuye. Ingaruka ni uko bashobora kudukomeretsa bikaba byateza n’ibindi bibazo. Baduciye amazi (barabasuzugura) ntidushobora kubavuga cyangwa kubagira inama.”

Rurangirwa Emmanuel na we yunzemo ati: “Abakora uburaya baratugora bitewe n’uko ntawubavuga mu gihe cya nijoro. Bakora urugomo bitewe n’uko amasaha aba akuze, twababwira gutaha bakaturwanya ndetse byanarimba bakazana n’ibyuma. Ikibazo cyaraturenze tukigeza mu Kagari ka Musumba ariko n’ubu ntikirakemuka.”

Umunyamabanga Nshingwabikorwa w’Umurenge wa Nyamirama, Ntagwabira Oswald, yavuze ko iki kibazo atari akizi ariko bakaba bagiye gufatanya n’Inzego z’umutekano kugikemura no kugikurikirana.

Yagize ati: “Iki kibazo ni bwo bwa mbere nshyumvise kubera ko abakora irondo batarakitugezaho. Kubera ko twumvise iki kibazo, ubu tugiye gukorana n’Inzego z’umutekano zirimo Polisi, urwego rwa DASSO n’Inzego z’ibanze duhereye mu Midugudu kuko ushobora gusanga abakora urwo rugomo badatuye aho mu Kiyovu bitewe n’uko duhana imbibi n’ibindi bice.”

Ntagwabira akomeza agira ati: “Uburaya ntibwemewe bityo tugiye guhaguruka tubikurikirane. Iyo hajemo gukubita no gukomeretsa bihanwa n’amategeko; rero ni ugukurikirana kugira ngo nidusanga abakora uburaya bahari dufatanye kubagira inama byaba na ngombwa dushobora no gufatanya n’Inzego zibishinzwe bakaba bajyanwa muri Transit bakigishwa.”

Abakora irondo ry’umwuga barasaba ko abakora uburaya bajya bajyanwa mu Igororero igihe bigishwa, dore ko ngo iyo babafashe bakabajyana mu Kagari bahita barekurwa.

Icyaha cyo gukubita no gukomeretsa gihanwa n’ingingo ya 121 y’itegeko No 68/2018 ryo ku wa 30 Kanama 2018, riteganya igifungo cy’imyaka itatu ariko kitarenze imyaka itanu, n’ihazabu y’amafaranga y’u Rwanda y’ibihumbi 500 ariko atarenze miliyoni imwe.

Abanyerondo bacunga umutekano muri aka Kagari bavuga ko batewe inkeke n’abakora uburaya bashobora kubakomeretsa

NSHIMIYIMANA FAUSTIN

  • Imvaho Nshya
  • Ugushyingo 10, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE