Karongi: Isoko rya Bwishyura riri mu mujyi ryazahajwe n’umunuko

  • BAHUWIYONGERA SYLVESTRE
  • Mata 21, 2024
  • Hashize ibyumweru 4
Image

Abacururiza, abahahira n’abakorera indi mirimo mu Isoko rya Bwishyura riri rwagati mu Mujyi wa Karongi, Akarere ka Karongi, baratabaza ubuyobozi basaba gukizwa imyanda imenwa mu kibuga cy’iryo soko ikabateza umunuko n’isazi nyinshi zanduza ibicuruzwa biribwa.

Ni ikibazo bavuga ko cyatangiranye n’isoko mu myaka ya za 2012, abayobozi bose b’aka Karere basimburanye bakaba barakibwiwe, bagenda ntacyo bagikozeho.

Bavuga ko umunuko w’iyi myanda ihajugunywa ikahamara igihe ucyigaragaza cyane cyane iyo imvura ihise kuko wose umanukira mu isoko ku buryo abahakorera bahorana impungenge zo kwandura indwara zituruka ku mwanda.

Munyakaragwe Evariste uricururizamo ibirayi, yagize ati: “Iyi myanda rwose ntawe utabona ko ibangamye cyane, n’Umuyobozi utabibona sinzi ikindi yaba abona, aha si mu ngarani ni mu isoko. Ikindi uyu mujyi ugendwa n’imihanda yose, ari abaza kuwutembera, abawushakamo ibindi, abenshi bakenera kuza hano guhaha. Ibi se ni ibyagezweho twabaratira koko?”

Avuga ko nubwo adafite ubumenyi bwinshi mu byerekeranye n’ubuzima, ariko yemeza ko umwuka mubi uva muri iyi myanda n’isazi zirirwa ku bicuruzwa birimo ibiribwa bidatetse, utabura gutera  indwara.

Yakomeje agira ati: “Cyangwa se nibashake pubeli (udutebo tw’imyanda) zihoraho, bashyireho abakora isuku, buri munsi ku mugoroba ihakurwe ijyanwe mu kimpoteri cyabugenewe. Ariko tureke kuzaba iciro  ry’imigani ngo Karongi yazahajwe n’umwanda kubera iri soko kuko simpamya ko hari n’umuyobozi mukuru wagera aha ngo agende adushima.”

Bavuga ko mu minsi ishize batatse, abayobozi b’Akarere bakahagera kuko icyo gihe bwo imyanda yanageraga mu muhanda, ikanabangamira abagenzi bigendera batanaje mu isoko.

Abayobozi bahageze bavuze ko hazajya hamenwa imyanda yo mu isoko gusa, iyo mu mahoteli n’ahandi ikamenwa ahandi, ariko na byo ngo  nta kigaragara byatanze.

Nyiragasigwa Kansilida ucuruza imboga, avuga ko abacuruzi b’imboga n’imbuto bagiye kuzabura abaguzi kubera uyu mwanda.

Ati: “Mu gihugu kiri mu bya mbere ku Isi mu isuku. Ni gute isoko nk’iri ryo mu mujyi rwagati rikikizwa n’umwanda nk’uyu? Karongi ntiba mu Rwanda, ntigira abayobozi bareba ibibazo nk’ibi? Nta bashinzwe isuku bahaba ku buryo abantu birirwa bapfutse amazuru banatwikiriye ibyo bagombye kwereka abakiliya kubera umwanda?

Umwe mu bahahira muri iri soko na we yavuze ko bigaragaza isura mbi, ati: “Jye rwose ntakubeshye nari narafashe umwanzuro wo kutazagaruka guhahira muri iri soko cyane cyane imvura yaguye. Ubu se n’uru rusazi wagura umuneke cyangwa urubuto ukarurya? Oya rwose. Niba bidakemutse byihuse ababishinzwe basezere haze abashobora kuduha isuku Umukuru w’Igihugu ahora adukangurira, bitari ibyo ntaho twaba tugana.”

Umuyobozi w’Akarere ka Karongi Muakase Valentine, arabizeza ko bitarambiranye iki kibazo agiye kukigira amateka.

Yagize ati: “Iriya myanda rwose nanjye nzi ko ihari kandi ibangamye. Mu gihe cya vuba iraba ihavuye kuko si ho yagenewe.”

Avuga ko atari iriya yonyine, ahubwo hari uburyo nk’Akarere batekereza bwo gukusanya imyanda igashyirwa aho yakurwamo ibindi ntibe iyo kubangamira abaturage.

Yahishuye ko hari umufatanya bikorwa barimo gukorana banamaze gusinyana amasezerano, akaba agikora ubukangurambaga mu baturage, mu mahoteli no mu bindi bigo binini, bakazajya bishyura akayibakuriraho ank’uko mu Mujyi wa Kigali bimeze.

Umuyobozi w’Akarere ka Karongi Mukase Valentine yatanze igihe gito ngo abe yagize iki kibazo amateka
Aba bacuruzi b’imbuto bahamya ko uyu mwanda ugiye kuzababuza abakiliya
Bavuga ko isazi ziyivamo zijya ku mboga n’imbuto bacuruza bigatera impungenge
  • BAHUWIYONGERA SYLVESTRE
  • Mata 21, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE