Kanseri zihitana benshi kandi umuntu yazirinda kuri 40%

  • NYIRANEZA JUDITH
  • Gashyantare 3, 2024
  • Hashize ukwezi 1
Image

Kanseri ni kibazo cyugarije Isi, ariko nanone abantu bakaba bagira uruhare mu kuzirinda ku kigero cya 40% nk’uko byatangajwe na Minisitiri w’Ubuzima Dr Nsazimana Sabin, kuri uyu wa Gatandatu tariki ya 3 Gashyantare 2024 umunsi ubanziriza  ikwizihiza Umunsi Mpuzamahanga wo kurwanya kanseri.

Minisitiri Dr Nsanzimana yabigarutsemo mu nama nyunguranabitekerezo, aho yavuze ko indwara ya kanseri ari imwe muzihitana abantu benshi ku Isi, ariko nanone ko abantu ubwabo bagira uri uhare mu kuyikumira.

Yagize ati: “Kanseri ni ikibazo gikomeye cyane mu Rwanda ndetse ku Isi, bigarura kwibaza ngo iki kibazo cyakorwaho iki tudategereje ko umuntu agera kwa mugan gakanseri yarakwiriye umubiri wose.

Icya mbere ni ukumenya uburyo bwo kwirinda kanseri kuko inyinshi hafi nka 40% abantu bashobora kuzirinda bakoresheje uburyo bw’imirire n’imibereho. “

Yavuze ko izikunze kugaragara cyane mu Rwanda ari kanseri y’inkondo y’umura n’iy’ibere zibasira abari n’abategarugori cyane.

Ati: “Mu Rwanda kanseri y’ibere yagaragaye ku bantu 1,237 bangana na 14%, kanseri y’inkondo y’umura ku bantu 1 223 bangana 13,9%.”

Yakomeje asobanura ko hari n’ibyo ubuvuzi butahindura kuri kanseri, anatanga inama zo kwikurikirana hakiri kare abantu bakamenya uko ubuzima buwabo buba buhagaze.

Ati: Hari ibyo tudashobora guhindura bishingiye ku turemangingo iyo hari kanseri zagaragaye mu muryango zisa n’izifitanye isano na akarande. Biba byiza ko iyo ubizi ko mu muryango hari uwigeze kurwara kanseri y’ibere cyangwa izindi bisaba ko wikurikirana, aho kugira ngo umuntu abimenye bigeze ku cyiriro cya 3 cyangwa cya 4 kuko icyo gihe kwa muganga akenshi icyo bakora ni ukugabanya ububabare bw’umurwayi no kumuherekeza muri ubwo burwayi kuko nta miti ihari.”

Yongeyeho ati: “Gusa hari ibikorwa mu kuvura indwara ya kanseri, abantu bahamagarirwa kwisuzumisha hakiri kare kandi hanashyizwe imbaraga mu buvuzi bwayo, aho kugeza ubu hari ibitaro biyivura birimo Butaro, Kanombe, no mu bitaro bya Kaminuza.”

Byagaragaye kandi ko igitsina gore ari cyo gikunze kwibasirwa n’indwara ya kanseri kuko mubo  yagaragayeho mu 2020,  bari 8 835  muri bo 5 152  bari abagore  yahitanye 3 460  naho abagabo bari  bayirwaye bari 3.683 ihitana 2.584  .

Umunyarwandakazi utuye muri Amerika wakize kanseri, Philippa Kibugu Decuir akangurira abantu kwita ku bintu bitatu by’ingenzi.

Philippa Kibugu Decuir

Yagize ati: “Njye ndi umuvugizi kuri iyo ndwara ya kanseri kandi na mukuru wanjye ni yo yamwishe impamvu ni uko ntacyo yari azi kuri iyo ndwara.  Nanjye narwaye kanseri y’ibere ndayivuza irakira. Icyo nsaba Abanyarwanda ni ibintu 3 by’ingenzi, ari byo ko bakwiye kwikunda, kwimenya no kwisuzumisha.”

Kanseri ziganje cyane mu Rwanda zihitana abantu ni iy’ibere, iy’inkondo y’umura n’iya Prostate.

  • NYIRANEZA JUDITH
  • Gashyantare 3, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE