Kabgayi: Imibiri 21 y’abazize Jenoside yashyinguwe mu cyubahiro

  • NTAWITONDA JEAN CLAUDE
  • Kamena 2, 2022
  • Hashize imyaka 2
Image

Ku Rwibutso rwa Jenoside rwa Kabgayi habereye igikorwa cyo kwibuka ku nshuro ya 28 Jenoside yakorewe Abatutsi mu 1994, uyu munsi taliki ya 2 Kamena hashyingurwa mu cyubahiro imibiri 21 y’abazize Jenoside yabonetse hirya no hino mu Karere ka Muhanga.

Mu ijambo ry’ikaze yagejeje ku mbaga, Umuyobozi w’Akarere ka Muhanga, Kayitare Jacqueline yashimiye abitabiriye ndetse anagaruka ku mateka ya Jenoside yakorewe Abatutsi i Kabgayi.

Yihanganishije imiryango ifite abayo bashyinguwe mu cyubahiro uyu munsi, ndetse n’abatarabona imibiri y’ababo ngo ishyingurwe mu cyubahiro. Yanaboneyeho gushimira abahagaritse Jenoside, bakagarura umutekano n’ituze mu Gihugu, bakimakaza Ubumwe n’Ubwiyunge.

Meya Kayitare yagize ati: “Ku Musozi wa Kabgayi ni mu Murenge wa Nyamabuye aho ubwo Jenoside yakozwe kuva muri Mata 1994 kugeza aho yashoboye guhagarikwa kuri uyu musozi ku italiki ya 2 Kamena 1994, hari hahungiye Abatutsi baturutse impande zose baturutse muri iki gihugu basaga 50, 000”.

Yongeyeho ati: “Kubera ko ari ahantu hari hafite amateka akomeye mu bijyanye n’iyobokamana, abahabungiye bahagiriye icyizere ko urupfu rubi Abatutsi bicwaga bibwiraga ko bashobora kuharokokera ariko si ko byagenze kuko abasaga 35, 000 bahiciwe ndetse abandi barahakuwe bagiye kujugunywa muri Nyabarongo, abandi bajya kwicirwa i Kibirira ariko no hirya no hino ku mabariyeri yari akikije uyu musozi wa Kabgayi ubuzima bw’Abatutsi bwarahatikiriye”.

Aba ni abari mu muhango wo Kwibuka ku nshuro ya 28 Jenoside yakorewe Abatutsi mu 1994, ku Rwibutso rwa Kabgayi (Foto Akarere ka Muhanga)

Taliki ya 2 Kamena irakomeye kuri Kabgayi

Italiki ya 2 Kamena ni italiki ikomeye cyane ku buzima bw’Abatutsi barokokeye i Kabgayi, ni italiki yashyizeho iherezo ku bwicanyi bwahakorerwaga kubera ingabo zahoze ari iza RPA zabarokoye.

Bishwe urupfu rubi, hari abatemwe, abarashwe, abahambwe bagapakirwa mu byobo badapfuye, hari abapakiwe muri bisi bajya kurohwa.

Umushyitsi Mukuru Minisitiri wa Minisiteri y’Ubumwe bw’Abanyarwanda n’Inshingano mboneragihugu MINUBUMWE, Dr. Bizimana Jean Damascene yasabye Abarokotse Jenoside n’abafite ababo bashyinguwe mu cyubahiro uyu munsi, gukomera.

Minisitiri Dr. Bizimana Jean Damascene yagaragaje uburyo Jenoside yateguwe kera (Foto Akarere ka Muhanga)

Yavuze ko inkambi ya Kabgayi ari yo mu Rwanda  yarokowemo Abatutsi benshi, kuko Inkotanyi zagezemo zigwa  gitumo abicanyi bagitegura umugambi wo kubatsemba.

Yavuze ko Jenoside ari umugambi wo gutsemba icyiciro cy’abantu, itsinda ry’abantu, babahora icyo ari cyo, ubwoko.  Abatutsi rero mu Rwanda, Leta yagize umugambi wo kubatsemba kandi irabikora. Uwo mugambi si uwavuba uturuka mu mateka ya kera utangirana n’abakoloni baje mu Rwanda ku nyungu zabo batanya Abanyarwanda.

Jenoside si iyo mu 1994 yateguwe kera

Minisitiri wa MINUBUMWE yagarutse ku mateka ya Jenoside agaragaza ko Abatangije politiki yo gusenya, kwica Abatutsi, ingengabitekerezo ya Jenoside bamwe muri bo babitangirije i Gitarama, abandi babitangiriza i Butare.

Dr. Bizimana yasobanuye ko uretse abakoloni bari bafite politiki itandukanya Abanyarwanda, umugambi wo gutsemba Abatutsi ari uwa kera watangiranye n’abakoloni hanyuma batizwa umurindi na bamwe mu banyarwanda ubwabo hashingiwe ku mashyaka.

Ati: “Ariko nubwo ari bo batangije irondakoko batijwe umurindi na bamwe mu Banyarwanda ubwabo bashinze amashyaka ya politiki  ashingiye ku bwoko bumwe (APROSOMA na PARMEHUTU) mu nyito yayo muri politiki, mu miterere yayo akumva ko umunyarwanda ari umuhutu gusa, utari umuhuntu si umunyarwanda by’umwihariko Umututsi”.

Ayo mashyaka yabigizemo uruhare rw’ibanze ariko ubu dufite politiki yubaha buri umunyarwanda imuha agaciro idashingiye ku cyiciro icyo ari cyo cyose runaka.

Ikindi kandi yagaragaje amataliki n’abagiye bakora inyandiko uko buri gihe iyo Abatutsi bamaraga kwicwa hakurikiragaho inyandiko isobanura ko kwicwa kwabo byari ngombwa, ndetse bikagerekwa ku Batutsi kuba ari bo ba nyirabayazana b’iyicwa ryabo.

Yatanze urugero ku nyandiko yanditswe na Rwasibo Jean Baptiste umwe mu bayobozi bakuru ba PARMEHUTU, wanabaye shefu mu Bufundu mu 1960, ubu ni mu Karere ka Nyamagabe. Abatutsi bamaze kwicwa mu 1959 yanditse inyandiko mu izina rya Parmehutu ku italiki ya 17 Ugushyingo 1959 yavugaga impamvu Abatutsi bishwe ariko inateganya icyo Abatutsi bagomba gukomeza gukorerwa mu bihe biri imbere.

Dr. Bizimana yakomeje agaragaza uburyo Abatutsi babujijwe gukomeza mu mashuri, barakumirwa kugira ngo batazashyirwa mu nzego z’imirimo.

Yashimye ubwitange n’ubutwari byaranze Inkotanyi zakomye mu nkokora abari bagamije kuzimya Abatutsi ngo barangire. Yanashimye abarokotse Jenoside bakomeje gutwazanya bihanganiye ingaruka zikomeye za Jenoside. Abaharokokeye bakihanganira ibyo bikomere bitoroshye bagakomeza gufatanya n’abandi kubaka igihugu, ubwo ni ubutwari tuzahora tubashimira.

Senateri Dr. Havugimana Emmanuel yatanze ikiganiro gifite umutwe ugira uti ‘Kwibuka-Twahisemo kuba umwe’ agaruka ku ruhare rw’Ingengabitekerezo ya Jenoside mu gusenya ubumwe bw’Abanyarwanda kugeza kuri Jenoside yakorewe Abatutsi.

Senateri Emmanuel Havugimana atanga ikiganiro (Foto Akarere ka Muhanga)

Muri iki kiganiro, yifashishije ingero z’amateka y’itotezwa ry’Abatutsi mu cyahoze ari Perefegitura ya Gitarama.

Yakomeje agira ati: “Kabgayi ni ahantu h’amateka ni ho havukiye PARIMEHUTU n’ibyayibanjirije, italiki nkuru ni inyandiko yasohotse ku italiki 24.3.1957 inyandiko bise Manifeste des Bahutu yasinywe n’abantu 29 yoherejwe mu Muryango w’Abibumbye bashaka kwerekana akarengane gakabije kari kari mu Banyarwanda.

Ikindi gihe Ubutumwa abasenyeri boherereza abakirisitu mu gihe cy’igisibo, mu 1959 bwoherejwe na Arikipesikopi Mgr Peraudin ngo  urukundo mbere ya byose, ariko amagambo yarimo si ay’urukundo ahubwo yari amagambo azana umwiryane mu baturage.

Yagarutse ku ruhare rwa bamwe mu Barinzi b’Igihango mu kurokora Abatutsi ndetse no mu kwimakaza Ubumwe n’Ubwiyunge nyuma ya Jenoside, asaba buri wese kububumbatira

Uwatanze ubuhamya warokokeye i Kabgayi Ingabire Alice wo mu Murenge wa Kabacuzi, mu Kagari ka Ngarama ahahoze ari muri Bulinga   yagarutse ku buzima bugoye banyuzemo, mbere ya Jenoside aho yumvaga yava mu ishuri kubera itotezwa bakorerwaga ndetse n’ihezwa mu bikorwa bimwe na bimwe byo mu ishuri kuko ari Abatutsi.

Ingabire Alice iburyo yatanze ubuhamya ku nzira ndende igoye Abatutsi banyuzemo (Foto Akarere ka Muhanga)

Mu magambo arambuye yagarutse ku rugendo rutoroshye we n’abo bari kumwe, banyuzemo muri Jenoside yakorewe Abatutsi mu 1994.

Yagize ati: “Jenoside itangira iwacu ku italiki 7 Mata nabonye Papa na Mama bavuga ngo Habyarimana yapfuye, bati noneho birarangiye ubona ko bacitse intege bwaracyeye ku italiki 8, Data wacu baraje bamutwarira inka avuza induru baramubwira ngo ceceka akanyu kashobotse”.

Yakomeje agaragaza urugendo bakoze rutoroshye kurinda bagera i Kabgayi, uburyo bacunaguzwaga ndetse bakabwirwa amagambo abashinyagurira ngo nimukomeze muzagwe ku bandi.

Abarokokeye i Kabgayi barebanye n’urupfu

Perezida wa IBUKA, Rudasingwa Jean Bosco mu ijambo rye, yatangiye asobanura ko Abarokotse Jenoside bataheranywe n’agahinda, ahubwo ubu bafite icyizere cy’ubuzima bahawe na Leta y’Ubumwe bw’Abanyarwanda ifite imiyoborere myiza itavangura.

Yavuze ko ibyabereye i Kabgayi ari agahomamunwa, ari Jenoside kuko nta yindi nyito byahabwa.

Ati: “Amateka ya Jenoside yakorewe Abatutsi ni maremare, ariko Kabgayi byo ni umwihariko, hari abihayimana bagize uruhare muri Jenoside, n’abayobozi babigizemo uruhare mu gutoteza Abatutsi by’umwihariko mu mashuri.

Leta yiyise iy’abatabazi, ari abo mu nzego z’umutekano, abihaye imana . […], abaforomo kugeza naho hari bamwe bari bashinzwe gutanga ubutabazi ahubwo bahorahoje abari bakomeretse”.

Jean Bosco Rudasingwa uhagarariye IBUKA mu Karere ka Muhanga yashimye ko ubu hariho Leta nziza itavangura Abanyarwanda (Foto Akarere ka Muhanga)

Yongeyeho ati: “Abaharokokeye barebanye n’urupfu, barasenyewe, baramugajwe, bishwe n’inyota n’inzara, babonye ababo bicwa urw’agashinyaguro, babonye abapakiwe bajya kurohwa muri Nyabarongo, babonye ibirenze ubwenge bwa muntu”.

Yanaboneyeho gushima abahagaritse Jenoside ndetse na Leta y’Ubumwe bw’Abanyarwanda yashyizeho gahunda ya Ndi Umunyarwanda igamije kwimakaza Ubumwe n’Ubwiyunge bw’Abanyarwanda.

Rudasingwa yasabye ko amateka ya Jenoside yakorewe Abatutsi i Kabgayi yakomeza Kwegeranywa kubungabungwa bya kinyamwuga kandi bikagendana no kunoza imyubakire y’uru rwibutso.

Yasoje asaba abafite amakuru y’ahakiri imibiri itaraboneka, kuyatanga kugira ngo ishyingurwe mu cyubahiro.

Abafashe ijambo bose bashimiye Ingabo zari iza RPA zari zirangajwe imbere na Nyakubahwa Perezida Paul Kagame, zarokoye Abatutsi bahigwaga muri Jenoside yakorewe Abatutsi mu 1994.

  • NTAWITONDA JEAN CLAUDE
  • Kamena 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE