Ishimwe ry’ababyeyi Perezida Kagame yoroje nyuma yo kubyara impanga 3

  • NSHIMIYIMANA FAUSTIN
  • Ukuboza 28, 2023
  • Hashize amezi 5
Image

Ukwezi  k’Ukwakira kwabaye uk’umunezero udasanzwe ku muryango wa Mutungirehe Anastase w’imyaka 42 n’umufasha we  Mukansanga Elina w’imyaka 41, ubwo bibarukaga abana batatu b’impanga.

Abo babyeyi barashimira Perezida wa Repubulika y’u Rwanda Paul Kagame n’ubuyoboozi bw’Igihugu muri rusange budahwema gutekereza ku Banyarwanda, nyuma y’aho mu cyumweru gishize bashyikirijwe inka ihaka.

Bavuga ko umugisha wo kubonera rimwe abana batatu wazanye n’inshingano ziremereye  ku muryango usanzwe utunzwe n’ubuhinzi bwa gakondo no guca inshuro.

Ni abana baje biyongera ku bandi babiri na bo b’abakobwa, aho umukuru afite imyaka 12 na ho umukurikira akagira imyaka 7, bigaragara kona bo bagikeneye kwitabwaho kugira ngo babone uburere bukwiriye.

Mutungirehe Anastase ashimira Leta y’u Rwanda yamushyikirije inka ihaka amezi umunani muri Gahunda ya Girinka, akaba afite icyizere cyuko abana b’abakobwa batatu b’impanga babyaye mu mezi abiri ashize bazakamirwa nayo.

Umuryango wa Mutungirehe ubarizwa mu Mudugudu wa Rango, Akagari ka Karama, mu Murenge wa Kazo. Nyuma yo kubyara ubuzima bwarahindutse kuko amatungo magufi bari boroye bahise bayagurisha kugitra ngo babone iby’ibanze byi kwita kuri izo mpinja.

Kugurisha ayo matungo magufi ngo ntibyari bihagije kugira ngo haboneke ibyari bikenewe byose ariko banishimira ko Akarere ka Ngoma kababaye hafi  ndetse n’abaturage banyuranye bakajya babasura uko bukeye n’uko bwije ari na ko babazanira inkunga zitandukanye.

Mu byo ubuyobozi bw’Akarere kabafashije harimo no kubishyurira umwenda w’amafaranga 100,000 bari babereyemo ibitaro, kubagurira ibikoresho by’isuku amata n’ibyo kurya byiyongera ku byo n’abaturage bagenda babazanira.

Gusa ibyishimo biruta ibindi afite kuri ubu ni ukuba yaragabiwe inka ihaka n’Umukuru w’Igihugu, kugira ngo izite ku muryango we by’umwihariko umubyeyi wonsa ndetse n’impanga ze.

Mutungirehe yagize ati: “Njye n’umuryango wange twarishimye cyane kuko ni bwo bwa mbere tworoye inka, kandi igomba kuduha umusaruro ugomba gudufasha kurera abana kuko ubushobozi twari dufite mu muryango bwari bwararangiye. Ntitwari gushobora kurera abana nta nkunga tubonye.”

Yakomeje agira ati: “Twarishimye cyane kuba twarorojwe inka, sinabona uko nshimira Perezida wa Repubulika Paul Kagame wazanye gahunda ya Girinka nanjye ikangeraho kugira ngo ndere impanga zanjye. Inka izamfasha kubona umusaruro uva mu buhinzi kuko nakoresha imborera y’ibyatsi bivanzemo ivu ariko ubu mbonye ifumbire y’umwimerere…. Mu gihe cyo guhinga ni imbogamizi nahuraga na yo kuko ifumbire byari ikibazo.”

Mapambano Nyiridandi Cyriaque, Umuyobozi w’Akarere ka Ngoma wungirije ushinzwe iterambere ry’ubukungu, yavuze mu mwaka w’ingengo y’imari wa 2023/2024 bafite umuhigo wo gutanga inka 329, ariko kugeza ubu bamaze gutanga inka 246 zirimo 82 baherutse guha imiryango mu cyumweru gishize.

Yavuze kandi ko Girinka ari gahunda y’Umukuru w’Igihugu igenewe Abanyarwanda kugira ngo biteze imbere banoze n’imibereho y’imiryango.

Yagize ati: “Iyi ni gahunda Umukuru w’Igihugu yageneye Abanyarwanda kugira ngo borore babone amata, babone ifumbire yokongera umusaruro w’ubuhinzi kugira ngo bizamure imibereho y’umuryango (….) Akaba ariyo turi gushyira mu bikorwa.

Inka 82 duherutse guha imiryango 82 harimo n’uwa Mutungirehe twayiguraga 700,000 by’amafaranga y’u Rwanda kandi twazibahaye zihaka, zifite ubwishingizi, imiti yo kuzoza n’imyunyu n’ibindi. Turasaba abaturage ko bazifata neza zigakomeza kubateza imbere nkuko biri muri gahunda ya Guverinoma yo kwihutisha Iterambere (NST1).”

Yibukije abahabwa izo nka bose kuzirikana ko ari umurungo w’umuryango mugari n’Igihugu muri rusange bityo ntibatezuke ku kuzifata neza kuko iyo zibagiriye umumaro zikanororoka na bo baba bafoitre inshingano zo koroza abandi.

Yakomeje agira ati: “Umuryango wa Mutungirehe twawuhaye inka ifite amezi umunani harabura ukwezi kumwe ngo ibyare ku buryo mu minsi mike azabona amata zikamiye. Ubu turi kumufasha kumuha amata ariko nk’igisubizo kirambye ni ukumuha inka imukamirwa ariko banivane mu bukene baba bafite. Kandi Girinka ni gahunda dushimira Intore izirusha intambwe kuko itanga umusaruro.”

Ubuyobozi bw’Akarere ka Ngoma butungaza ko kuva gahunda ya Girinka yatangira muri 2006, bamaze gutanga inka 12,460.

Inka zitangwa muri ibi bihe zishyirwa mu bwishingizi, abatishoboye bahabwa imiti yo koza inka no kuzivura mu gihe bibaye ngombwa ndetse n’abaveterineri bakurikirana amatungo ariko by’umwihariko aya Girinka.

Kuri ubu Mutungirehe n’umufasha we Mukansanga Elinna bafite abana batanu b’abakobwa. Ubuyobozi bw’Akarere ka Ngoma bwamwemereye kumwubakira inzu.

  • NSHIMIYIMANA FAUSTIN
  • Ukuboza 28, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE