Isiraheli- Hamas: Ibitero bikaze birakomeje kuri Khan Younes

  • NYIRANEZA JUDITH
  • Ukuboza 11, 2023
  • Hashize amezi 6
Image

Kuri uyu wa Mbere tariki 11 Ukuboza2023, ibitero bya Isiraheli n’imirwano ikaze byakomeje mu karere ka Gaza, mu gihe ku Cyumweru, Minisitiri w’Intebe muri Isiraheli Netanyahu Benjamin yahamagariye Hamas gushyira intwaro hasi.

Ku cyumweru, Hamas yamenyesheje ko nta n’umwe mu bari bagizwe ingwate mu karere ka Gaza uzavamo ari muzima hatabayeho kungurana ibitekerezo no kugirana imishyikirano, kandi hatujujwe ibyifuzo by’abarwanyi, nk’uko byatangajwe na Abou Obeida, umuvugizi wa Brigade ya Al-Qassam.

Ibimodoka by’intambara bya Isiraheli byagaragaye rwagati muri Khan Younes, agace gakomeye ko mu majyepfo ya Palesitine, kahindutse intandaro y’imirwano, ikaba ikomeje no kuzenguruka umujyi wa Gaza, mu majyaruguru.

Ni mu gihe, ku cyumweru, tariki ya 10 Ukuboza mu majyepfo y’akarere ka Gaza, habaye imirwano ikaze hagati y’ingabo za Isiraheli n’umutwe w’abayisilamu bo muri Palesitine Hamas, yatumye abantu ibihumbi amagana bagotwa.

Isiraheli iratangaza kandi ko ikomeje kwagura ibikorwa byayo by’intambara mu karere ka Gaza.

Byatangajwe ku Cyumweru tariki 10 na Minisitiri w’Intebe wa Isiraheli Benjamin Netanyahu i Yeruzalemu, ahamya ko Isiraheli izakomeza intambara ifite ishingiro yatangiye kugira ngo itsembe Hamas.

Yagize ati: “Twakiriye neza umwanzuro uboneye wo Amerika yafashe mu Kanama k’Umuryango w’Abibumbye gashinzwe amahoro ku Isi.

Ati: “Hamas nimanike amaboko, ishyire intwaro hasi. Byarangiye, imirwano na Hamas igeze ku musozo”.

Ingabo za Isiraheli zivuga ko zakajije umurego mu bikorwa byazo by’imirwano mu majyepfo y’akarere ka Gaza, cyane cyane hafi ya Khan Younes na Rafah.

Mu gutangira igitero cyayo ku butaka, Isiraheli yasabye abaturage bo mu majyaruguru y’agace ka Palesitina kujya mu majyepfo.

Ni mu gihe kandi ku mupaka wa Libani hari imirwano ikomeye hagati ya Hezbollah na Isiraheli guhera tariki ya 8 Ukuboza 2023.

Kurasana kubera ku ntera y’ibilometero ijana byasize nibura abasivili babiri bakomeretse muri Libani n’abasirikare babiri muri Isiraheli bituma umubare w’abasirikare ba Isiraheli bakomeretse mu masaha 48 bagera kuri 17, nk’uko bitangazwa n’umunyamakuru wa Radiyo Mpuzamahanga y’Abafaransa uri i Beirut, Paul Khalifeh.

Mu gihe cy’agahenge, abantu 110 bari bafashwe bugwate bagizwe n’Abisiraheli 86 n’abanyamahanga 24 barekuwe na Hamas, nk’uko Isiraheli ibivuga. Ku ruhande rwayo, Isiraheli yarekuye imfungwa 240 z’Abanyapalesitina. Isiraheli ivuga ko ingwate 137 zikomeje gufungirwa muri Gaza.

Ingabo za Isiraheli zavuze ko kugeza ubu abasirikare 101 bishwe mu bitero byo ku butaka bikomeje kubera mu karere ka Gaza.

Guverinoma ya Hamas ivuga ko Abanyapalestine bagera ku 17,997 baguye mu bitero bya Isiraheli muri Gaza kuva ku ya 7 Ukwakira. Abenshi ni abagore n’urubyiruko ruri munsi yimyaka 18. Abisiraheli barenga 1.200 ni bo bamaze kuhasoga ubuzima.

  • NYIRANEZA JUDITH
  • Ukuboza 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE