Iwawa: Urubyiruko ruri mu igororero rusabwa kubyaza umusaruro imyuga rwigishijwe

Urubyiruko rugororerwa mu igororero rya Iwawa, rurimo gutegurirwa gusubira mu buzima busanzwe rwasabwe kubyaza umusaruro imyuga rwigishijwe.

Ni igikorwa cyabaye ku wa Mbere tariki ya 8 Mutarama 2024, ubwo ba Guverineri b’Intara y’Uburengerazuba Dushimimana Lambert n’uw’Intara y”Amajyepho Kayitesi Alice bari kumwe n’Abayobozi b’Uturere basuye urubyiruko ruri mu Kigo ngororamuco cya Iwawa mu Karere ka Rutsiro mu rwego rwo gusesengura ibibazo bafite no gutegura gahunda inoze yo kubasubiza mu buzima busanzwe.

Mu butumwa yabagejejeho, Guverineri Dushimimana yabwiye uru rubyiruko ruri mu kigo ngororamuco cya Iwawa ko Uturere twabo twiteguye kubakira, arusaba kuziteza imbere bisunze imyuga bagishijwe.

Yagize ati: “Uturere twanyu twiteguye kubakira. Murasabwa rero kuza mwarahindutse, mugashyira mu ngoro imyuga mwigiye hano kwiteza imbere bikabafasha kwiteza imbere binateza imbere Igihugu”.

Ba Guverineri bari kumwe n’Umuyobozi Mukuru w’Ikiigo cy’Igihugu gishinzwe Igororamuco, NRS Mufuluke Fred n’Abayobozi b’Uturere bari basuye Ikigo Ngororamuco cya Iwawa mu rwego rwo kuganiriza abari kuhagororerwa bakomoka mu Turere bayobora no gutegura uburyo bunoze bwo kubasubiza mu buzima busanzwe.

Mbere yo kuganira n’uru rubyiruko, abayobozi basuye ibikorwa bitandukanye bigishwa birimo ibijyanye n’ubuhinzi, ubwubatsi, ububaji, ubudozi kugira ngo mu gihe bazaba basubiye mu Turere twabo, imyuga bize izabafashe kwiteza imbere.

Iki kigo ngororamuco cya Iwawa kirimo urubyiruko rugera ku 5039 harimo 760 bakomoka mu Ntara y’Iburengerazuba.