IRMCT yemeje urupfu rwa Aloys Ndimbati ukekwaho Jenoside

  • Imvaho Nshya
  • Ugushyingo 14, 2023
  • Hashize amezi 4
Image

Ibiro by’Ubushinjacyaha bw’Urwego  Mpuzamahanga rwashyiriweho Imanza z’Insigarira z’Inkiko Mpanabyaha (IRMCT), rwemeje urupfu rwa Aloys Ndimbati, umwe mu Banyarwanda bakurikiranyweho ibyaha bakoze muri Jenoside yakorewe Abatutsi mu 1994.

Ndimbati wabaye Burugumesitiri wa Komini Gisovu mu yahoze ari Perefegitura ya Kibuye, yari akurikiranyweho gukora Jenoside, kugira uruhare mu kuyitegura no kuyishyira mu bikorwa,  gushishikariza rubanda kwijandika muri Jenoside, ubwicanyi, itsembabwoko, gufata ku ngufu Abatutsikazi n’irindi hohotera, nk’ibyaha byibasiye inyoko muntu.

Bivugwa ko Ndimbati yagize uruhare rukomeye muri Jenoside yakorewe Abatutsi mu bice bitandukanye bya Perefegitura ya Kibuye, ashinjwa kuba mu bateguye bakanashyira mu bikorwa ubwicanyi bwakorewe ku misozi ya Bisesero, Kidashya, Muyira, Byiniro na Kizirandimwe no mu buvumo bwa Nyakavumu.

Ndimbati yabarizwaga mu Ishyaka rya MRND, akaba yarashyiriweho impapuro zisaba kumuta muri yombi mu kwezi k’Ugushyingo 1995 ubwo zashyikirizwaga Urukiko Mpuzamahanga Mpanabyaha rwashyiriweho u Rwanda (ICTR).

Ibyaha Ndimbati yashinjwaga ko ari 7 byari bifitiwe ibimenyetso simusiga, cyane ko hari abatangabuhamya batagira ingano bamwiboneye ahamagarira abaturage kwica Abatutsi mu nama zitandukanye zaberaga muri Komini Gisovu.

Ndimbati afatanyije n’abandi bayobozi bakoraga mu nzego z’ibanze barimo na Charles Sikubwabo na we ukurikiranyweho ibyaha bya Jenoside, bateguye ibikorwa byo kwitsembera Abatutsi bari bahungiye muri Komini Gisovu, mu misozi ya Bisesero n’ahandi hagati yo mu kwezi kwa Mata n’ukwa Kamena 1994.

Ashinjwa kuba yariteguriraga ibitero akanagira uruhare rutaziguye mu bwicanyi nk’umuyobozi wabaga atanga urugero ngo n’abandi batinyuke kwica Abatutsi bari bahungiye ku misozi itandukanye.

Muri Nyakanga 1994, Ndimbati n’umuryango we bahunze u Rwanda berekeza muri Zaire, ubu ni Repubulika Iharanira Demokarasi ya Congo (RDC). Akigera muri RDC yashyikiye mu Nkambi ya Kashusha, nyuma we na bamwe mu bo mu muryango we bakomereza i Kisangani.

Ahagana muri Kamena 1997, Ndimbati yagarutse mu Rwanda abifashijwemo n’Ishami ry’Umuryango w’Abibumbye ryita ku Mpunzi (UNHCR) aruhukira i Kanombe avuye i Kisangani, ariko ntibyamenyekana kuko yaje mu mpunzi nyinshi.

Nyuma y’iperereza rigoranye ryakozwe, IRMCT yemeje ko Ndimbati yapfuye mu mpera za Kamena 1997, aguye  mu bice by’Umurenge wa Gatore w’ubu mu Karere ka Kirehe, Intara y’Iburasirazuba y’u Rwanda.

Nubwo impamvu za nyazo z’urupfu rwe zitagaragajwe hakiri kare bigatuma habaho gushidikanya no kudatangira amakuru ku gihe, ibimenyetso byakusanyijwe n’Ibiro by’Ubushinjacyaha bwa IRMCT byerekana ko Ndimbati atigeze ava i Gatore kandi kuva icyo gihe ntiyongeye kuvugwa cyangwa ngo habe hari ahandi yaba yarumvikanye.

Nta makuru cyangwa ibimenyetso bifatika kuri we bigaragaza ko yaba akiriho nyuma y’icyo gihe, gusa i Gatore ni agace gakora ku Burundi ndetse kakaba kegereye na Tanzania.

Mu buryo bwihariye, Ibiro by’Ubushinjacyaha Bukuru bw’u Rwanda (NPPA) na byo byemeje urwo rupfu nyuma y’iperereza ryakozwe by’umwihariko.

Mu gihe abarokotse n’abagizweho ingaruka n’ibikorwa bya Ndimbati batazamubona ageze imbere y’ubutabera akaryozwa ibyo yakoze, IRMCT yizera ko gutangaza ayo makuru bizafasha benshi kumenya ko atakiriho ku buryo yaba akiri ikibazo ku mutekano w’u Rwanda.

IRMCT yemeza ko kugeza ubu abakekwaho Jenoside yakorewe Abatutsi bakurikiranwaga na ICTR ari Charles Sikubwabo na  Ryandikayo.

Hagati ya Gicurasi 2020 n’uyu munsi Ibiro by’Ubushinjacyaha bwa IRMCT byataye muri yombi Félicien Kabuga na Fulgence Kayishema, binemeza urupfu rw’abandi barimo Augustin Bizimana, Protais Mpiranya na Phénéas Munyarugarama.

NTAWITONDA JEAN CLAUDE

  • Imvaho Nshya
  • Ugushyingo 14, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE