Karongi: Isibo y’Ubutwari yahize andi yagenewe inka y’ubudashyikirwa

  • NYIRANEZA JUDITH
  • Gashyantare 1, 2024
  • Hashize ibyumweru 4
Image

Mu birori byo kwizihiza Umunsi w’Intwari z’Igihugu mu Karere ka Karongi, Isibo yahize izindi yagenewe n’Akarere inka y’ubudashyikirwa kubera ibikorwa bagaragaje.

Umuyobozi w’Akarere Madamu Mukase Valentine ari kumwe n’abagize inzego z’umutekano bifatanyije n’abatuye Umudugudu wa Ruhindiro, mu Kagari ka Kinyonzwe ho mu Murenge wa Mutuntu mu kwizihiza Umunsi w’Intwari z’Igihugu, wahijihirijwe mu rwego rw’Akarere ka Karongi.

Yashimiye iyo Sibo, ati: “Nshimiye Isibo y’Ubutwari yitwaye neza, ikagaragaza ibikorwa by’indashyikirwa ihize ayandi asaga 3800, bityo ubuyobozi bw’Akarere bwabageneye inka y’ubudashyikirwa izagera kuri buri wese utuye iyo Sibo; buri wese akorora.”

Meya Mukase yasabye iyo Sibo kandi gukomeza kuba ku isonga.

Ati: “Murasabwa gukomeza gushyira hamwe, abandi bakabigiraho, dore ko umuyobozi wanyu yavuze ko kugeza ubu nta rugo rudafite matola, mwishyuye mituweli, mufasha abagize ibirori n’ibyago, mukaba mwaranakusanyije amafaranga y’u Rwanda asaga 2 500 000 yo  gushinga uruganda rutunganya imyaka.”

Yavuze ko uyu munsi ari uwo gushimira intwari zitanze, harimo n’izamennye amaraso ngo u Rwanda rube uko rumeze ubu. By’Umwihariko yashimiye Nyakubahwa Perezida wa Repubulika wayoboye urugamba rwo kubohora igihugu, agahagarika Jenoside yakorewe Abatutsi mu 1994.

Umuyobozi wa Polisi mu Karere ka Karongi SP Wilson Musoni avuga ko amateka y’u Rwanda agaruka ku butwari bw’Abanyarwanda; agaragaza ko bari intwari kurusha abandi bose bari baturanye, bahanga u Rwanda rwagutse mu buso no mu ngeri zose, buri wese asabwa gukomeza guteza imbere.

Yavuze kandi ko ubutwari bugira ibipimo bibugaragaza mu migirire ya buri munsi.

Ati: “Ubutwari butangirana no kunoza ibyo umuntu ashinzwe, kugira umutima ufasha, kuba inyangamugayo, gukora cyane, kwirinda amakimbirane yo mu miryango.”

Yahereyeho aho, abasaba kwirinda ibikorwa byose bituma hari ugaragara nk’ikibazo muri sosiyete.

Umuyobozi w’Akarere ka Karongi yasabye abatuage guharanira kuba intwari baharanira kunoza ibyo bashinzwe, bafatira urugero ku bana b’i Nyange banze kwitandukanya ubwo babitegekwaga n’abacengezi bari babateye, bityo asaba buri wese guharanira ubumwe bw’Abanyarwanda.

Umudugudu wa Duhati mu Kagari ka Murehe ni wo wabaye indashyikirwa ku rwego rw’Akarere mu marushanwa y’inzego zegerejwe abaturage mu kugira Umudugudu ntangarugero. Uwo mudugudu wabishimiwe n’Akarere.

  • NYIRANEZA JUDITH
  • Gashyantare 1, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE