Jamaica yishimiye uruzinduko rwa mbere rwa Perezida Kagame

  • NTAWITONDA JEAN CLAUDE
  • Mata 14, 2022
  • Hashize imyaka 2
Image

Leta ya Jamaica yishimiye kwakira Perezida wa Repubulika y’u Rwanda Paul Kagame, waraye ageze i Kingston mu Murwa Mukuru w’icyo Gihugu ku wa Gatatu, mu ruzinduko rwe rw’akazi rwa mbere rubonwa nk’amahirwe akomeye yo kurushaho kunoza umubano w’ibihugu byombi.

Minisitiri w’Intebe wa Jamaica Andrew Holness, yagize ati: “Ikaze ryinshi kuri Nyakubahwa Paul Kagame, Perezida wa Repubulika y’u Rwanda, n’itsinda ryaje rimuherekeje… Nyakubahwa Paul Kagame yakiriwe mu cyubahiro gihabwa Abakuru b’Ibihugu n’abandi banyacyubahiro. Uru ruzinduko rugaragaza urwego rushya mu mibanire yacu kandi ntegereje cyane cyane ubutwererane buzakomeza gushimangira ubucuti n’ubufatanye hagati ya Jamaica n’u Rwanda.”

Ibiro bya Minisitiri w’Intebe wa Jamaica byatangaje ko urwo ruzinduko ari urw’agaciro gakomeye kuko rubaye mu gihe iki gihugu cyizihiza Yubile y’Imyaka 60 kimaze kibonye ubwigenge nyuma yo kuva mu bukoloni bw’u Bwongereza. Ku mugoroba wo ku wa Gatatu ni bwo Andrew Holness yatangije ku mugaragaro ibirori byo kwizihiza iyi yubile y’imyaka 60.

Itangazo ryashyizwe ahagaragara n’Ibiro bya Minisitiri w’Intebe riragira riti: “Uru ruzinduko rutanga amahirwe y’ingenzi yo gushimangira umubano wa Jamaica na Repubulika y’u Rwanda, no kongerera ingufu umubano wiyongera ubutitsa hagati y’Umugabane w’Afurika n’Umuryango wa CARICOM (w’ibihugu bya Carraibbes).”

U Rwanda na rwo ruri hafi kwizihiza isabukuru y’imyaka 60 rubonye ubwigenge nyuma yo kuva mu maboko y’u Bubiligi.

Minisitiri w’Intebe wa Jamaica Andrew Holness, yatumiye Perezida Kagame mu myaka ibiri ishize, ariko urwo ruzinduko rukomeza gutinzwa n’uko Isi yari ihanganye n’ibihe bitoroshye by’icyorezo cya COVID-19 guhera mu mwaka wa 2020.

Biteganyije ko Perezida Kagame agirana ibiganiro byihariye na Minisitiri w’Intebe Andrew Holness, nyuma y’aho ku wa Gatatu yashyize indabo ku Rwibutso rw’Intwari ya mbere ya Jamaica Marcus Mosiah Garvey ruherereye ku Gicumbi cy’Intwari cy’Igihugu.

Perezida ari mu banyacyubahiro bitabiriye umuhango wo gutangiza ku mugaragaro ibirori byo kwizihiza Yubiile y’imyaka 60 y’Ubwigenge bwa Jamaica (Jamaica 60).

Kuri uyu wa Kane, Perezida Kagame arahura na Guverineri Mukuru wa Jamaica Sir Patrick Linton Allen na Lady Allen ku Ngoro y’Abami (Kings House).

Ahagana saa munani zo muri icyo Gihugu, Perezida Kagame arageza ijambo ku bagize Inteko Ishinga Amategeko imitwe yombi muri Jamaica. Nyuma yaho biteganyijwe ko aza guhura na Mark Jefferson Goldingn uyoboye Ishyaka riri ku butegetsi muri Jamaica.

Ku wa Gatanu, ni bwo Perezida Kagame azagirana ibiganiro na Minisitiri w’Intebe wa Jamaica. Ni ibiganiro bibaye mu gihe Perezida Kagame yitegura kuba Umuyobozi (Chairman) w’Inama y’Abakuru b’Ibihugu na Guverinoma bihuriye mu Muryango ukoresha Ururimi rw’Icyongereza (CHOGM) mu gihe cy’imyaka ibiri.

Inama ya CHOGM 2022 yitezwe kubera i Kigali mu cyumweru gizatangira taliki ya 20 Kamena 2022, ari na ho hazafatirwa umwanzuro ku muntu uzaba Umunyamabanga w’Umuryango w’Ibihugu bikoresha Icyongereza (Commonwealth) mu gihe cy’imyaka ine.

Minisitiri w’Ububanyi n’Amahanga akaba na Minisitiri w’Ubucuruzi wa Jamaica Kamina Johnson Smithndetse na Baroness Patricia Scotland ni bo baza imbere mu bahatanira uwo mwanya kugeza ubu.

Uruzinduko rwa Perezida Kagame muri Jamaica rukurikiye urw’Ibikomangoma by’u Bwongereza, Prince William na Miss Catherine Middleton (Kate), byagiriye muri icyo gihugu mu kwezi gushize.

Prince William n’umugore we Kate bakoreye uruzinduko muri icyo gihugu hagati y’italiki ya 22 n’iya 24 Werurwe 2022, mu rwego rwo kwizihiza Yubile y’imyaka 70 Umwamikazi w’u Bwongereza amaze yimitswe no kwizihiza isabukuru y’imyaka 60 amaze yemeje ko icyo gihugu kibonye ubwigenge.

Igihugu cya Jamaica kigizwe n’ikirwa cyizihiza Umunsi w’Ubwigenge buri mwaka taliki ya 8 Kanama, kuko italiki nk’iyo mu 1962 ari bwo cyahawe ubwigenge kikava mu maboko y’Abongereza bakiyoboye guhera mu 1655 kivuye mu maboko ya Esipanye yagikolonije guhera mu 1509.

Hagati aho Ambasaderi Uhoraho w’u Rwanda mu Muryango w’Abibumbye Claver Gatete yaraye ashyikirije Guverineri wa Jamaica Sir Patrick Allen, impapuro zimwemerera guhagararira u Rwanda muri icyo Gihugu.

Mbere yo gutanga izo mpapuro, Amb Gatete yabanje kugirana ibiganiro na Minisitiri w’Ububanyi n’Amahanga n’Ubucuruzi wa Jamaica Sen. Kamina Johnson, byibanze ku kungurana ibitekerezo ku nzego z’ubutwererane zirimo siporo, ubukerarugendo n’iterambere.

  • NTAWITONDA JEAN CLAUDE
  • Mata 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE