Ishimwe ry’umukecuru w’imyaka 73 umaze kwizigama 150,000 Frw muri EjoHeza

  • Imvaho Nshya
  • Ukwakira 4, 2023
  • Hashize amezi 8
Image

Kubona umusore w’imyaka 25 ateganyiriza igihe cy’izabukuru ni intambwe buri wese yifuza gutera kugira ngo atazandagara ashaje, ariko kubona umukecuru w’imyaka irenga 70 ateganyiriza ahazaza ni intambwe igaragaza ukwiyemeza kudasanzwe.

Kamaraba Maricianna w’imyaka 73 utuye mu Kagari ka Ruhunda mu Murenge wa Gishari, Akarere ka Rwamagana, ashimira Leta y’u Rwanda yashyizeho gahunda ya EjoHeza kuko imaze kumufasha kwiteganyiriza amafaranga y’u Rwanda arenga 150,000.

EjoHeza ni gahunda yashyizweho na Leta hagamijwe gufasha Abanyarwanda bari mu byiciro by’imirimo itandukanye kwizigamira no kuzabona Pansiyo bageze mu zabukuru.

Uyu mukecuru wishimira intambwe amaze gutera, agaragaza ko amaze imyaka ibiri yizigamira ari na yo amaze kugezamo ayo mafaranga agenda yongera uko ayabonye kose.  

Yagize ati: “Uburyo bwo kwizigamira ndabikora kandi maze kwizigamira amafaranga y’u Rwanda 150,000 mu myaka ibiri mazemo. Nizigamira ntagendeye ku mubare runaka w’amafaranga. Ngenda ntanga duke duke, mbese biterwa n’uburyo nabonye amafaranga kuko hari aho ntanga mu mezi abiri cyangwa nkatanga ay’umwaka wose.”

Kamaraba yavuze ko iyo aza kugira amahirwe nko mu myaka ye akiri muto hakabaho uburyo bwo kwizigamira aba yarateye imbere kurusha ubushobozi afite uyu munsi.

Yavuze ko agendeye kuri ubu buryo Leta yashyizeho bwo kwizigamira bwaziye igihe nubwo abikoze akuze.

Yagize ati: “Iyo nza kugira amahirwe yo kwizigamira nkiri muto mba narizigamiye nteganyiriza amasaziro yange gusa ubwo buryo ntibwari buriho. Ubuyobozi bwariho ntibwakanguriraga abaturage kwizigamira bateganyiriza imiryango yabo nabo ubwabo. Mbere hose ntawe bigeze babishishikariza ariko uyu munsi nubwo ngeze mu zabukuru ntibyambuza kubikora kuko ntawe ngomba kuzarushya.”

Muri Rwamagana harizigama abakecuru benshi

Mu Karere ka Rwamagana hari abageze mu zabukuru benshi bashima iyi gahunda ya EjoHeza kuko yaborohereje kwizigamira ahantu hatekanye, kandi ngo abakuze banihuriza hamwe bakungurana ibitekerezo by’uburyo bakomeza kuzigamira amasaziro yabo no guteganyiriza abo mu miryango yabo.

Mujawayezu Xaverine uhagarariye abageze mu zabukuru bigeze gukorera Leta mu Karere ka Rwamagana

Bose bavuga ko amahirwe Igihugu cyabahaye yo kwiteganyiriza batayahoranye mu myaka yo hambere bitewe nuko Leta zariho zitigeze zibatekereza nk’abaturage bafite uburenganzira nk’ubw’abandi.

Bavuga ko mu buto bwabo iyo haza kubaho uburyo bwo kwizigama no kwizigamira biriho uyu munsi, ngo abenshi muri bo baba bafite amasaziro meza kurusha uko biri uyu munsi.

Mujawayezu Xaverine uhagarariye abageze mu zabukuru bigeze gukorera Leta mu Karere ka Rwamagana, yavuze ko bishimira kuba batarahejwe muri gahunda yo kwizigamira muri EjoHeza bityo ko nk’abakuze baba bakwiye gutanga urugero ku bakiri bato bakabigiraho.

Yagize ati: “Imibereho myiza y’abageze mu zabukuru irakenewe, ni yo mpamvu natwe tuba tudakwiye guhezwa. Urabona ko gahunda yo kwizigama ya EjoHeza tutahejwe natwe badutekerejeho kandi tugomba kubera abakiri bato urugero. Iyo umuntu ashaje nabi nta buzima bwiza afite, nta mibereho myiza, arenderanya! Ni hahandi bavuga ngo ntugasaze wenderanyije n’abana wabyaye, abakuru na bo bakwiye gutanga urugero rwiza imbere y’abakiri bato kugira ngo tubabere urugero bazagenderaho.”

Umuyobozi w’Akarere ka Rwamagana Mbonyumuvunyi Radjab, yavuze ko abageze mu zabukuru bakwiye gukomeza gutera intambwe igana imbere ntibaheranwe n’amateka mabi y’ahahise bagatera imbere bakizigama.

Yagize ati: “Abageze mu zabukuru ntibakwiye guheranwa n’amateka y’ahahise, ahubwo bakwiye kubaka ubuzima bakiteganyiriza bakareba uko babaho uyu munsi ndetse n’ejo bagatera imbere ndetse n’imiryango yabo. Ni ikintu gikomeye kandi twese dukwiye kwitaho, guteganyiriza ejo hazaza.”

Mbonyumuvunyi asaba abaturage guharanira gukora bakizigama bakazasaza mu cyubahiro. Yagize ati: “Ntabwo iteka Leta izakomeza gufasha abahabwa ubufasha ahubwo yabashyiriyeho uburyo bwo kwizigamira bakava ku rwego bariho bakiteza imbere. Buri wese akwiye guharanira kubaho nk’inyangamugayo akazasaza mu cyubahiro n’ishema. Ni yo mpamvu hariho ikigega Leta yashyizeho cya EjoHeza kugira ngo uzagira intege nke yageze mu myaka 55 na we azabeho neza.’’

Kuri ubu, Leta y’u Rwanda ifasha abageze mu zabukuru, inshike, abapfakazi barengeje imyaka 65 aho igenerwa inkunga y’ingoboka iyo babana n’umuntu udashobora gukora kandi adafite ubushobozi.

NSHIMIYIMANA FAUSTIN

  • Imvaho Nshya
  • Ukwakira 4, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE