Kamonyi: Hitabajwe Polisi mu kwambutsa abajya ku ishuri

  • Imvaho Nshya
  • Nzeri 25, 2023
  • Hashize amezi 8
Image

Abanyeshuri berekeza ku ishuri bajya gutangira umwaka w’Amashuri 2023-2024, bigoranye cyane abanyeshuri n’ababyeyi bajyana abana ku ishuri ryitiriwe Padiri Ramon Kabuga TSS riherereye mu Murenge wa Ngamba mu Karere ka Kamonyi, hitabajwe abapolisi bo mu ishami rishinzwe umutekano wo mu mazi.

Kuba imihanda yerekezayo yarangiritse ntibe nyabagendwa bituma abana bajya cyangwa bava ku ishuri bibagora, ari na byo byatumye biyambaza Ishami rya Polisi y’u Rwanda rishinzwe umutekano wo mu mazi kugira ngo ribafashe kwambutsa abanyeshuri basubira ku ishuri.

Umuyobozi w’Ikigo cy’Ishuri ryitiriwe Padiri Ramon Kabuga TSS, Padiri Rudahunga Cyiza Edmon Marie, avuga ko babwiye inzego bireba zose kugira ngo hashakwe ibisubizo bihoraho byo gufasha ababyeyi gusura abana ku ishuri, gufasha abagemura ibiryo ndetse anibutsa ko bimwe mu biraro byo ku mihanda ihagera byasenyutse.

Yagize ati: “Dufite ibibazo bitubereye umusaraba byo kutagira imihanda yorohereza abagenderera iki gice gisa nk’ikiri ku ruhande bigatuma bamwe mu babyeyi batabasha kujya gusura abana biga kuri iki kigo cyacu ariko ndetse usanga abaduha ibiryo tugaburira abana bibagora kubihageza kuko imiterere y’imihanda ibagora uhaje rimwe ntahagaruka”.

Padiri yavuze ko inzego zirimo Ikigo cy’Igihugu gishinzwe Ibizamini n’Ubugenzuzi bw’Amashuri (NESA), Polisi y’Igihugu, Minisiteri y’Ibikorwa Remezo (MININFRA) n’abandi bafatanya mu gucyura abanyeshuri ni bo bafashe umwanzuro wo gufasha abana gusubira ku ishuri babambutsa Nyabarongo.

Yagize ati: “Urebye izi mbogamizi zose ni zo zatumye izi nzego maze kuvuga ziyambaza Polisi ishami rishinzwe umutekano wo mu mazi kugira ngo idufashe kwambutsa abana baca muri Nyabarongo kuko ni ho horoshye habafasha kuko imihanda dufite ntabwo yoroshya ubuhahirane kubera ko yangiritse bigasaba ko nubonye imodoka ibageza ku ishuri bashobora kwishyura ikiguzi kikubye hafi gatatu kandi ari mu bilometero bitarenga 15”.

Padiri Rudahunga ashimira Polisi y’Igihugu uburyo yababaye hafi ikabambukiriza abana, akizera ko umwihariko n’imbaraga yashyize muri icyo gikorwa bizatuma ubuyobozi na bwo bushyiramo imbaraga mu gukora umuhanda wangiritse ugera ku ishuri.

Murenzi Celestin, Umuturage uturiye iki kigo, yatangarije Imvaho Nshya ko bibabaje kubona ibikorwa begerejwe bidafite imihanda myiza ihagera.

Yagize ati: “Turashimira Padiri Ramon wabashije kuduha Kiliziya nziza n’ibi bikorwa birimo; imihanda, amazi ndetse n’aya mashuri, ariko imihanda yasize atwubakiye yamaze kwangirika kandi ubuyobozi burabizi kuko bitugora kuva hano tujya i Kigali bidusaba gukebereza.

Ikindi kandi na Nyabarongo mu gihe cy’imvura iruzura, igishanga cyose tukagira imbogamizi kuko nta bwato buzima buhari mu gihe twanyuzeyo bishobora kutwambura ubuzima. iyo mihanda ikozwe byatworohereza, ikindi bashobora no kubaka ikiraro cyo ku kirere cyambuka kuri Nyabarongo tukajya tugikoresha”.

Umuyobozi w’Akarere ka Kamonyi Dr Nahayo Sylvere, aherutse kuvuga ko iki kibazo bakizi ariko bagiye gukomeza gushaka ubushobozi no kuganira n’izindi nzego kugira ngo hasanwe iyi mihanda ibiri ihagana ndetse hanubakwe amateme n’ibiraro byatwawe n’ibiza byo muri 2020 hagamijwe gufasha abaturage batuye muri iki gice gukomeza kugirana ubuhahirane no kugenderana nkuko byahoze.

Itsinda rya Polisi riyobowe na CIP Devota Tuyishime ndetse n’Umuyobozi wa Polisi mu Karere ka Kamonyi bari bagenzuye iki cyambu ku wa 21 Nzeli 2023 kugira ngo barebe uko iki gikorwa kigomba kugenda hagafashwa abanyeshuri gusubira ku ishuri nta nkomyi.

AKIMANA JEAN DE DIEU

  • Imvaho Nshya
  • Nzeri 25, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE