Jeannette Kagame yifatanyije na ‘Africa New Life Ministries’ kwizihiza isabukuru y’imyaka 25 

Madamu Jeannette Kagame, kuri iki Cyumweru tariki ya 11 Ukwakira 2026, yifatanyije n’Umuryango wa Gikirisitu ‘Africa New Life Ministries’ kwizihiza imyaka isabukuru y’imyaka 25 umaze ukora ibikorwa bihindura ubuzima bw’Abanyarwanda binyuze mu  ivugabutumwa, uburezi, ubuvuzi n’iterambere ry’abaturage.

Ibirori byo kwizihiza iyi sabukuru byabereye muri BK Arena i Kigali, byitabirwa n’ibihumbi by’abizera, abanyeshuri, abarangije kwiga mu bigo bikorana n’uyu Muryango ndetse n’abafatanyabikorwa banyuranye.

Iyi sabukuru ifite insanganyamatsiko igira iti “Imyaka 25 y’ubudahemuka ku Mana”, igamije kwizihiza urugendo rw’imyaka 25 uru rwego rumaze rutanga umusanzu mu mibereho y’Abanyarwanda binyuze mu bikorwa bitandukanye. Mu bikorwa byaranze uru rugendo harimo guteza imbere uburezi n’ubuvuzi, gufasha urubyiruko kwiteza imbere no kurutoza kuyobora, guteza imbere abagore ndetse n’ivugabutumwa rya Gikirisitu.

Iyi sabukuru kandi ni umwanya wo kuzirikana ibikorwa byakozwe mu myaka 25 ishize, uruhare rw’abafatanyabikorwa n’umusanzu w’abagiye banyura muri gahunda zitandukanye za ‘Africa New Life Minisitries’.

Kuva yatangira mu mwaka wa 2001, ‘Africa New Life Minisitries’ yibanze ku bikorwa bigamije guhindura imibereho y’abantu, binyuze mu kubaka ubushobozi, guteza imbere ubumenyi no kwimakaza indangagaciro za Gikirisitu.

Kwizihiza iyi myaka 25 birafatwa nk’umwanya wo gushimira Imana ku rugendo rw’imyaka ishize no kureba ahazaza mu gukomeza ibikorwa by’ivugabutumwa n’iterambere ry’abaturage.

Uyu Muryango watangijwe na Rev. Past. Dr. Charles Mugisha n’umugore we Florence Mugisha, bafatanyije n’inshuti zabo zo mu Rwanda no mu mahanga, uru rugendo rukaba rwaratangiriye mu Karere ka Kayonza na gahunda yo gufasha abana 30 kubona uburezi binyuze mu baterankunga babishyuriraga amashuri.

Mu 2002, batangije ishuri ry’inshuke i Kayonza, ryari rifite aho rihurira na gahunda yo gufasha abana kuko bari batangiye kubona abaterankunga. Mu 2003, iryo shuri ryaragutse rihinduka ‘New Life Christian Academy’, hanashingwa ‘New Life Bible Church i Kigali.’

Ibikorwa by’ivugabutumwa, iby’uburezi n’iterambere ry’abaturage byakomeje kwaguka, urubyiruko rw’u Rwanda rwungukiye cyane muri ibyo bikorwa byagiye bibaherekeza kugeza mu mashuri makuru ba Kaminuza. 

Mu gihe yizihiza imyaka 25 mu 2026, ‘Africa New Life Ministries’ ivuga ko imaze gufasha abanyeshuri barenga 21 000 kubona uburezi binyuze muri gahunda z’abaterankunga. ‘Africa New Life Minisitries’ yaguye ibikorwa byayo birenga uburezi n’ivugabutumwa, yinjira no mu buvuzi no mu gufasha abagore kwiteza imbere.

Mu 2005, hatangijwe ‘New Life Family Center’ i Kigali, igamije gufasha abagore batishoboye kubona ubumenyi bw’imyuga no gukura mu buryo bw’umwuka. Mu 2012, hatangijwe ‘Dream Beauty Academy’ itanga amahugurwa ajyanye n’ubwiza n’imyuga ifasha abagore kwihangira imirimo.

Mu 2015, hatangiye kubakwa ikigo cy’ubuvuzi ‘Dream Medical Center (DMC)’ cyafunguriwe abaturage mu mwaka wa 2018. Iki kigo cy’ubuvuzi cyabaye kimwe mu bikorwa by’ingenzi by’Umuryango mu rwego rwo gufasha abantu kubona serivisi z’ubuvuzi zigezweho kandi zinoze.