IRCAD Africa yubatswe nyuma yo kubona icyerekezo cya Perezida Kagame  

  • Imvaho Nshya
  • Ukwakira 7, 2023
  • Hashize amezi 8
Image

IRCAD ni Ikigo cy’Abafaransa gikora Ubushakashatsi kikanatanga amasomo mu kubaga umuntu hifashishijwe ikoranabuhanga.

Kizobereye mu gukora ubushakashatsi mu byo kubaga hibandwa ku ndwara za kanseri zifata imyanya yo mu nda kandi bigakorwa bitabaye ngombwa ko hafungurwa igice kinini cy’umubiri (minimally invasive surgery).

Cyifashisha ikoranabuhanga rya ‘Robot’ na Camera mu kubaga umuntu ku buryo bituma agira uburibwe buke kandi agakira vuba.

Prof Jacques Marescaux watangije ikigo cya IRCAD ku Isi akanatangiza IRCAD Africa ifite icyicaro mu Mujyi wa Kigali mu Karere ka Kicukiro mu Murenge wa Masaka, yavuze ko yahisemo kuzana ishami rya IRCAD Africa mu Rwanda kubera ko ari igihugu gishyize imbere ikoranabuhanga.

Yabigarutseho mu kiganiro n’abanyamakuru cyabaye ejo ku wa Gatanu ku cyicaro cya IRCAD Africa giherereye mu Karere ka Kicukiro mu Mujyi wa Kigali.

Kuhubaka iki cyicaro ku rwego rw’Afurika, asobanura ko byaturutse ku mpamvu z’uko u Rwanda ari igihugu gishyize imbere ikoranabuhanga, ikindi ngo n’uko yabonanye na Perezida Kagame, akamubonamo nk’umuntu ufite icyerekezo.

Ati: “Ushobora kwibaza impamvu twahisemo u Rwanda ariko aya mahitamo yari yoroshye rwose kuko i Burayi n’ahandi hose ku Isi, u Rwanda turubona nk’igihugu cy’ikoranabuhanga ibyo twese turabizi ni yo mpamvu ya mbere.

Indi mpamvu nyamukuru ni igihe nahuraga na Perezida Paul Kagame, icyo gihe namubonyemo umuntu ufite icyerekezo, nabonye umuyobozi nyawe w’igihugu tugirana ibiganiro, yahise ambwira ko Guverinoma yiteguye gukora ibishoboka byose iki kigo kigashyirwaho.

Ibyo bigaragaza ko yumva ko Afurika na yo ikwiye kugira aya mahirwe yo kugira bene iri koranabuhanga. Iyo bitaba ubufatanye bwa Guverinoma y’u Rwanda ndatekereza ko tutari kuzagera kuri ibi mubona uyu munsi”.

Abaganga bazajya bagira amahirwe yo gukurikirana amasomo yisumbuye mu bijyanye no kubaga akorerwa mu bindi bihugu bitandukanye byo ku Isi aho IRCAD ikorera.

Dr King Kayondo, Umuyobozi Mukuru w’Ikigo cya IRCAD Africa, avuga ko biteguye gutanga ubumenyi bukenewe mu kwihugura.

Yagize ati “Dufite Labolatwari nziza irimo ibikoresho byose ndetse ikaba ifite ahantu 16 hashobora gukorerwa ibi bikorwa byo kubaga dufite na robo imwe.

IRCAD Africa ni cyo kigo muri Afurika gifite iyi robo yo kubaga, ahandi iboneka ni muri Afurika y’Epfo rero navuga ko dufite ikigo cyiza cyujuje ibisabwa mu gukora ubushakashatsi no guhugura”.

Minisitiri w’Ubuzima Dr Sabin Nsanzimana avuga ko iki kigo mu Rwanda ari igisubizo ku kibazo kikibangamiye urwego rw’ubuvuzi.

Ati: “Iki ni ikintu dushaka kubona gitera imbere cyane kikagera mu bitaro byose, tukabona abaganga babaga baturutse hirya no hino ku Isi.

Bamwe baje guhugura, abandi baje kwiga ariko kandi ibi ni amahirwe ku baganga bacu kuko bazigiramo ubumenyi ndetse bakabona uburyo bwo kuvura bwizewe kandi bwihuse.

Ikindi kintu cy’ingenzi ni uko nta kindi kigo mu Karere duherereyemo gifite robo zibaga ndetse no muri Afurika yose.

Ni igihugu kimwe gusa gifite robo zibaga rero turifuza kubona ibi bigira impinduka mu Rwanda ndetse no hanze y’u Rwanda”.

Imirimo yo kubaka ikigo cya IRCAD Africa yatangiye mu mwaka 2019, kikaba cyatangiye gukora ku mugaragaro kuri uyu wa Gatandatu tariki 07 Ukwakira 2023.

Cyafunguwe ku mugaragaro na Perezida Paul Kagame ari kumwe na Madamu we Jeannette Kagame.

Imibare y’Ishami ry’Umuryango w’Abbumbye ryita ku buzima OMS/WHO igaragaza ko abantu miliyari 2.5 ku Isi batabona amahirwe yo kugera kuri serivisi nziza kandi zizewe zijyanye no kubagwa hifashishijwe ikoranabuhanga.

IRCAD Africa ifite ibikoresho by’ikoranabuhanga byo ku rwego rwo hejuru

KAYITARE JEAN PAUL

  • Imvaho Nshya
  • Ukwakira 7, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE