Kamonyi: Abiteze umusaruro w’ibigori mwinshi bongerewe ubwanikiro 68

  • AKIMANA JEAN DE DIEU
  • Gashyantare 23, 2024
  • Hashize amezi 2
Image

Abaturage banyuzwe n’umusaruro w’ibigori babonye wikubye inshuro zirenga ebyiri, barashimira ubuyobozi bwatangiye kubafasha kubaka ubwanikiro bw’ibigori buzatuma mu Karere harangwa ubugera ku 124, buvuye kuri 56.

Ubwanikiro bushya burimo kubakwa ni 68 bwitezweho gutanga umusanzu ukomeye mu kubungabunga umusaruro w’ibigori wabaye mwinshi.

Mu kiganiro n’Imvaho Nshya, abahinzi bavuga ko guhingira ku gihe no gukoresha neza ifumbire bahawe na Leta byabafashije kuzabona umusaruro uruseho uwo bejeje mu bihembwe by’ihinga byarangiye.

Uwamahoro Gerardine avuga ko yajyaga yeza nibura ibiro 400 by’ibigori bihungiye ariko arebye umusaruro azabona muri iki gihembwe cy’ihinga ashobora kurenza toni 1.

Yagize Ati”Kugeza ubu nishimira ko mu bihe byashize nezaga nibura ibiro 400 ariko ngereranyije n’umusaruro nzabona ku mwero w’ibi bigori nshobora kuzeza nibura Toni 1 bivuze ko aho nanikaga ibiro 400 bhagomba kwikuba 4 nibura kugirango umusaruro utazamfana ubusa”.

Kankesha Liber ée avuga ko abagara ibigori bye yabonaga ko bishobora kuzera neza cyane, ahubwo akabunza imitima ashaka aho azabyanika akahabura agashimira ubuyobozi burimo kubafasha kubaka ibihangari byo kuzabyanikamo ntibibapfire ubusa.

Yagize ati: “Mbagara ibigori nabonga bigomba kwera neza cyane none n’ubundi mbona byeze neza kandi umusaruro ni mwinshi nabunzaga imitima yaho nzabyanika ariko abayobozi barimo kudufasha kubona aho tuzanika muri bihangari kugira ngo bitazadupfira ubusa kandi twejeje umusaruro mwinshi.”

Kayihura François avuga ko bishimira ko umusaruro wabo bejeje utazabapfira ubusa bakemeza ko ibigori byeze neza ahavaga ibiro 15 hashobora kuzava ibiro 45.

Yagize ati: “Ubuyobozi bwacu bwarebye kure kuko umusaruro wacu uzaboneka bigaragara ko uzaba mwinshi ku buryo ahavaga ibilo 15 hashobora kuzava nibura ibilo 45, bityo rero tutabonye aho kubyanika heza kugira ngo bitangirika. Tugomba kubona ibihangari byo kudufasha gufata neza umusaruro kandi barimo kudufasha kuzabona aho kwanika heza.”

Rugwiza Prosper umwe mu bayobozi ba Koperative zihinga ibigori, avuga ko bashimishijwe n’umusaruro biteze kubona akaboneraho gushimira Leta yaborohereje kubona ifumbire n’imbuto nziza itanga umusaruro.

Ati: “Turashimira nanone ubuyobozi burimo kudufaha kubona aho kwanika umusaruro wacu.”

Umuyobozi w’Akarere ka Kamonyi, Dr. Nahayo Sylvere, yabwiye Imvaho Nshya ko bashimishijwe n’umusaruro uzaboneka w’ibigori, bityo bamaze gufata ingamba zo kubaka ubwanikiro bafatanyije n’abaturage kugira ngo umusaruro babonye utazapfa ubusa.

Yemeza ko mu Karere kose hari inzu 56 zo kwanikamo zikomeye, ariko harebwe uburyo bwo kubaka ubwanikiro bw’igihe gito mu Karerehose kugira ngo umusaruro uzabe urinzwe neza kurushaho.

Yibutsa abahinzi ko umusaruro bazabona bakwiye kuwufata neza kugira ngo batazicira isazi mu maso mu bihe biri imbere kandi barejeje mu buryo bugaragara.

Minisiteri y’Ubuhinzi n’Ubworozi (MINAGRI) na yo isaba abahinzi gufata neza umusaruro wabonetse mu gihembwe cy’ihinga cya 2024 A kugira ngo batazagira inzara mu bihe bizaza.

  • AKIMANA JEAN DE DIEU
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE