Inyigisho z’isanamitima zabohoye abasaba n’abatanga imbabazi

  • Imvaho Nshya
  • Ugushyingo 13, 2023
  • Hashize amezi 6
Image

Bamwe mu biciwe ababo muri Jenoside yakorewe Abatutsi mu 1994, bo mu Karere ka Gasabo, mu Murenge wa Nduba, bavuga ko inyigisho z’isanamitima zabafashije kubohoka, ari abasaba imbabazi kimwe n’abazisabwa.

Mbere yo kubabarira ababiciye, bahoranaga ibikomere byo ku mutima ndetse n’uburwayi budakira nk’umutwe.

Ariko nyuma yo kujya mu itsinda ry’isanamitima bahurijwemo n’ababiciye ryitwa ‘Twunge ubumwe twubakana’, kuri ubu basabanye imbabazi kandi babanye mu mahoro.

Bavuga ko batiyumvishaga ibyo kujya kwiga inyigisho z’isanamitima cyane ko bumvaga batarabohoka imitima ku buryo babarirana ndetse bakagenderana.

Hakizimana Athanase wishe umutware wa Mukarurema Bernadette, ubu babana mu itsinda, avuga ko nyuma yo kwirega akemera icyaha yumvaga ataracya ku mutima atarasaba imbabazi uwo yiciye. Ni ko gufata iya mbere ajya kuzisaba, ni mu gihe Mukarurema we akimukubita amaso aje kumusaba imbabazi yafashwe n’isereri agahita amwirukana, ariko nyuma yo gufata inyigisho yagize ubutwari bwo kumubabarira.

Mukarurema ati: ”Yaje mu rugo nkimubona numva ubwenge burabuze n’iyo ngira icyo mukoraho icyo gihe mba naragikoze, naramwirukanye ndamubwira ngo azagarukane n’umuryango, nyuma turaterana tumuha imbabazi ariko za nyirarureshwa, tubaho gutyo ariko igihe kiragera uyu muryango uraza, dufata inyigisho z’isanamitima Imana iradufasha ishwangurura mu mitima ya mibabaro yose, ubu njye narababariye,ubu tubana mu matsinda menshi y’ubwizigame iyo ntabonetse arantangira, umutima warabohotse burya gusaba imbabazi no kuzitanga ni ubutwari”.

Ngumurore Cesarie nawe aba mu itsinda rimwe na Turimitse Faustin wamwiciye umubyeyi, avuga ko uyu mugabo agifungurwa aho yacaga yacishaga umuriro, cyane ko hari ubwo yigeze kujya mu rusengero akimubona abyina yatakawe asohokamo inkungugu.

Ati: “Aho aciye sinahacaga, iyo nendaga guhura nawe narakataga, sinumvaga hari ahantu twahurira ndetse  kuko twavomaga ku musozi iyo nabaga nkihamubona sinajyaga kuvoma, yewe nigeze no kujya gusengera muri ADEPR ngezeyo nsanga arimo arataraka imbere abyina cyane nahise ntaha bikomeza gutyo aho mubonye simpace”.

Turimitse Faustin avuga ko yumvaga atatinyuka gusaba imbabazi bitewe n’ikimwaro cy’ibyo yakoze ariko akimara kwakira Yesu Kristo nk’Umwami n’Umukiza we yagize ubutwari bwo kujya mu itsinda ry’isanamitima asaba imbabazi.

Ati: “Numvaga ntamugera mu maso nsaba imbabazi kuko natekerezaga ibyo namukoreye, n’iyo nabonaga tugiye guhura namutanze kumubona nashakaga izindi nzira nyuramo, ariko nyuma yo kujya gusenga numvise umutima wanjye ucyeye abantu bose ndabakunda, ndabyibuka nkijya gufata inyigisho nagiye mfite umutima uhagaze nti ‘nagiye kera ku busa ubanza ahari badushoboye noneho badutumyeho abagore mu rusengero? Ubanza wa munsi wacu wo guhabwa imbabazi wageze.”

Akomeza avuga ko akigera mu itsinda yahuye nuwo yahemukiye maze arapfukama amusaba imbabazi aruhuka umutima atyo.

Aba bose bavuga ko mbere yo gutanga imbabazi bahoranaga indwara zidakira zirimo umutwe, igifu ndetse n’izindi ariko nyuma yo kubabarirana babanye mu mahoro aho borozanya amatungo, imiryango ikagendererana kandi bagasangira nta rwikekwe.

Iri tsinda ry’isanamitima: “Twunge ubumwe Twubakana” ryahujwe n’idini rya ADEPR rigizwe n’abantu 24 batangiye urugendo rw’ubudaheranwa aho babanamo ari abakoze Jenoside, Abayikorewe ndetse n’imiryango yabo, bakaba bishimira uko bakize ibikomere bitewe no kubabarirana.

KAMALIZA AGNES

  • Imvaho Nshya
  • Ugushyingo 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE