Kamonyi: Abahinzi barasabwa guhinga ubutaka bwose

Mu Karere ka Kamonyi hatangirijwe igihembwe cy’ihinga 2024A, abahinzi basabwa guhinga ubutaka bwose kandi bahinga kinyamwuga.

Minisitiri w’Ubuhinzi n’Ubworozi Dr Musafiri Ildephonse yari kumwe n’abahinzi mu Karere ka Kamonyi kuri uyu wa Mbere tariki 25 Nzeri 2023, aho yifatanyije n’abaturage gutera imbuto y’ibigori mu gishanga cya Gikoro, mu Murenge wa Karama, Umudugudu wa Muganza.

Minisitiri w’Ubuhinzi n’Ubworozi ari kumwe na Guverineri w’Intara y’Amajyepfo Kayitesi Alice n’ubuyobozi bw’Akarere ka Kamonyi  yatangije  igihembwe cy’ihinga 2024A.

Minisitiri kandi yasabye abahinzi kunoza ubuhinzi.

Yagize ati: “Kuri uyu Muhindo, imvura yabonetse kare, murasabwa kunoza imikorere by’umwihariko mukabyaza umusaruro ayo mahirwe”.

Minisitiri Dr Musafiri avuga ko kugira ngo umusaruro w’iki gihembwe uzaboneke uko wifuzwa, abahinzi bagomba gukoresha neza imbuto n’inyongeramusaruro kandi bagahinga ubutaka bwose.

Ati: “Bahinzi murasabwa guhingira igihe, kurwanya isuri mu misozi ikikije ibishanga muhingamo, gukoresha imbuto nziza, gukoresha ifumbire mvaruganda n’imborera no guhinga ubutaka bwose bwera”.

Minisitiri w’Ubuhinzi n’Ubworozi Dr Musafiri Ildephonse na Guverineri w’Intara y’Amajyepfo Kayitesi Alice n’ubuyobozi bw’Akarere ka Kamonyi batangije  igihembwe cy’ihinga 2024A

Ubutumwa bundi bwatanzwe na Minisitiri, yakanguriye abaturage gufata neza imiyoboro y’amazi yubatswe mu gishanga, kurwanya isuri, gukorera urutoki, gukunda no gukora ubuhinzi bw’umwuga.

Icyo gishanga cya Gikoro gifite Hegitari 86. ahatangirijwe igihembwe cy’ihinga 2024A, Minisitiri w’Ubuhinzi n’Ubworozi Dr. Musafili Ildephonse yifatanyije n’abahinzi bakorera muri koperative COAMALEKA, kiri hagati y’Imirenge ya Karama, Gacurabwenge na Rukoma; ahateguwe intabire no gutera imbuto y’ibigori.

NYIRANEZA JUDITH