Isazi zisangira n’abaturiye Ikimpoteri cy’Umujyi wa Musanze

  • Imvaho Nshya
  • Ugushyingo 10, 2023
  • Hashize amezi 7
Image

Ahari umwanda ntihabura isazi, indwara zituruka ku mwanda na zo ziba zikomanga ku muryango. Abaturage bo mu Murenge wa Cyuve, Akarere ka Musanze, bavuga ko barembejwe n’isazi ziva mu kimpoteri cy’Umujyi wa Musanze zikabasanga mu ngo.

Abo baturage bavuga ko izo sazi ntaho utazisanga mu ngo z’abaturiye icyo kimpoteri, ndetse ngo nta muntu wavuga ko ashobora guteka cyangwa kurira hanze kuko ziba zihuzuye, no mu nzu zibasanga ku meza bakinubira gusangira na zo.

Izo sazi bavuga ko ziri mu bibateza indwara zikomoka ku mwanda nk’inzoka zo mu nda, impiswi n’izindi, bakongeraho ko n’umunuko ubasanga iyo umuyaga uhushye ubabuza amahwemo kubera ko icyo kimpoteri cyuzuye ku buryo n’amazi mabi agiturukamo agera mu masambu no mu ngo zabo.

Ndengeyingoma Leonard, umwe muri abo baturage, yagize ati: “Iki kimpoteri uko ukibona reba cyuzuyemo amasashe iyo umuyaga uje adusanga mu ngo iwacu, ikindi kandi ubu isazi zivamo ziteye inkeke ntaho utazisanga, nta muntu wavuga ngo ashobora guteka cyangwa se kurira hanze.

Mu gihe cya nimugoroba kugeza mu gitondo umunuko uvamo wose wirunda mu nzu zacu tukabura amahoro.

Nsengiyumva akomeza avuga ko amazi aturuka ku nzu zabo iyo ahuye n’avuye muri iki kimpoteri bikora umwanda uzana umunuko ukomeye, ku buryo ngo iki kompoteri kigira n’ingaruka mu buhinzi bwabo ndetse n’amatungo yabo.

Ati: “Iki kimpoteri kidutera indwara zinyuranye ziterwa n’umwanda kuko amasazi atuzanira inzoka ku bikoresho byacu n’ibiribwa, ubuyobozi nibuturwaneho hafatwe ingamba zatuma na twe tugira ubuzima bwiza, kuko mu bihe by’imvura bwo tuba tugowe”.

Yavuze ko igituma icyo kimpoteri kigira umunuko ukabije ari uruvangitirane rw’imyanda rurimo ibisigazwa by’ibiribwa bijugunywa n’abanyamujyi, ibishishwa by’imbuto, imyaka yaboze iva mu masoko n’ibindi bitabora nk’amasashe, imyenda yashaje, amacupa, amasahane n’ibindi byinshi.

Mukangaruye Winifride we avuga ko no kuba iki kimpoteri kitazitiye bituma abana babo batajya ku ishuri kuko bamwe birirwa batoraguramo ibikoresho binyuranye nk’amacupa bagurisha ku bakora inzoga z’inkorano.

Abana bata ishuri bakirirwa mu iyarara batora imyanda bita ibikinisho

Yagize ati: “Ndasaba Leta ko yakwimura iki kimpoteri kikava hano cyangwa bakagifunga, nibakizitire cyangwa bashyireho umuzamu ajye akumira abana bacu kuko ni ho birirwa batoragura ibyuma bishaje n’ibindi bafata nk’ibinikinisho nyamara bibakururira indwara zituruka ku mwanda.”

Akomeza avuga ko buri Muyobozi w’Akarere utowe aza abizeza ko azagikemura akarinda avaho atabahaye igisubizo, akaba afite impungenge ko bidashobora gukorwa keretse bigeze ku Mukuru w’Igihugu.

Ubuyobozi bw’Akarere ka Musanze bwo buvuga ko burimo gushakira umuti urambye iki kimpoteri kimaze iminsi kibangamiye abaturage.

Umuyobozi w’agateganyo w’Akarere ka Musanze Bizimana Hamiss, yabwiye Imvaho Nshya ko icyo kibazo bakizi kandi byamaze kwemezwa ko kizimurirwa mu Murenge wa Gacaca.

Yagize ati: “Ubuyozi bw’Akarere iki kibazo burakizi ariko kuri ubu turimo gushaka uburyo cyakwimurwa kikajya kure y’abaturage kuko ubona koko kibangamye. Ubu rero mu Murenge wa Gacaca ni ho biteganyijwe ko kizimurirwa.”

Ku birebana n’abana birirwamo, yavuze ko bibabaje kuba bajyamo bikabatera kwandura indwara zituruka ku mwanda, ashimangira ko bagiye kubikurikirana.

Yakomeje agira ati: “Ariko ntabwo nabura kubwira ababyeyi ko bakwiye kwita ku bana babo. Nabwo twari tuzi ko aba bana birirwa mu kimpoteri, tugiye kubiganiraho n’ubuyobozi bw’Umurenge aba bana babe bashyirirwaho uburinzi”.

Kugeza ubu Akarere ka Musanze gafite ikimpoteri kijyanye n’igihe kiri mu Murenge wa Busogo, bikaba biteganyijwe ko icy’Umujyi wa Musanze kigiye kubakwa mu Murenge wa Gacaca, bizakorwa ku bufatanye na Banki Nyafurika itsura Amajyambere (AfDB) n’Ikigo cy’Igihugu gishinzwe Amazi n’Isukura (WASAC).

Icyo gisubizo ni cyo cyitezweho gufasha abaturage baturiye ikimpoteri gisanzwe kongera guhumeka umwuka mwiza n’abana babo bakarindwa ibyago byo kwandura indwara zituruka ku mwanda bakuraga mu kwirirwa mu iyarara.

Umuyobozi w’agateganyo w’Akarere ka Musanze Bizimana Hamiss

NGABOYABAHIZI PROTAIS

  • Imvaho Nshya
  • Ugushyingo 10, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE