Karongi: Akarere gakeneye ababyaza umusaruro urutare rwa Ndaba

  • Imvaho Nshya
  • Nzeri 19, 2023
  • Hashize amezi 8
Image

Urutare rwa Ndaba ruri mu bice nyaburanga bisurwa cyane mu Karere ka Karongi, rurimo guteganyirizwa gutunganywa ku buryo haboneka ibikorwa remezo basura site y’ubukerarugendo ruherereyeho.

Ubuyobozi bw’Akarere ka Karongi buravuga ko urwo rutare rwa Ndaba rusurwa cyane na ba mukerarugendo kuko ruri no ku muhanda wa kaburimbo Karongi-Muhanga, ariko bigaragara ko rusa n’aho ntacyo rwinjiriza Akarere n’abaruturiye kuko amafaranga yishyuzwa n’abana basobanura amateka, bikaba bikemangwa ko ibyo bavuga babisobanukiwe.

Ni urutare rukora ku Tugari twa Nyarugenge na Gitwa, Umurenge wa Rubengera, Akarere ka Karongi, rubumbatiye amateka n’inyigisho z’ingirakamaro nk’uko Imvaho Nshya yabisobanuriwe n’umwe mu basore bakunze kuba bahari, basa n’abihangiye umurimo wo gusobanurira abahaza amateka yarwo.

Mutemberezi Fidèle w’imyaka 18 y’amavuko, akavuga ko abahageze bavuga Icyongereza, Igifaransa n’Ikinyarwanda, bose babasobanurira, kuko izo ndimi bazizi n’amateka yarwo bazivugamo bayazi.

Izina ry’urutare rwa Ndaba ryaturutse ku mugabo witwaga Ndaba, waruvumbuyemo ubuki bw’ubuhura, akaburya wenyine yirengagije abagabo batatu bamufashije kugera ngo abugereho kuri uwo musozi uhanamye.

Mutemberezi yavuze ko mbere umuhanda Muhanga – Karongi utarangirika hazaga abantu benshi ariko aho wangirikiye haza bake cyane, abaje bakahagirira ibibazo birimo ko nta nzira nziza zikoze banyuramo bamanuka ngo bajye hasi kurureberayo neza, banasobanurirwe amateka yarwo bareba bimwe mu birari byayo.

Yavuze ko bifuza kubona ibikorwa remezo bifasha abasura urwo rutare birimo kazu ko kugamamo imvura n’izuba, ubwiherero, aho kuruhukira bafata amazi, ikawa y’u Rwanda n’ibindi byiyongera ku cyapa kigaragaza amateka yaho.

Anavuga ko nta buryo buhari rubyazwamo umusaruro winjiriza Akarere kandi byashoboka kuko rukundwa cyane. Ati: “Ikindi twasaba ni uko natwe abasobanurira abahageze turi abasore 7, umunsi rwatunganyijwe neza, Akarere na RDB batazatwirengagiza kuko turimo umwe warangije ayisumbuye, bakaduhugura neza ubumenyi turufiteho bakabwongera, bakaduhamo akazi tukiteza imbere.”

Umuyobozi wungirije w’Akarere ka Karongi ushinzwe iterambere ry’ubukungu Niragire Théophile, avuga ko uru rutare ruri muri site z’ubukerarugendo aka Karere gafite kemeranyaho na RDB, nk’uko hari nk’izindi site bagenda bategura uburyo zabyazwa umusaruro.

Yongeraho ko hari abashoramari bagenda bazibasaba, ati: “Dufite site nyinshi. Ruriya rutare rero urabona ko ruri ku muhanda wa kaburimbo urimo ukorwa n’uyu munsi nturarangira. Hari ibigikorwaho, no ku rutare ubwarwo ubona ko hari aho bacyubaka, by’umwihariko kuri uwo muhanda waho, hari ibitararangira”.

Yongeyeho ati: “Twashatse rero gukorana na RDB ngo tubashakire uhakorera ariko dusanga bitakunda mu gihe uriya muhanda ucyubakwa. Ubwo ugiye kurangira ni bwo tugiye gutangira gushaka uwo twabona uhashaka unahashoboye, tukamuhuza n’Urwego rw’Igihugu rw’Iterambere, tukareba uko yahakoresha mu buryo bubyara umusaruro.”

Niragire avuga ko bariya basore baza gusobanurira abahasura amateka yaho, babikora mu buryo butemewe busa nko kwirwanaho gusa, ahubwo ko Akarere kabaye kahashyize icyapa kigaragaza amateka yaho kugira ngo uhasura ajye abanza ayisomere.

Ku byerekeranye n’ibikorwa remezo, Visi Meya Niragire Théophile asobanura ko nibamara kubona umufatanyabikorwa wahabyaza umusaruro, azabereka uburyo azahatunganya ibikenewe byose akabishyiramo.

Ikindi ni uko bo nk’Akarere bazatangira kwishyuza abahasura ari uko babakoreye serivisi zikwiye, babona zafasha abagenzi, kugira ngo  bagire icyo bababaza na bo babahaye serivisi bifuza. 

Ahari urutare rwa Ndaba hasurwa n’abantu benshi barimo n’abanyeshuri

BAHUWIYONGERA SYLVESTRE

  • Imvaho Nshya
  • Nzeri 19, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE