Karate: Niyitanga na Uwitwaye begukanye   “The champions Karate Open 2024”

  • NYIRANEZA JUDITH
  • Mutarama 4, 2024
  • Hashize amezi 5
Image

Ishuri ryigisha abana imikino itandukanye irimo n’umukino wa Karate “The Champions Sports Academy”, yateguye irushanwa ry’umunsi umwe “The champions Karate Open 2024”.

Iri rushanwa ryari ribaye ku nshuro ya mbere akaba ari naryo ryafunguye amarushanwa y’umukino wa Karate muri uyu mwaka wa 2024 ryabereye ahahoze ari muri Sports View Hotel i Remera, ryitabirwa n’abakinnyi 60 bari baturutse mu makipe 15 ku itariki 02 Mutarama 2024.

Abitabiriye iri rushanwa bahatanye mu Kwiyereka “Kata” ndetse no Kurwana “Kumite”.  Iri rushanwa rikaba ryari rigamije ahanini kureba impano nshya mu byiciro bitandukanye yaba mu bakiri bato, ingimbi, abangavu ndetse no mu bakuru.

Iri rushanwa kandi ryahujwe na gahunda yo gukangurira abantu kwita ku buzima bwo mu mutwe bw’abakinnyi.

Mu kwiyereka “Kata”, mu bakobwa, Yezakuzwe Lucie yegukanye umwanya wa mbere akurikirwa na Abayisenga Parémonique naho ku mwanya wa 3 haza Uwase Laziat.

Mu bahungu, Buguzi Félix yegukanye umwanya wa mbere akurikirwa na Niyitanga Khalifa naho Nsabimana Alphani asoreza ku mwanya wa 3.

Mu cyiciro cyo kurwana “Kumite”, mu bakobwa, Uwimpuhwe Grace yegukanye umwanya wa mbere akurikirwa na Uwase Laziat naho Irakoze Aline aba uwa 3.

Mu cyiciro cy’abahungu batarengeje imyaka 18, Uwineza Eric yegukanye umwanya wa mbere, ku mwanya wa kabiri haza Mugisha Omar naho ku mwanya wa 3 hasoreza  Niyonkuru Sidique.

Mu cyiciro cy’abagabo munsi y’ibilo 67, Ndutiye Shyaka Roger yegukanye umwanya wa mbere akurikirwa na Dushime Sharifu na Ishimwe Jean Didier.

Mu bafite hejuru y’ibilo 84, Niyitanga Khalifa ni we wegukanye irushanwa atsinze Ntwali Fiston wasoreje ku mwanya wa kabiri naho  Kagimbi Paul aba uwa 3.

Abakinnyi bose bitwaye neza mu byiciro bitandukanye bahawe imidali ndetse banahembwa ibikoresho byifashishwa mu mukino wa Karate birimo umwambaro bambara bakina “Kimono” ndetse n’ibikoresho by’ubwirinzi bambaro mu gihe barimo gukina “Karate Protection Equipments”.

Nyuma y’iri rushanwa, Umuyobozi wa The Champions Sports Academy, Sensei Nkuranyabahizi Noel yatangaje ko bishimira uko ryagenze kuko habayemo guhangana cyane bigaragaza ko Karate y’u Rwanda yazamuye urwego kandi ko mu minsi iri imbere izatanga umusaruro mwiza ari mu Rwanda no ku rwego mpuzamahanga.

Yongeye kugaruka ku mubare ukiri muke w’abakobwa avuga ko mu marushanwa ataha bazashyiramo imbaraga nyinshi kugira ngo umubare wiyongere.

Iri rushanwa ryakurikirwanwe n’abantu bandukanye bakinnye umukino wa Karate barimo, Minisitiri w’Ubucuruzi n’Inganda, Dr Ngabitsinze Jean Chrysostome, Perezida w’ishyirahamwe ry’umukino wa Karate mu Rwanda “FERWAKA”, Niyongabo Damien na Sinzi Tharcisse ufite umukandara w’umukara Dan ya munani.

Perezida wa FERWAKA, Niyongabo Damien yashimiye cyane Sensei Nkuranyabahizi Noel n’abo bafatanyije gutegura iri rushanwa kuko ryagaragaje impano nyinshi zitari zizwi.

Yakomeje ashishikariza n’andi makipe gutegura amarushanwa nk’aya hagamijwe guteza imbere umukino wa Karate muri rusange cyane cyane bihereye mu bakiri bato.

Niyongabo yasabye aba bakinnyi bitwaye neza n’abandi bose ko batagomba kwicara ahubwo bakomeza kwitegura, kuko muri Gashyantare 2024 hari andi marushanwa yo ku rwego rw’igihugu kandi azaba akomeye.

  • NYIRANEZA JUDITH
  • Mutarama 4, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE