Jr NBA League 2023: LDK na GS Marie Reine Rwaza zegukanye ibikombe

  • NYIRANEZA JUDITH
  • Ugushyingo 27, 2023
  • Hashize amezi 3
Image

Amakipe ya Lycée de Kigali “Cleveland Cavalier” mu bahungu ndetse na GS Marie Reine Rwaza “Utah Jazz” mu bakobwa ni yo yegukanye ibikombe bya shampiyona y’umukino wa Basketball mu batarengeje imyaka 15 “Jr NBA League 2023”.

Iyi shampiyona yateguwe n’ishyirahamwe ry’umukino wa Basketball mu Rwanda “FERWABA” ku bufatanye na NBA yatangiye tariki 21 Ukwakira 2023 isozwa ku wa Gatandatu, tariki 25 Ugushyingo 2023.

Yari yahurije hamwe abana baturutse mu bice bitandukanye by’igihugu bagera kuri 810 barimo 360 b’abakobwa na 450 b’abahungu, baturutse mu makipe 30 y’abahungu na 24 y’abakobwa.

Buri kipe y’ikigo cy’ishuri muri buri cyiciro, yahawe izina ndetse n’imyambaro y’amakipe (30), asanzwe akina muri shampiyona ya Basketball yo muri Leta zunze Ubumwe z’Amerika “NBA”.

Mu cyiciro cy’abahungu, ikipe LDK yiswe Cleveland Cavaliers ibarizwa mu gice cy’Iburasirazuba yegukanye  igikombe itsinze Petit Seminaire St Aloys yiswe LA Lakers yo mu gice cy’Uburengerazuba ku mukino wa nyuma amanota 60 kuri 30.

Mu bakobwa GS Marie Reine Rwaza “Utah Jazz” yabaye iya mbere mu gice cy’Uburengerazuba yegukanye igikombe ikipe ya ESB Kamonyi “Dallas Mavericks” yabaye iya mbere mu gice cy’Uburasirazuba itsinze ku mukino wa nyuma ku manota 69 kuri 51.

Mu bihembo byatanzwe ku bakinnyi bitwaye neza, Ian Cruz Kabutura ukinira ikipe LDK “Cleveland Cavaliers”  yahawe igihembo cy’uwahize abandi mu bahungu naho mu bakobwa gihabwa Iragena Mahoro Emeline ukinira GS Marie Reine Rwaza  “Utah Jazz”.

Visi Perezida muri FERWABA akaba ashinzwe amarushanwa, Richard Nyirishema yagaragaje ko irushanwa rya Jr NBA League, ribafasha kubona impano z’abakiri bato  ndetse no kuzizamura.

Ian Cruz Kabutura ukinira ikipe LDK yatangaje ko gukora cyane ndetse no kwigirira icyizere biri mu byamufashije gufasha ikipe ye gutwara igikombe ndetse no kuba uwahize abandi mu cyiciro cy’abahungu.

Ku rundi ruhande, Iragena Mahoro Emeline wishimiye kuba yagize uruhare mu guhesha ikipe ye gutwara igikombe cy’iri rushanwa mu bakobwa, yagaragaje ko gukorera hamwe ari  yo ntwaro bakoresheje.

Ni ku nshuro ya kabiri hakinwaga iyi shampiyona ya Jr NBA League mu batarengeje imyaka 15, aho yaherukaga kuba mu mwaka wa 2018, ari nabwo yatangizwaga ku mugaragaro mu Rwanda.

Mu 2018, iyi shampiyona yahuje ibigo by’amashuri 30 mu bahungu n’abakobwa, ibikombe byatwawe na Green Hills mu bahungu, itsinze Sunrise High School ku mukino wa nyuma amanota 52 kuri 28  naho mu bakobwa ADEGI Gituza yegukana igikombe  itsinze ISF Nyamasheke amanota 50 kuri 40.

  • NYIRANEZA JUDITH
  • Ugushyingo 27, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE