Justin Trudeau waganiriye na Perezida Kagame yemeje kuzitabira CHOGM

  • NTAWITONDA JEAN CLAUDE
  • Kamena 16, 2022
  • Hashize imyaka 2
Image

Kuri uyu wa Kane taliki ya 16 Kamena 2022 ni bwo Perezida wa Repubulika y’u Rwanda Paul Kagame yagiranye ibiganiro ku murongo wa telefoni na Minisitiri w’Intebe wa Canada Justin Trudeau, byibanze ku ngingo z’ubutwererane ibihugu byombi bihuriyeho haba hagati yabyo cyangwa ku rwego mpuzamahanga.

Perezida Kagame yavuze ko yanyuzwe n’ibyavuye muri ibyo biganiro byasoje ashimangiye ko yishimiye kumwakira mu nama ya 26 y’Abakuru b’Ibihugu na Guverinoma byo mu Muryango w’Ibihugu bikoresha Ururimi rw’Icyongereza (CHOGM2022) izateranira i Kigali hagati y’italiki ya 20 kugeza ku ya 26 Kamena.

Yagize ati: “Nagiranye ikiganiro cyiza kuri telefoni na Minisitiri w’Intebe Justin Trudeau, ku ngingo zireba ibihugu byombi ndetse n’Isi yose dufitemo inyungu. Nejejwe no kumwakira muri CHOGM2022 mu cyumweru gitaha, hamwe n’abandi bayobozi, kandi niteguye kwagura ibiganiro n’ubutwererane byacu.”

Minisitiri w’Intebe Trudeau na we yamaze kwemeza ko azitabira CHOGM 2022 yari imaze imyaka igera kuri ine itegerejwe i Kigali nyuma yo gukomwa mu nkokora n’icyorezo cya COVID-19 mu myaka ibiri yikurikiranyije.

Uyu muyobozi yashyize hanze itangazo rishimangira ko uretse kwitabira iyo nama izabera i Kigali, mu byumweru bibiri biri imbere azanitabira Inama y’Umuryango wa NATO ndetse n’uwa G7 mu rwego rwo gukomeza guharanira kunoza umubano mpuzamahanga no gushakisha ibisubizo by’ibibazo byugarije Isi.

Ibiro bya Trudeau bivuga ko kuri ubu icyo ashyize imbere ari ugushimangira ubufatanye mpuzamahanga by’umwihariko mu rwego rwo kubungabunga amahoro, umutekano, guharanira uburenganzira bwa muntu, guhangana n’imihindagurikire y’ikirere, no kwimakaza iterambere ry’ubukungu butagira n’umwe buheza.

Minisitiri w’Intebe wa Canada Justin Trudeau, afite ingendo zirimo n’urwerekeza i Kigali mu byumweru bibiri biri imbere

Ibyo biro bivuga ko mu nama ya CHOGM yitezwe i Kigali mu minsi itatu iri imbere, Trudeau azitabira guhera ku ya 23 kugeza ku ya 25 Kamena, akaba azagaragaza ubushake afite bwo gukorana n’ibindi bihugu mu guhagarika intambara y’u Burusiya muri Ukraine.

Inama y’Umuryango w’Ibihugu 7 bikize ku Isi yitezwe kubera i Schloss Elmau mu Budage ku ya 26 kugeza ku ya 28, na yo izibanda ku ntambara y’u Burusiya na Ukraine, ariko abayobozi bakazagaruka no ku ngamba zo kugeza inkingo za COVID-19 kuri bose.

Mu nama y’Umuryango w’Ubwirinzi bwa gisirikare bw’Amerika n’u Burayi (NATO) izabera i Madrid muri Esipanye (Spain) hagati ya 28 na 30, Trudeau yitezweho kuzatanga ikiganiro kigaruka ku bibazo by’umutekano byambukiranya inyanja y’Atalantika.

Uyu muyobozi arateganya kuzasoreza ingendo ze ku ruzinduko ruzamuhuza na Minisitiri wa Esipanye Pedro Sanchez taliki ya 30 Kamena. Ati: “Kubungabunga demokarasi n’uburenganzira bwa muntu, guhangana n’igiciro cy’imibereho gikomeje gutumbagira, ndetse no gufata ingamba ku ihindagurika ry’ikirere ni byo bizaranga ubufatanye bw’abazahurira mu nama ya CHOGM, G7 na NATO”

Yakomeje avuga ko yiteguye guhura n’abayobozi batandukanye mu minsi iri imbere, bakaba bazahuza imbaraga mu gukemura zimwe mu ngorane zikomeye Isi ihura na zo hagamijwe kurushaho kunoza ubuzima n’imibereho by’abayituye.

  • NTAWITONDA JEAN CLAUDE
  • Kamena 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE