Joseph Boakai ni we Perezida mushya wa Liberia

  • KAMALIZA AGNES
  • Ugushyingo 20, 2023
  • Hashize amezi 3
Image

Ku myaka 78, Joseph Boakai ni we Perezida mushya wa Liberia nyuma yo kwegukana intsinzi mu matora yahigitsemo uwari Perezida w’iki guhugu   George Weah nk’uko byemejwe mu mpera z’icyumweru gishize.

Komisiyo ishinzwe amatora muri iki gihugu yatangaje, ku wa 18 Ugushyingo, ko Joseph Boakai wahoze ari Visi Perezida ari we watsinze amatora ku majwi 50.9%, mu gihe George Weah yagize amajwi 49.1% mu majwi yose yabaruwe.

Weah wari Perezida kuko yari yatsinze Boakai mu matora yo mu 2017, na we yemeye ko yatsinzwe mu matora yemera kuva ku butegetsi kuko afitiye icyizere ibyavuye mu matora.

Yagize ati: “Amanota yatangajwe by’agateganyo agaragaza ko Bokai ari we uyoboye kandi ntitwabirengaho.”

Weah yagiye ashinjwa kutubahiriza ibyo yasezeranyije abaturage nko kurwanya ruswa no kunanirwa gukemura ibibazo by’ubukene bigaragara muri iki gihugu.

Mu ijambo rye, Weah yakomeje agira ati: “Abaturage ba Liberiya bavuze kandi twumvise ijwi ryabo. Ndabasaba gukurikiza urugero rwanjye no kwemera ibyavuye mu matora igihe cyacu kizongera kugera  mu 2029, igihe manda y’imyaka itandatu ya Boakai izaba irangiye.”

Weah wahoze akina umupira w’amaguru ku rwego mpuzamahanga yari yatsinze n’ubundi Boakai mu amatora ya Perezida mu 2017, ku majwi 62%.

Icyo gihe yasezeranyije abaturage  kurwanya ubukene, guteza imbere ibikorwa remezo by’igihugu no kurwanya akarengane na ruswa.

Ariko abaturage batangiye kumutakariza icyizere ubwo yashinjwaga kutubahiriza ibyo yabasezeranyije ubwo yiyamamazaga.

Nyuma yo gutsinda amatora, Joseph Boakai yatangarije Ibiro Ntaramakuru by’Abongereza (Reuters) ko ashimira abaturage bamugiriye icyizere kandi ko imbere hari akazi ko gukora, mbere ya byose abagezaho ubutumwa bw’amahoro n’ubwiyunge.

Intsinzi ya Boakai ije mu gihe Liberiya igerageza kwikura mu ngaruka  z’intambara ebyiri z’abenegihugu hagati ya 1989 na 2003, zahitanye byibuze abantu 250 000, ndetse n’icyorezo cya Ebola cyabaye mu myaka ya za 2010 cyahitanye ibihumbi.

KAMALIZA AGNES

  • KAMALIZA AGNES
  • Ugushyingo 20, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE