Kayonza: Abageze mu zabukuru basabwe gutoza abato umuco wo kwizigamira

  • Imvaho Nshya
  • Ukwakira 4, 2023
  • Hashize amezi 8
Image

Abageze mu zabukuru bashishikarijwe gutoza abato kugira umuco wo kwizigamira, bagateganyiriza izabukuru bagifite imbaraga kugira ngo bazagire amasaziro meza.

Ni ubutumwa bagejejweho n’Umuyobozi w’Akarere ka Kayonza John Bosco Nyemazi, ubwo hizihizwaga  Umunsi Mpuzamahanga w’abageze mu zabukuru.

 Kwizihiza uyu munsi  w’abageze mu zabukuru byabereye hirya no hino mu Midugudu igize aka Karere byahujwe n’Inteko z’Abaturage.

Uyu munsi ufite insanganyamatsiko igira iti ‘Guteganyiriza izabukuru, inkingi y’amasaziro meza’

Yabasabye yuko barushaho kwigisha abakiri bato kwizigamira bateganyiriza amasaziro yabo, anabasaba kurushaho gusigasira no kwigisha abato ubumwe bw’Abanyarwanda n’ubudaheranwa bashingiye ku mateka mabi  u Rwanda rwanyuzemo.

Meya yabasabye kandi gusigira abato umurage wo gukunda igihugu, urukundo, ubumwe, ubufatanye no gukora cyane bakiteza imbere ubwabo n’Igihugu muri rusange.

Yagize ati: “Mwe abageze mu zabukuru, hari byinshi muzi abato batazi, murusheho kubatoza gukunda igihugu, kurangwaho Ubumwe n’Ubudaheranwa no kwizigama bakiri bato, bafite imbaraga kugira ngo bazagire amasaziro meza”.

Umuyobozi w’Akarere Nyemazi yibukije abari mu zabukuru ko bafite igihugu kibakunda kandi kibazirikana umunsi ku wundi, kibafitiye gahunda nziza zo kubafasha kurushaho kugira ubuzima bwiza.

Mu birori byo kwizihiza umunsi mpuzamahanga  w’abageze mu zabukuru haremewe abatishoboye  bagabirwa Inka, ibiryamirwa birimo matela n’ibindi bitandukanye.

Ku rwego rw’Akarere wabereye mu Murenge wa Rukara, Akagali ka Rukara mu Mudugu wa  Muzizi.

Kwizihiza umunsi mpuzamahanga w’abageze mu zabukuru, ku rwego rw’Igihugu byabereye mu Karere ka Nyagatare, ahatangiwe ubutumwa bwagarutse ku gushimira uruhare abageze mu zabukuru bagira mu kubaka umuryango nyarwanda no kubaha agaciro bakwiye.

NYIRANEZA JUDITH

  • Imvaho Nshya
  • Ukwakira 4, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE