Ishami ry’Ikigo cy’Abadage Rohde & Schwarz ryafunguwe mu Rwanda

  • NTAWITONDA JEAN CLAUDE
  • Kamena 6, 2022
  • Hashize imyaka 2
Image

Kuri uyu wa Mbere taliki ya 6 Kamena 2022, mu Mujyi wa Kigali hafunguwe ku mugaragaro ibiro by’Ishami ry’Ikigo cy’Abadage Rohde & Schwarz kizobereye mu gukora ibikoresho by’ikoranabuhanga bikoreshwa mu nganda, mu kubaka ibikorwa remezo no mu bigo bya Leta, kikaba gisanzwe gikorera mu bihugu birenga 70 ku Isi.

Icyo kigo kizobereye by’umwihariko mu gutanga serivisi z’isakazamakuru n’umutekano w’ikoranabuhanga, cyafunguwe ku mugaragaro na Perezida wa Repubulika y’u Rwanda Paul Kagame agaragiwe n’abayobozi b’ibigo by’ikoranabuhanga bitandukanye ndetse n’abagize Guverinoma.

Icyo kigo gifatwa nk’ikimenyetso gikomeye cy’ubufatanye mpuzamahanga bugamije gufasha u Rwanda kugera ku ntego yo guhinduka ihuriro ry’iterambere ry’ikoranabuhanga muri Afurika no hanze yayo.

Perezida Kagame yavuze ko u Rwanda rumaze gutera intambwe ifatika mu rugendo rwo kubaka ubukungu bushingiye ku ikoranabuhanga, ashimangira ko hakiri byinshi byo gukorwa.

Ati: “Ingamba zacu zibanda ku gushyiraho ikirere cyoroshya ubucuruzi, mu gihe dushora imari mu bikorwa remezo by’umuyoboro mugari itumanaho hamwe no kwimakaza ubumenyi mu by’ikoranabuhanga.”

Yatanze zimwe mu ngero z’urugendo rumaze guterwa hashyirwaho ibigo bibungabunga buri ntambwe iterwa mu kwimakaza ikoranabuhanga, nk’Ikigo Mpuzamahanga cy’Imari cya Kigali (KIFC) gikurikirana ibijyanye n’imari, Kigali Innovation City (KIC) igira uruhare mu guhanga udushya mu miturire ndetse n’ Ikigo gishinzwe Impinduramatwara ya Kane mu Bukungu mu Rwanda (C4IR Rwanda) cyibanda ku kwimakaza iterambere ry’ikoranabuhanga rigezweho.

Yakomeje agira ati: “Icyerekezo cyacu ni uguhinduka ihuriro ryizewe rya serivisi z’imari n’ikoranabuhanga muri serivisi z’imari no guhanga udushya mu Karere kacu ndetse no hanze yako. Rohde & Schwarz ije ari inyongera nziza mu muryango w’abashinzwe guteza imbere ikoranabuhanga mu Rwanda, binyuze muri Laboratwari yo guteza imbere porogaramu za mudasobwa yatangiye mu 2019.”

Yavuze ko ibyakomeje kuranga iterambere ry’u Rwanda nk’Igihugu ari ugushyira imbere abaturage, by’umwihariko urubyiruko, ari na yo mpamvu iterambere ry’ikoranabuhanga rikomeza kwimakazwa rihereye ku muturage.  Ibiro byiki kigo bimaze imyaka ibiri bikora ariko umuhango wo kubitaha wadindijwe n’icyorezo cya COVID-19.

Ubuyobozi bwa Rohde & Schwarz bwishimira ko bwaje mu Rwanda busanga irindi shoramari ry’Abadage rimaze gushinga imizi, ririmo nka Volkswagen, ndetse mu bihe biri imbere hakaba hitezwe uruganda rw’inkingo n’indi miti rwa BioNTech.

  • NTAWITONDA JEAN CLAUDE
  • Kamena 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE