Isiraheli: Abasirikare 21 ni bo benshi baguye mu ntambara ku munsi 1

  • KAMALIZA AGNES
  • Mutarama 23, 2024
  • Hashize ukwezi 1
Image

Nibura abasirikare 21 ba Isiraheli ni bo baguye mu gitero cyagabwe mu mujyi wa Gaza rwagati, kikaba ari cyo cyahitanye abisirikare benshi bayo ku munsi umwe kuva batangira intambara bahanganyemo na Hamas imaze iminsi irenga 100.

The Independent yatangaje ko kuri uyu wa Kabiri, Minisitiri w’Ingabo muri Isiraheli, Yoav Gallant, yatangaje ko ari “igitondo kitoroshye kandi kibabaje. Yongeraho ko imitima yabo iri kumwe   n’imiryango ikunda mu bihe bigoye cyane.

Umuvugizi w’ingabo za Isiraheli (IDF) Rear Adm Daniel Hagari yavuze ko abo basirikare bakoreraga mu gace gaherereye kuri metero 600 uvuye ku mupaka hafi ya Kissufim ubwo inyubako yahirimaga bo barimo imbere.

Perezida wa Isiraheli Isaac Herzog, yavuze ko ari igitondo kitoroshye kwihanganira kandi ko Isiraheli izatsinda intambara.

Minisitiri w’Intebe wa Isiraheli, Benjamin Netanyahu, yamaganye inshuro nyinshi igitutu cy’amahanga kigenda cyiyongera ku ihagarikwa ry’imirwano muri Gaza.

Bije nyuma yuko Minisiteri y’Ubuzima ya Gaza ivuze ko umubare w’abapfuye mu Banyapalestine wazamutse ukagera hejuru ya 25.000 nubwo habarirwamo n’abasivili.

Ku wa Mbere w’iki cyumweru kandi ibitangazamakuru byo muri Isiraheli byatangaje ko, abasirikare ba Isiraheli barimo gutegura ibisasu kugira ngo bahanure inyubako ebyiri ziri muri Gaza rwagati.

  • KAMALIZA AGNES
  • Mutarama 23, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE