Karongi: Berekanye udushya mu imurikabikorwa ry’abagize DJAF

  • NTAWITONDA JEAN CLAUDE
  • Ukwakira 21, 2022
  • Hashize umwaka 1
Image

Amwe mu makoperative n’abanyabukorikori bakorera mu Karere ka Karongi bagaragaje udushya twinshi mu imurikabikorwa ry’abafatanyabikorwa b’Akarere ka Karongi mu iterambere (JADF), bashimangira ko ari umusaruro wo kuba icyorezo cya COVID-19 kirimo kugenza make nyuma y’imyaka 2 cyibasiye ibikorwa byabo.

Iryo murikabikorwa ryabaye hagati yo ku wa 18-20 Ukwakira 2022 mu Mujyi wa Karongi ryamurikiwemo ibihangano bitandukanye, umusaruro w’ubuhinzi n’ubworozi ndetse n’Imiryango itegamiye kuri Leta imurika ibikorwa byayo bishimangira iterambere.

Mu buhinzi n’ubworozi, hamuritswe umusaruro w’ibikomoka ku buhinzi birimo ibitoki n’imyumbati byera cyane mu Murenge ya Murundi, ibishyimbo n’ibigori byo mu Murenge wa Rwankuba, na Koperative yengera umutobe muri Rubengera imurika umusaruro wayo.

Ikigo cy’Igihugu gishinzwe guteza imbere Ubuhinzi n’Ubworozi (RAB) na cyo cyamuritse imbuto n’imirama gikomeje gukora mu bushakashatsi bugamije kuzamura ubuhinzi  bw’imbere mu gihugu.

Bahati Thierry, Umuyobozi wa Koperative y’abahinzi ba Kawa KOPAKAKI ikorera mu Murenge wa Rubengera, ikaba yamuritse ikawa yitwa Agaseke Coffee, yemeza ko umusaruro wabo ukunzwe mu Rwanda no mu mahanga kubera umwihariko wayo utuma begukana ibihembo bitandukanye mu ruhando mpuzamahanga.

Yemeza ko usibye kuba imurikabikorwa ari umwanya wo kwerekana ibyo bakoze binafasha mu kwigira ku bandi, ati: “Twitabiriye iri murikabikorwa kugira ngo tugaragarize abaturage ibyo dukora abatabizi babashe kubimenya; ni umwanya mwiza wo kumenya no kwigira ku byo abandi baje kumurika bakora bityo twungurane ubumenyi ku buryo bizadufasha kurushaho kunoza ibyo dukora.”

Nshimyimana Jean Baptiste, umubaji wabyigiye ndetse akabikora kinyamwuga, yamuritse ibihangano bakora birimo n’ibyo abaturage bakenera cyane mu bwubatsi nk’inzugi, amadirishya n’ibindi.

Yemeza ko nyuma yo kwiga umwuga w’ububaji akabikomeza no muri Kaminuza kuri ubu akataje mu nzira y’iterambere abikesha uyu mwuga, dore ko kuri ubu avuga ko afite indoto zo kuzabona ibiti bivamo imbaho akenera biboneka mu Rwanda.

Agira ati: “Nize ububaji mu mashuri yisumbuye muri Kaminuza niga Civil Engineering nsanga ngomba gukomeza gukora ububaji kandi nkabukora kinyamwuga, dore ko mu Rwanda usanga bukorwa na bake, nkaba nkora ibijyanye n’inzugi no kuzikinga bijyanye n’igihe no guhanga udushya dutandukanye mu bijyanye n’ibikomoka ku mbaho.”

Nshimyimana akomeza avuga ko abenshi mu bakora ibijyanye n’ubwubatsi mu Rwanda batabikora kinyamwuga, ari yo mpamvu yahisemo kubyihebera aho abasha gupima urubaho nyuma yo kurwumisha akamenya niba rwarageze igihe cyo gukoreshwa bituma icyo umuntu yarukozemo kiramba.

Nshimyimana ukora inzugi zifite agaciro kari hagati y’amafaranga y’u Rwanda 400,000-800,000  avuga ko akoresha imbaho z’ibiti avana mu gihugu cy’abaturanyi cya Repubulika Iharanira Demokarasi ya Congo, akaba yarashatse ingemwe zacyo aho ashaka kuzitubura akagerageza kubihinga ku butaka bw’u Rwanda.

Nshimyimana avuga ko ububaji bumaze kumugeza kuri byinshi, ndetse by’umwihariko akaba ari we wakinze Hotel ijyanye n’igihe iri muri aka Karere ka Karongi, akaba hari n’izindi nyinshi zikeneye ko bakorana mu kwagura amasoko.

Kellen Kebikomi, Ubuyobozi w’Ihuriro ry’abafatanyabikorwa mu Karere ka Karongi usanzwe ayobora Umuryango Mpuzamahanga “World Vision”, avuga ko imurikabikorwa ry’iminsi itatu ryasize abaturage basobanukiwe kurushaho ibibakorerwa, ndetse bikazatuma hanarushaho kuzamuka uruhare rwabo mu kubisigasira ndetse no kugera kuri byinshi mu nyungu rusange.

Kellen avuga ko iyo hateguwe igikorwa nk’iki biba biri mu nyungu z’impande zobi zirimo abafatanyabikorwa ndetse n’abaturage, aho abaturage barushaho gusobanukirwa ibyo bakorerwa naho abafatanyabikorwa bakigira ku bikorwa bya bagenzi babo bityo bakarushaho kunoza ibyo bakora.

Agira ati: “Buri mwaka tumurika ibikorwa kugira ngo twereke abaturage ibibakorerwa ndetse tunabakangurire kubifata nk’ibyabo ntibumve ko ari iby’abantu babafashije. Buri muntu rero aba akwiye kumva ko ikimukorerwe aba ari icye kugira ngo abashe kucyitaho, agisigasire anakibyaze umusaruro yiteza imbere.”

Mu Karere ka Karongi, Imurikabikorwa ry’uyu mwaka wa 2022 ryitabiriwe n’abafatanyabikorwa 64 kuri 66 bari bateganyijwe.

  • NTAWITONDA JEAN CLAUDE
  • Ukwakira 21, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE